Yá Ndiòxí ní ndàtnúhu ndáá-gá ndɨhɨ té Abrán nàkuáa kada-gá sá kúúxi-dě núú kuàháⁿ núú věxi

Te ní xika kuehe kuia sa ní ndaa ndute ñuyíú, te ní nakaya kuehe vihi ñayia nuu ñuyíú, te nchàa .yu ɨɨⁿ ní tnúhu kahaⁿ-yu. Te na tuu ní kide-yu na kuaa ní xahaⁿ Yá Ndiòxí kada-yu sa kutenuu-yu nuu ñuyíú, chi no xindeku kahnuniyu. Te nuu ní ngoo-yua nani Sinar te ní kuuxí ɨɨⁿ nuu kahnu.

Te ìó kídé ninuyu meeyu, te na tuu tnahii ndaku ini-yu nakuaa ní kahaⁿ Yá Ndiòxí kada-yu. Te ní nguita-yu dakaa-yu ɨɨⁿ vehe dukuⁿ vihi, te ní sani ini-yu sa veheaⁿ nani ndeexi ndèé audɨu. Te Yá Ndiòxí ndehe-gá sa kúú ɨɨⁿ nuu-yu kídé chiuⁿ-yu, diko tnúhu kide-yu nchàa sa ñatuu vǎha.

Te sa dukaⁿ kide-yu nuu xíǎⁿ ní dama Yá Ndiòxí tnúhu-yu ndɨ dɨɨⁿ ndɨ dɨɨⁿ na tnúhu ni kahaⁿ-yu, te ña tuu ní ndakugayu teku tnuni tnaha-ya. Te davaⁿaⁿ ní nadama dɨu nuuyu, ní dananiyu "Babel" te tnuhuaⁿ keexi: "ní xita sa xini tnuni ñayiu."

Te xika kuehe vihi kuia te Yá Ndiòxí ní kahaⁿ-gá ndɨhɨ te Abran te ní xahaⁿ-gá xiiide: "Keen ñuu-n ndɨhɨ ñadɨhɨ-n ta Sarai ndɨhɨ nchàa kue ñayiu xinuu kuechi nuu-n, te kane-n nchàa sa ndeku ndɨhɨ-n. Te yuhu kandeka ñaha-i xiindo kɨhɨⁿ danehe ñaha-i nuu kúú nuu-ndo kundeku-ndo. Te yuhu kada-i sa ña tuu tnaha-i na kumani xiindo; te kayando, te kúú-ndo ɨɨⁿ ñuu kahnu vihi. Te kada-i sa ìó kúú kahnu-n dɨhɨ dɨu-n. Te nchàa ñayiu na kahaⁿ tahu ñaha xiindo, te yuhu kahaⁿ tahu-iyu. Te nchàa ñayiu na kahaⁿ uhu ñaha xiindo, te yuhu kahaⁿ uhu-i-yu. Te nchàa kue ñani tnaha-n na kundeku nuu ñuyíú ìó vǎha kundeku-yu sa kuenda yoho." Duha ní xahaⁿ Yá Ndiòxí xii te Abram.

Te tee Abran ní sandaa inide nchàa nakuaa ní xahaⁿ Yá Ndiòxí xiide, te. Ní keede ñuu nuu ndekude ndɨhɨ ñadɨhɨ-de ta Sarai, ndɨhɨ nchàa kue ñayiu xinu kuechi nuude, te nehe-de nchàa sa ndeku ndɨhɨ-de. Te ní xikayu kuahaⁿyu ñuu nuu ní xahaⁿ-gá ngoo-yo. Te ore ní kexio-yu nuu kaa ñuhu Canaan.

Te ní xahaⁿ Yá Ndiòxí xii te Abram: "Kundehe nɨ kaa xiko iha, yuhu taxi-i nɨhii ñuhu ndehe-n kaa nɨ kaa xiko iha kúú kuendan, ndɨhɨ nchàa kue ñani tnaha-n kaku tuu nuu kuahaⁿ nuu vexi." Duha ní xahaⁿ Yá Ndiòxí xii te Abram.

Te dukaⁿ te xíǎⁿ ni ngundeku te Abran ndɨhɨ kue ñayiu ndɨhɨde. Te ni saa nduu ni xini tnaha te Abram ndɨhɨ te Melquisedec, teea kúú-de ɨɨⁿ dutu xinu kuechide nuu Dutu Ndiòxí. Te Melquisedc ni xikaⁿ tahu-de nuu Yá Ndiòxí kuenda tee Abram, te ni xahaⁿ-de- xii te Abram: "Yá Dutu Ndiòxí, yu kúú xitoho andɨu ndɨhɨ ñuyina ìó na chindee chituu ñaha-gá xiin." Duha ni xahaⁿ te Melquisedec xii te Abram. Te tee Abram nuu nchàa sa ndeku, ndɨhɨ-de te ni sahade te Melquisedec uxi xichi ɨɨⁿ kúu nuu sa ndeku ndɨhɨde.

Te xika kuehe kuia te ña yuu dehe te Abram ndɨhɨ ñadɨhɨ-de ta Sarai. Te Yá Ndiòxí ni xahaⁿ-gá xii te Abram sa dɨuga kada te koo ɨɨⁿ dehe-de ndɨhɨ ñadɨhɨ-de te kaya kuehe vihi ñani tnaha-yu, datna kuehe chòdíní ndèé andɨu. Te tee Abran ni sandaa ini-de tnúhu ni xahaⁿ Yá Ndiòxí, te ni kachi-gá sa te Abran kúú-de ɨɨⁿ tee ìó kídé ndaa, kuenda sa ni sandaa inide tnúhu ni xahaⁿ-gá xiide.

Dukaⁿ te Yá Ndiòxí ni kendoo ndaa-gá tnúhu ndɨhɨ te Abran, te ni xahaⁿ-gá: "Yuhu kada-i te koo ɨɨⁿ ndehe-n ndɨhɨ ñadɨhɨ-n ta Sarai. Te yuhu kuaha naha-i ñuhu Canaan kundeku nchàa ñani tnaha-yu na kundeku nuu kuahaⁿ nuu vexi.

Tnúhu ndèé sanaha ndèé nuu tutu tnúhu Yá Ndiòxí Génesis 11-15