၃၇။ လာဇာရုကို သေခြင်းကထမြောက်က်စေတဲ့ အရှင်ယေရှု
တစ်နေ့မှာ အရှင်ယေရှုဟာ လာဇရု အပြင်းဖျားတဲ့ သတင်းကို ကြားရတယ်။ အရှင်ယေရှုက သတင်းကြားကြားချင်းပဲ "အခုဖြစ်တဲ့ ဖျားနာခြင်းဟာ သူ့ကိုသေစေဖို့မဟုတ်ဘူး။ ဘုရားသခင်ဘုန်းတော် ထင်ရှားဖို့အတွက်ပဲဖြစ်တယ်" လို့ပြောလိုက်တယ်။ လာဇရုရဲ့ အစ်မနှစ်ယောက်ဖြစ်တဲ့ မာရိနဲ့ မာသဟာ အရှင်ယေရှုနဲ့ အရမ်းရင်းနှီးတဲ့ မိတ်ဆွေတွေဖြစ်ကြတယ်။ အရှင်ယေရှုဟာ သူ့မိတ်ဆွေတွေကို ချစ်ပေမဲ့လည်း သူရှိတဲ့နေရာကနေနှစ်ရက်ကြာ စောင့်ဆိုင်းခဲ့တယ်။
နှစ်ရက်ကြာပြီး၊ အရှင်ယေရှုက သူ့တပည့်တော်တွေကို "ယုဒပြည်ကို သွားကြစို့" လို့ပြောတဲ့အခါမှာတော့ တပည့်တော်တွေက "ကိုယ်တော်၊ အဲ့ဒီဒေသကလူတွေကကိုယ်တော်ကို မကြာခင်ကပဲ သတ်ချင်နေကြတာလေ" လို့ပြောတော့ အရှင်ယေရှုက "ငါတို့ရဲ့မိတ်ဆွေ လာဇရု အိပ်ပျော်နေလို့ ငါသူ့ကိုသွားနှိုးရမယ်" လို့ပြောလိုက်တယ်။
အရှင်ယေရှုရဲ့တပည့်တော်တွေက "သခင်၊ လာဇရု အိပ်ပျော်နေရင်တော့ ပိုကောင်းတာပေါ့" လို့ ပြောကြတယ်။ အရှင်ယေရှုက "လာဇရု သေသွားပြီ။ အဲ့ဒီအချိန်မှာ ငါမရှိခဲ့တာ ငါ့အတွက် ပိုကောင်းတယ်။ ဒါမှ မင်းတို့ ငါ့ကို ယုံကြည်နိုင်ကြမယ်" လို့ပြောလိုက်တယ်။
လာဇရုနေတဲ့ မြို့ကိုအရှင်ယေရှုရောက်တဲ့အခါ လာဇရုသေခဲ့တာ လေးရက်ကြာသွားပြီ။ အရှင်ယေရှုကို မာသကသွားကြိုပြီးတော့ "သခင်၊ ကိုယ်တော်ဒီမှာရှိရင် လာဇရု သေမှာမဟုတ်ဘူး။ ဒါပေမဲ့ ကိုယ်တော်တောင်းသမျှကို ဘုရားသခင် ပေးမယ်လို့ ကျွန်မယုံကြည် ပါတယ်" လို့ ပြောတယ်။
အရှင်ယေရှုက "ငါဟာ ထမြှောက်ခြင်းနဲ့ အသက်ရှင်ခြင်း ဖြစ်တယ်။ ငါ့ကို ယုံကြည်တဲ့လူတွေဟာ သေသွားပေမဲ့လည်း ပြန်ရှင်လာလိမ့်မယ်။ ငါ့ကို ယုံကြည်တဲ့လူဟာ ဘယ်တော့မှ မသေရဘူး။ အဲ့ဒါကို ယုံပါသလား" ဆိုပြီးမေးလိုက်တယ်။ မာသက "ဟုတ်ကဲ့၊ သခင် ကျွန်မယုံပါတယ်။ ကိုယ်တော်ဟာ ကယ်တင်ရှင် မေရှိယ၊ ဘုရားသခင်ရဲ့သားတော် ဖြစ်ပါတယ်" လို့ပြန်ဖြေလိုက်တယ်။
