Ya Ndioxi ni kahaⁿ-ga ndɨhɨ ayiu Israel nakuaa kunde ku-yu ndɨhɨ-ga.
Te sata ni dayaha ya Ndioxi ñayiu Israel mar tɨkuehe, te ni tɨɨ-yu ichi kuaha-yu, ndeka ñaha ya Ndioxi ni sáá nde yatni yuku nani Sinaí. Dɨuni yuku-a kuuxi nuu ni xini te Moisés tnutau nchikuⁿ ñuchu. Te kae ñayiu Israel ni dakaa-yu vahe doo yadi saha yuku Sinaí.
Te ya Ndioxi ni xahaⁿ-ga xii te Moisés nakuaa kuñaha-de xii ñayiu Israel, te ore ni nasaa-de nuu-yu, te nixchaⁿ-deⁿ "Duhaha ni kachi ya Ndioxi kachi tnuhu-i xiindo: te nuu ndioho kɨndaa ini ñaha-ndo, te kada-ndo ndiaa nakuaa na kahaⁿ-i, dukaⁿ te kundo ñayiu ñuu-i te kɨhɨ ndaha ñaha-i xiindo te koto ñaha-i xindo."
Te nuu uní nduu sa dukaa ni xahaⁿ te Moisés xii ñayiu Israel nakuaa ni xahaⁿ ya Ndioxi, te ni kexio viko nidadahuxi nɨhii yuku Sinaí, te ña ni kutuuni tnahiga, te ni kahaⁿ ñuhu te ni kene ñúhmá, te ni teku nihini kahaⁿ ɨɨⁿ kutu-te tee Moisés ni saa tuku-de yuku-Sinaí ni kahaⁿ ndɨhɨ tuku-de ya Ndioxi te ni xahaⁿ-ga xiide.
Kuñaha-n xii ñayiu Israel sa: yuhu kuu-i Ndioxi ya ni ndeñuhu ñaha xiinda nacioⁿ Egiptu nuu ío ni xoo ndoho-ndo, (1) te va kada kahnundo ni ɨɨⁿ nohaa sa kachi-yu kuu ndioxi, yuhuni kada kahnundo chi ɨɨⁿ diini yuhu kuu-i Ndioxi ndisa".
(2) Va kaduha-ndo ni ɨɨⁿ sa danani-ndo kuu sandu-ndo, te ni va chihi ñuhu-ndu te nuu na kɨndaa ini-ndo meeni yuhu kada kahnu-ndo te io vahu kundeku-ndu ndɨhɨ nchaa lan du-ndo. (3) Va kaku nehe-ndo ya Ndioxi diko ni dukaⁿ chi ñatuu nduu vahaxi. (4) Iñu ndua kada chiuⁿ-ndo te nduu usa ndeta tu-ndo, chi yuhu iñu nduu ni kide chiñ-i ni kaduha-i ndiaa sa io ñuyiu, tenduu usa ni ndetutu-i, xiaⁿ nuu dukaⁿ kada-ndo tnaha-ndo, nduu usa va kada chiuⁿ-ndo, nduu-aⁿ kanehe iindo te chihi ñuhu ñaha-ndo xii.
(5) Kanehe-ndo sa yɨhɨ ñuhu ñuu ta ta-ndo ndɨhɨ nuu nana-ndo, te kuuxi sa vaha xiindo kundeku-ndo ñuyiu. (6) VA kahni-ndo tnaha náyiu-ndo. (7) Va kahaⁿ ndɨhɨ-ndo ñadɨhɨ te nuu ñadɨu ñadɨhɨ-ndo kuu-yu te ni ñadɨhɨ va kahaⁿ ndɨhɨ-aⁿ tee te ñuu ñadɨu yɨɨ-aⁿ kuu-de. (8) Vá dúhú-ndó. (9) Va dakuaha ndehe-ndo, va kahu ini-ndo ɨɨⁿ sa kahaⁿ-ndo. (10) Va xiho-ndo ñadɨhɨ tnaha tee-ndo, te ni ñadɨhɨ va xiho-aⁿ yɨɨ tnaha dɨhɨ-aⁿ, ni va xiho-ndo vehe-yu te ni sa ndeku ndɨhɨ-yu vehe-yu.
Te ya Ndioxi ni chido tnuni-ga ndɨ uxi ndu dua nuu uu tnaha yuu te ni sañaha-ga xi tée Moisés te ío ga tɨtnɨ tnuhu ni kahaⁿ ya Ndioxi, tnuhu sa kahnu ichi ñaha xiiyu nakuaa kundeku-yu. Te nuu kɨndaa ini-yu kada-yu nchaa nukuaa nduu tnuhu kahaⁿ-ga. Te ni kachi-ga sa io chindee chi tuu ñaha-ga xiiyu te koto ñaha-ga ña tuu na tnaha-yu kundeku-yu. Te ya Ndioxi ni kachi-ga sa nuu va Tnuɨɨ-yu nchaa tnuhu ni kahaⁿ-ga, te dandoho ñaha-ga xiiyu.
