Yá Ndiòxí ni kachi-gá sa kaku koo dehe ta Sarai

Te ni kúú vihi-gá uxi kuia sa ndeku te Abran ndɨhɨ ñadɨhɨ-de ta Sarai Canaan, te vata kooga ni ɨɨⁿ dehe-yu. Te ta Sarai ni xahaⁿ a xii yɨɨaⁿ te Abran: "Yá Ndiòxí ña tuu kuini-gá sa koo dehe-i kuenda sa sakuehe-i diko iha ndeku ta Agar xichi xinu kuechi nuu-i, te kúu tnandaha-n ndɨhɨ-xi kuenda koo ɨɨⁿ dehe-ndo. Te dehe-xíǎⁿ kúú-de dehe-i." Duha nixahaⁿ ta Sarai xii yɨɨ.xi te Abran.

Te tee Abran ni tnandaha-de ndɨhɨ ta Agar, te nikaku ɨɨⁿ dehe tee-xi, te ni danani ñaha tata-de te Abran "Ismael". Te sata ni xika nduu sa ni kaku dehe ta Agar, te ta Sarai ni ngooⁿ ni kúú kuiñu-aⁿ ta Agar. Te ndeku te Ismael uxuni kuiade kutnaha ni xahaⁿ Yá Ndiòxí xii te Abran:

"Yuhu kúú-i Ndiòxí ndisa, te ndaku-i kide-i nchàa ndɨ tuhu sá vǎha, te vitna na ndatnuhu ndaa-o sa kuuxi-n nuu kuaha nuu vexi." Kachí-ga xahaⁿ-gá xiide. Te sata dukaⁿ ni xahaⁿ-gá xiide te ni nguɨñɨ xɨtɨ-de, te ni xahaⁿ tukuga xiide: "Yoho ìó kunuun chi kuun tata kue ñayiutɨtnɨ nacioⁿ te meen ndɨhɨ nchàa kue ñanitnaha-n taxi-i ñuhu Canaa-n kundeku-ndo, te yuhu kuu-i Ndiòxí-yu nɨ kaa nɨ kɨhɨⁿ. Te taxi ndeku-n tnuni ñɨɨ nchàa landu, ndɨhɨ nɨɨ nchàa ñani-tnaha-n.

Te ñadɨhɨ-n ta Sarai kaku ɨɨⁿ dehe-aⁿ, te danani-n-de Isaac, te tee-aⁿ ndatnuhu ndaa-i ndɨhɨ de nakuaɨ kadaxi kundekude nuu kuahaⁿ nuu vexi, te ìó kuehe nani tnaha-de kaya. Te tnaha te Ismael kada-i sa tnaha-de ìó kuehe ñani tnaha-de kaya." Duha ni xahaⁿ Yá Ndiòxí xii te Abran. Te davaⁿ Yá Ndiòxí ni damaga dɨu te Abran, ni danani ñaha-gá Abraham, te tnuhua keexi: "Tee kúú nani tnaha kuehe ñayiu." Te tnaha ni nadama Yá Ndiòxí dɨu ta Sarai ni nananixi Sara, tnuhua keexi "princesa".

Te davaⁿ ni taxi ndeku te Abraham tnuni ñɨɨ nchàa landu tee. Te ndeku te Abraham ɨɨⁿ siendu kuia.de, te ta Sara ndekuaⁿ kumi diko uxi. kuiaⁿ, te ni kaku deheaⁿ ndɨhɨ te Abraham, te ni danani ñahaxi Isaac, ni kidexi nakuaa ni kahaⁿ Yá Ndiòxí.

Te kúú kuechite Isaac-cutnaha ni xito ndèé ñaha Yá Ndiòxí xii te Abraham te nuu ndisa sa sandaa ini ñaha-de xiiga, te ni xahaⁿ-gá xiide: "Ió kúú ini-n dehe-n te Isaac, diko kuini-i kɨhɨ-n ndɨhɨ-de yuku Moria, te yakaⁿ kahniɨn-de kuenda nuu tahu-i-de." Kachi-gá xahaⁿ-gá. Te tee Abraham ni sandaa mi-de nakuaa ni xahaⁿ-gá xiide, te ni kidetuha.de nchàa sa nandɨhɨ-de.

Te mi xikade kuahaⁿ de ndɨhɨ dehe-de te Isaac yuku Moria, te ichi ñuhuguede kuahaⁿ-guede ni xikaⁿ tnúhu te Isaac nuu tatade te xahaⁿ-de: "Na kúú sa kuaha-o Yá Ndiòxí nduu tahu-gá te ña tuu tnahi na nehe-o vexi, ni ɨɨⁿ mbeñatuu ni kandeka-o-dɨ kixi." Kachi-de xahaⁿ-de. Te ni xaha tata-de te Abraham, xii dehe-de te Isaac: "Mee Yá Ndiòxí taxi-gá sa nduu tahu-gá." Kachi.de xahaⁿ-de.

Te sata ni sa-guede nuu sahni-guede kɨtɨ nduu tahu Yá Ndiòxí, te tee Abraham ni dakutude dehe te Isaac, te ni sakaⁿ ndodo ñaha-de nuu nduku, te ni keheⁿ-de yuchi sa kahnide dehe-de nduu tahu ñaha Yá Ndiòxí ni kúú, te ni tekahaⁿ Yá Ndiòxí, te ni xahaⁿ-gá xii te Abraham: "Kundetu, va kahni-n dehe-n, vitna ni kutnuni ini-i sa ndisa sandaa ini ñaha-n xii-i." Kachi-gá xahaⁿ-gá.

Te yatni xíǎⁿ ni ndakoto te Abraham ɨɨⁿ mbee yɨɨ yɨnenu dɨkɨ-dɨ ɨɨⁿ yutnu kuui nutuɨɨ yatni xíǎⁿ. Mee Yá Ndiòxí dukaⁿ ni kídé tuha-gá kɨtɨaⁿ kuenda sa va kahni te Abraham dehe-de te Isaac. Te ìó vǎha ni kúú ini te Abraham ni sahni-de mbee yɨɨaⁿ ni nduu tahu Yá Ndiòxí.

Te Yá Ndiòxí ni xahaⁿ-gá xii te Abraham: "Yoho chi kuei ɨɨⁿ dini debe-n ndeku, te nɨ yuhu nɨ ini-n taxi-n-de nduu tahu-i-de ni kúú, te vitna na kachi tnúhu ndaa-i xiin sá v kakaⁿ tahu ñaha-i xiin. Te kada-i sa kaya kuehe vihi kue ñani tnah-n, te vaigayu kaya sa kuxi chòdíní, te dukaⁿ kada-i, chi ìó sandaa ini ñaha-n xii-i. Te nchàa kue ñayiu kuuxí sá vǎha, xiiyu sa kuenda nchàa nanitnan.

Tnúhu ndèé sanaha ndèé nuu tutu tnúhu Yá Ndiòxí Génesis 16-22