Ní ngúndeku kuéchi núú ñùyíú

Te Adán ndɨhɨ ñadɨhɨ ta Eva ío vǎha kúú ini-yu ndekuyu nuu ió vihi tnuvǐdí nani Eden nuu ní taxi ndeku ñaha Yá Ndiòxí kundekuyu. Te ñɨndɨ yu ndeku-yu, te natuu ní xoo kukahaⁿ núú-yu, te dukaⁿ chi ña tuu xini-yu na kúú ɨɨⁿ kuechi. Te ío vǎha kúú ini-yu xikacuuyu xɨtɨ tnuvidiaⁿ te kahaⁿ ndɨhɨ-yu Yá Ndiòxí.

Diko xɨtɨ tnuvidiaⁿ xikaⁿ kúú ɨɨⁿ koo ñatuun vǎha te kɨtɨaⁿ ní xikaⁿ tnuhu.dɨ nuu ñadɨhɨaⁿ: "¿Ndáá sá Yá Ndiòxí ní kchígá sa va kúú kaxi-ndo savidi kúúⁿ nchàa tnuvidiañá?"

Te ní xáhaⁿ ñadɨhɨaⁿ: "Yá Ndiòxí ní kachi-gá sa kúú kaxi-ndɨ nchàa savidi kúúⁿ nchàa tnuvǐdí ió iha, diko savidi kúúⁿ ɨɨⁿ tnuvǐdí nútnɨɨ kuádava nchàa davaga tnuvǐdí, va kúú tnɨɨ-ndɨ savidixi, te ní va kúú kaxi-ndɨ, chi ní kachi Yá Ndiòxí sa nuu na tnɨɨ-ndɨ te kaxi-ndɨ, te kúú-ndɨ". Duha ní kachi-gá.

Te kooaⁿ ní kahu inidɨ ní xahaⁿ-dɨ xii ñadɨhɨáⁿ: "Ña ndaa sa kuú-ndó, chi nuu na kaxi-ndo savidiaⁿ Te Yá Ndiòxí sa nahaga sa nuu dukaⁿ na kadando te ɨɨⁿ na kúú-ndo ndɨhɨ-gá, xíǎⁿ nuu ña tuu kuini-gá sa kaxi-ndo Savidiaⁿ". Duha ní xahaⁿ kooaⁿ xi ñadɨhɨaⁿ

Te ñadɨhɨaⁿ ní tnɨɨ-xi ɨɨⁿ savidiaⁿ ní xexi-xi, te ní kutnuni sá ìó vǎha xexi. Te dukaⁿ ní kidexi chi ní sandaa inixi tnúhu ní xahaⁿ kooaⁿ, chi ní sani inixi sa kuehega sa kutuuni inixi, te ní sahaxi luha xi te Adán nixexi.de.

Te oreni kutnuni iniyu sa ña tuu ní kídé vaha-yu nuu YáNdiòxí, te tnaha ní kutnuni ini-yu sa ñɨndɨɨ-yu. Te ní nduku-yu ndaha vixi keheⁿ ní dadahu-yu meeyu.

Te dukaⁿ te sakua dɨuni nduuaⁿ niteku doho-yu kahaⁿ Yá Ndiòxí, xɨtɨ tnuvidiaⁿ vexi-gá nanduku ñaha-gá xiiiyu. Te ní ngɨvaha-yuxɨtɨ nchàa tnuvidiaⁿ, te Yá Ndiòxí ní kahaⁿ dɨu-gá te Adán te kachi-gá: "Adán, ndèé ndeku-h-kachi-gá xahaⁿ-gá." Te ní kahaⁿ-de, te xahaⁿ-de xiiga: "Ní teku doho-i ta kahaⁿ-n vexi xɨtɨ tnuvǐdí nundu ku ñaha-n te ní yuhu-i ní ngɨvaha-i, chi ñɨndɨɨ-i: "Kachi-de xahaⁿ-de."