Te ya Ndioxi ni xahaⁿ-ga xii ñayiu Israel nakuaa kunduu ɨɨⁿ vehe dakaa-yu chihi ñuhu ñaha-yu xiiga. Te vehe-aⁿ kuhuⁿ nehu xɨtɨxi ndɨhɨ doo yadi, te ɨɨⁿ diini dutu kunun-ga ni xoo kuu kɨhu-de nuu naa xɨtɨ vehe-aⁿ, ndaa sata doo takaa ñuhu nehu xɨtɨ vehe-aⁿ, xiaⁿ nixo kahaⁿ ndɨhɨ-tuu-de ya Ndioxi.
Te nde danikaa ñayiu Israel na kada saa ini-yu va kadayu tnuhu ni káháⁿ ya Ndioxi, te kanehe-yu ɨɨⁿ kɨtɨ kɨtɨⁿ nuu nataka-yu te yakaⁿ kuu-dɨ kahni ñaha ɨɨⁿ dutu nduu tuhu ñaha ya Ndioxi, Te kahmi-de kuñu-dɨ nuu naa, te sa kuenda niñɨ kɨtɨaⁿ, te dutuaⁿ ni xoo kahaⁿ ndahude nuu ya Ndioxi kuenda sa kada kahnu ini-ga nchaa sa ña tuu va ha kide-kue ñayiu Israel te dukaⁿ te ni xoo kada kahnu ini-ñaha-ga xiiyu. Ya Ndioxi ni kaxiⁿ-ga te Aarón ñani te Moisés, ndɨhɨ kue dihe te Aarón kuenda kuu-guede dutu kunu kuechi-guede nuu-ga.
Te nchaa ñayiu Israel ni kuu ɨɨⁿ nuu-yu sa kɨndaa iniyu kadayu nchaa nakuaa ni xaha ya Ndioxi xiiyu, sa ɨɨⁿ diini-ga kada kahnu ñaha-yu xiiga, dukuⁿ te kuu-yu ñayin ñuu-meega kɨhɨ ndaha ñaha-ga xiiyu. Te ña tuu vai nduu sa ni xahaⁿ-yu xii ya Ndioxi sa kada-yu nchaa na kuaa ni xahaⁿ-ga te ni kide-yu sa ña-tuu tau-yu kada-yu.
Te tee Moisés kuasaa-de yuku Sinaí kahaⁿ ndɨhɨ-de ya Ndioxi, te ni kuyaa-de tɨtnɨ nduu. Te xiaⁿ ña tuuga ni kundee ini ñayiu Israel kundetu ñaha-yu xiide. Te ni kidena-yu sa vexi ini moeyu. Te dukaⁿ te nehe-yu dihuⁿ kuaaⁿ, kuahaⁿ nun te Aarón te ni xahaⁿ-yu sa kaduha-de ɨɨⁿ sa kuu ndioxi-yu, te ni kaduha-de ɨɨⁿ sa naha chehlu.
Te ni kaduha-yu sa ni xexi-yu ni kide-yu viko ni kide kahnu-yu sa ni kachi-yu kuu ndioxi-yu. Te ya Ndioxi io ni kudeeⁿ-ga sadukaⁿ ni kideyu chini kuuxi ɨɨⁿ kuechi sa dukaⁿ ni kide-yu, te ni sani ini-ga danaa ñaha-ga xiiyu. Diko te Moisés ni kahaⁿ ndahu-de nuu ya Ndioxi sa va danaa ñaha-ga xiiyu, te ni te doho ñaha-ga xiide nuu ña tuu ni danaa ñaha-ga xiiyu.
Te ore ni nasaa te Moisés nuu-yu sa kuanuu-de yuku Sinaí ni sahaⁿ kahaⁿ ndɨhɨ-de ya Ndioxi te ni xini-de sa naha chehlu ni kaduha-yu, te io ni ku deeⁿ-de nuu-yu sa duka*ⁿ ni kaduha-yu sa da danani-yu ndioxi-yuaⁿ. Te ya Ndioxi ni chido tnu ni-ga nuu uu yuu uxi ndudu ii nehe-de kuanuu. Te sa dukaⁿ io ni kudeeⁿ-de nuu ni dakene-de ndɨ nduu yuu ndee ndudu iian ni tahu-de.
Sa ta dukaⁿ te ni keheⁿ-de sa naha chehlu ni kaduha-yu kachi-yu kuu ndioxi-yu-aⁿ, te ni dakachi-de ni nduu yuchi-xi te ni dakee-de xɨtɨ ndute, te ni sañahaⁿ-de ni xihi-yu. Te ya Ndioxi ni tendaha-ga ɨɨⁿ tnuhu ndoho sa kuxi-yu, te io vai-yu ni xihi.
Te te Moisés kuasaa tu ku-de yuku Sinaí, te ni kahaⁿ ndahu-de nuu ya Ndioxi sa na kada kahnu ini-ga ñayiu Israel kueⁿnda nchaa sa ña tuu kide vaha-yu, te dukaⁿ te ya Ndioxi ni kide kahnu ini naha-ga xiiyu. Te kuu nuni te Moisés, nehe-de ndɨ nduu yuu nuu ni na ngundee saa ndɨ uxi ndudu ii. Te dukaⁿ te ya Ndioxi ni xahaⁿ-ga ndee-yu yuku Sinaí kɨhɨⁿ-yu kundeku-yu ñuu nani Canaan.
Éxodo 19-34