၂၄။ ယောဟန်ယေရှုကို ဗတ္တိဇံပေးခြင်း
ဇာခရိ နဲ့ ဧလိဇဘက် ရဲ့ သားဖြစ်တဲ့ ယောဟန်ဟာ အရွယ်ရောက်လာပြီး ဘုရားစကားကို ပြောပေးနိုင်တဲ့သူ ဖြစ်လာတယ်။ သူဟာ တောကန္တာရမှာ နေပြီးတော့ ကျိုင်းကောင်နဲ့ ပျားရည်ကို စားပြီး ကုလားအုပ်အမွှေးနဲ့ လုပ်ထားတဲ့ အင်္ကျီကို ဝတ်တယ်။
လူတွေဟာ ယောဟန်ပြောတာကို နားထောင်ဖို့ တောကန္တာရကို လာကြတယ်။ ယောဟန်က “နောင်တရကြပါ၊ ဘုရားသခင်ရဲ့ နိုင်ငံတော်ဟာ နီးလာပြီ”ဆိုပြီး ဟောပြောတယ်။
လူတွေဟာ ယောဟန်ရဲ့ တရားဟောချက်ကို ကြားတဲ့အခါ နောင်တရကြတဲ့အတွက် ယောဟန်က သူတို့ကို ဗတ္တိဇံ မင်္ဂလာကို ပေးတယ်။ ဘာသာရေးခေါင်းဆောင် အများစုကလည်း ယောဟန်ဆီမှာ ဗတ္တိဇံခံကြပေမဲ့ သူတို့ရဲ့ အပြစ်ကို တကယ်နောင်တရတာ မဟုတ်ဘူး။
ယောဟန်က ဘာသာရေးခေါင်းဆောင်တွေကို “မင်းတို့ဟာ မြွေဆိုးအဆိပ်အတောက်ရှိတဲ့ သူပဲ၊ မင်းတို့ရဲ့အကျင့်ဆိုးအတွက် ပြောင်းလဲပြီး နောင်တရကြပါ၊ အသီးကောင်းမသီးတဲ့အပင်တွေကို ခုတ်ပစ်ပြီး မီးရှို့ပစ်ရမယ်” ဆိုပြီး ပြောလိုက်တယ်။ ရှေးပရောဖက်တွေ ကြိုတင်ဟောပြောခဲ့တဲ့ “ကြည့်ပါ၊ မင်းတို့ရှေ့မှာ ငါ့တမန်ကို လွတ်ပြီးတော့ သူဟာ လမ်းခရီးကို ပြင်ဆင်ပေးမယ်” ဆိုတဲ့ စကားက အခု ယောဟန်ကြောင့် ပြည့်စုံသွားပြီ။
ဂျူးတချို့က ယောဟန်ကို မေရှိယ ဆိုတဲ့ ကယ်တင်ရှင် ဟုတ်မဟုတ် မေးကြတဲ့အခါ ယောဟန်က “ငါဟာ ကယ်တင်ရှင် မဟုတ်ဘူး ငါ့နောက်ကြွလာမယ့်သူဟာ ကြီးမြတ်တဲ့သူဖြစ်တယ်။ ငါဟာ သူရဲ့ ဖိနပ်ကြိုးကိုတောင် ဖြေပေးဖို့ မထိုက်တန်ဘူး” လို့ ပြန်ပြောလိုက်တယ်။
နောက်တနေ့မှာ အရှင်ယေရှုဟာ ယောဟန်ဆီကို လာပြီး ဗတ္တဇံခံတယ်။ ယောန်က အရှင် ယေရှုကို တွေ့တာနဲ့ “ ကြည့်ကြ ၊ ဒီလောကရဲ့အပြစ်ကို ဆောင်ယူမယ့် ဘုရားသခင်ရဲ့ သိုးသငယ်ဖြစ်တယ်” ဆိုပြီး ပြောလိုက်တယ်။
ယောဟန်က အရှင်ယေရှုကို “အရှင့်ကို ဗတ္တိဇံမင်္ဂလာပေးဖို့ ကျွန်တော်ဟာ မထိုက်တန်ပါဘူး၊ အရှင်ကသာ ကျွန်တော့ကို ဗတ္တိဇံပေးသင့်တာပါ”လို့ ပြောတယ်။ အရှင်ယေရှုက မင်းဟာ ငါ့ကို ဗတ္တိဇံမင်္ဂလာကို ပေးရမယ်၊ ဘာကြောင့်လဲဆိုတော့ ဒါဟာ လုပ်ရမယ့်အရာဖြစ်တယ်”လို့ အရှင်ယေရှုပြန်ပြောလိုက်တယ်။ အဲဒီအခါမှာ အရှင်ယေရှုဟာ ဘာအပြစ်မှ မရှိပေမယ့် ယောဟန်ဆီမှာ ဗတ္တိဇံမင်္ဂလာကို ယူတယ်။
ဗတ္တိဇံခံအပြီး အရှင်ယေရှုဟာ ရေထဲကနေထလာတဲ့အခါမှာ သန်ု့ရှင်းသော ဝိညာဉ်တော်ဟာ ဂျိုးငှက်ပုံစံနဲ့ ဆင်းလာပြီး အရှင်ယေရှုပေါ်မှာ နားတယ်။ အဲဒီတချိန်တည်းမှာပဲ ကောင်းကင်ကနေ ဘုရားသခင်ရဲ့ အသံတော်က “မင်းဟာ ငါချစ်ရတဲ့ ငါ့သားဖြစ်တယ်” လို့ ပြောတယ်။
ဘုရားသခင်က ယောဟန်ကို“ မင်း ဗတ္တိဇံပေးတဲ့ သူအပေါ်ကို သန့်ရှင်းသော ဝိညာဉ်တော် ဆင်းသက်ပြီးတော့ သူဟာ ဘုရားသခင်ရဲ့ သားတော်ဖြစ်တယ်”လို့ ပြောခဲ့တယ်။ ဘုရားသခင်ဟာ တစ်ဆူတည်းပဲ ရှိတယ်။ ဒါပေမယ့် ယောဟန်က အရှင်ယေရှုကို ဗတ္တိဇံပေးတဲ့အခါမှာ အဖ ခမည်းတော်ဘုရားထံက အသံတော်ကြားရတယ်၊ သားတော်ဘုရားဖြစ်တဲ့ အရှင်ယေရှုကိုလည်း တွေ့ခဲ့ရတယ်၊ ပြီးတော့ သန့်ရှင်းသော ဝိညာဉ်တော်ဘုရားကိုလည်း သူတွေ့ခဲ့ရတယ်။.
အခြေပြုကျမ်းညွှန်း - ရှင်မသဲခရစ်ဝင် ၃၊ ရှင်မာကုခရစ်ဝင် ၁:၉-၁၁၊ ရှင်လုကာခရစ်ဝင် ၃:၁-၂၃။