သူတို့ စကားပြောပြီးနောက်မှာ မာရိဟာ သူတို့ဆီကို ရောက်လာခဲ့တယ်။ ပြီးတော့အရှင်ယေရှုရဲ့ခြေတော်ရင်းမှာ ပြပ်၀ပ်ပြီး "သခင်၊ ကိုယ်တော် ဒီနေရာမှာရှိရင် လာဇရု သေမှာမဟုတ်ဘူး" ဆိုပြီးပြောပြတယ်။ အရှင်ယေရှုက "လာဇရုကို ဘယ်မှာထားသလဲ" လို့မေးတဲ့အခါ သူတို့က "သင်္ချိုင်း မှာရှိပါတယ်။ လာကြည့်ပါ" လို့ပြောတယ်။ အရှင်ယေရှုဟာ စိတ်မကောင်းခြင်းကြီးစွာနဲ့မျက်ရည်ကျခဲ့တယ်။
အဲ့ဒီအချိန်တုန်းက သင်္ချိုင်းတွေဟာ ကျောက်ဂူသင်္ချိုင်းတွေဖြစ်တယ်။ အဲ့ဒီကျောက်ဂူရဲ့ အဝကို ကျောက်ပြားနဲ့ လှိမ့်ပြီးတော့ ဖွင့်ပိတ်နိုင်တယ်။ အရှင်ယေရှုသင်္ချိုင်းကိုရောက်တဲ့အခါမှာတော့ "ကျောက်ဂူရဲ့ အဝကို လှိမ့်ဖွင့်လိုက်ပါ" လို့ ခိုင်းလိုက်တယ်။ ဒါပေမဲ့ မာသက "သူသေတာ လေးရက်ရှိပြီ။ အနံ့ဆိုးထွက်လိမ့်မယ်" ဆိုပြီးပြောတယ်။
အရှင်ယေရှုက "ငါ့ကို ယုံကြည်ရင် ဘုရားသခင်ရဲ့ဘုန်းတော်မြင်တွေ့ရမယ်လို့ ငါပြောခဲ့တယ်မဟုတ်လား’ ဆိုပြီးပြောလိုက်တယ်။ သူတို့ ထိုကျောက်ပြားကို လှိမ့်ပြီးတော့ဖွင့်လိုက်တယ်။
ဖွင့်ပြီးတဲ့အခါ အရှင်ယေရှုက ကောင်းကင်ကို မော့ကြည့်ပြီးတော့ " အဖ၊ ကျွန်တော့်ရဲ့ စကားကိုကြားတဲ့အတွက် ကျေးဇူးချီးမွမ်းပါတယ်။ အဖဟာ ကျွန်တော့်ရဲ့စကားကို အမြဲနားထောင်နေတာကို ကျွန်တော်သိတယ်။ အခုဒီအချိန်ဒီမှာရပ်နေတဲ့ လူတွေဟာ အဖဟာ ကျွန်တော့်ကို စေလွတ်ခဲ့တာကို သိရှိအောင် ကျွန်တော်အခု ပြောလိုက်မယ် " လို့ပြောပြီး အရှင်ယေရှုက " လာဇရု ထွက်လာခဲ့ " လို့ခေါ်လိုက်တယ်။
အဲ့ဒီအချိန်မှာ လာဇရု ထွက်လာခဲ့တယ်။ အလောင်းကို ပတ်ရစ်ထားတဲ့ အဝတ်နဲ့ သူဟာထွက်လာခဲ့တယ်။ အရှင်ယေရှုက လာဇရုကိုယ်ပေါ်က အဝတ်တွေကို ဖြည်ခိုင်းလိုက်တယ်။ ဒီအဖြစ်အပျက်ကို မြင်ကြတဲ့ယုဒလူမျိုးတွေဟာ အရှင်ယေရှုကို ယုံကြည်လာကြတယ်။
ယုဒဘာသာရေးခေါင်းဆောင်တွေကတော့ အဲ့လိုဖြစ်တာကို မနာလိုဖြစ်ကြတယ်။ သူတို့ အတူတကွစုရုံးကြပြီးတော့ အရှင်ယေရှုနဲ့ လာဇရုကိုဘယ်လိုသတ်နိုင်မလဲ ဆိုပြီးအကြံထုတ်ကြတယ်။
အခြေပြုကျမ်းညွှန်း - ယောဟန် ၁၁: ၁- ၄၆