Te Yá Ndiòxí ní xikaⁿ tnuhu-gá nuu te Adán, te xahaⁿ-gá: "¿Nasa ní kúú ní kutnuni ini.n sa ñɨndɨɨ-n? ¿Na kuenda ní xexi-n savidi tnuvǐdí sa ní kachi sa va kúú kaxi-n?" Kachi-gá xahaⁿ-gá. Te ní xahaⁿ te Adán xiiga: "Na dɨhɨ ní kachi-n kúú nadɨh_-i ní taxixi savidi kúúⁿ yutuu vidi ní kachi-n sa va kúú kaxi-ndɨ ní xexi." Kachide xahaⁿ-de. Te Yá Ndiòxí ní xikaⁿ tnuhu-gá nuu ñadɨhɨ-aⁿ, te xahaⁿ-gá: "¿Na kuenda dukaⁿ ní kide-n?" Kachi-ha xahaⁿ-gá. Te ní xahaⁿ ñadɨhɨaⁿ xiiga: "Kooaⁿ ní dandahu ñaha-dɨ xii, nuu xíǎⁿ ní xexii-i." Kachi xi xahaⁿ-xi.

Te Yá Ndiòxí ní xahaⁿga xi kooaⁿ: ¡Ña tuu sá vǎha ní kide-n, te neni vitna te ndoho tnaha-n kaka kuita ñuhu-n meen nuu ñuhu nɨ kaa nɨ kɨhɨⁿ kundeku-n ñuyíúa. Te yoho ndɨhɨ ñadɨhɨa va kúú kini tnaha-ndo, te ni kue dehe-n va kúú kini tnahagueɨ ndɨhɨ kue dehe-xi. Te yoho danihi kuehe-n saha ɨɨⁿ dehe-xi, te dehe-xi danihi kuehe-guexi dɨkɨ-n." Duha ni xahaⁿ-gá xii kooaⁿ.

Te Yá Ndiòxí ní xahaⁿ-gá xii ñadɨhɨaⁿ: "Te yoho ndoho tnaha-n kaku dehe-n te taxi tnuni ñaha yɨɨn, te kun ini-n-de." Duha ní xahaⁿ-gá xii ñadɨhɨaⁿ.

Te Yá Ndiòxí ní xahaⁿ-gá xii te Adán: "Yoho ni sandaa ini-n tnúhu ní kahaⁿ ñadɨhɨ-n, te ni xexi-n savidi ní taxixi, sa ni kachi.isa va kúú kaxi-n, te vitna ndoho tnaha-n kada chiuⁿ-n nuu ñuhu kuenda kúú sa koho sa kaxi-n, te dukaⁿni ndoho tnaha-n ndèé sa nduu kúú-n nduu-n ñuhu yaka." Duha ní xahaⁿ-gá xii te Adán. Te tee Adán ní dananide nadɨhɨ.de Eva, te tnuhua keexi. "Dadora de vida" chi saa nduu kuuxí nana nchoa ndɨtuhu ñayiu ngundeku ñuyíú.

Te Yá Ndiòxí ní kaduha-gá doo ñɨɨ kɨtɨ ìó yuku ní xihuu-yu. Duka te Yá Ndiòxí ní kachi-gá: "Te sata ní kutnuni ini-yu nakuaa nduu sá vǎha ndɨhɨ sa kuche, te va kundekuga-yu nu ìó viikaa nihnu tnuvǐdí, kuenda sa va kaxiga-yu, savidi kúúⁿ tnuvǐdí sa kandekaxi ini-yu nɨ kaa nɨ kɨhɨⁿ." Duha ní kachi-gá. Te Yá Ndiòxí ní taxindekuga Espíritu xinu kuechi Nuuga kuenda kundee-xi nuu kaa tnuvidiaⁿ kuenda sa va yooga kɨhu kaxi savidi kúúⁿ tnuvǐdí sa kandekaxi ini ñayiu nɨ kaa nɨ kɨhɨⁿ.

Tnúhu ndèé sanaha ndèé nuu tutu tnúhu Yá Ndiòxí Génesis 3