19. Los Profetas. Kue tee ni xoo kahaⁿ tnuhu Ya Ndioxi.

Te io ni kuu vai kuenda nchaa naknuaa ta kidexi kuenda kúe ñayiu Israel. Dukaⁿ te ni saa nduu ni tendaha Ya Ndioxi kue tee kahaⁿ yuhu-ga-kue teea ni xinani-guede (Profeta). Te ni xoo kundedoho-guede nchaa tnuhu ni xoo kuñaha Ya Ndioxi, dukaⁿ te ni xoo kahaⁿ-guede tnuhu-ga nuu kue nayiu Israel.

Tee Elías ni kuu-de ɨɨⁿ tee ni xoo kahaⁿ tuuhuga nu ñayiu ni xoo kada de nuuga kutnaha ni kumiu te Acab ni xɨhɨ ndaha-de ñayiu Israel. Teé Acab ni kuude ɨɨⁿ tee ña tuu ni kide vaha, chi ni sa nu ichi-de nayiu Israel ɨɨⁿ ichi ña tuu vaha chi ni xahaⁿ-de xiiyu sa chihi ñuhu-yu Bahal, ɨɨⁿ sa ni kachi-yu kuu ndioxi, te ñadɨu ndioxi kuuxi. Te tee Elías ni xa haⁿ-de xii te Acab: "Va kuuⁿ dau ni yuyu va ngoyo nuu xindeku ñayiu Israel, te nquitaxi dukaⁿ kadaxi te nkutaxi dukaⁿ kadaxi ndee nduu na kachi yuhu" - duha ni xahaⁿ te Elías xii te Acab. Te tee Acab ni kudeeⁿ vihi-de sa dukaⁿ ni xahaⁿ te Elías xiide.

Te Ya Ndioxi ni xahaⁿ-ga xii te Elías sa kɨhɨⁿ-de ɨɨⁿ xɨtɨ yuu nuu ñataa ñayiu ndeku, yakaⁿ kɨhɨⁿ vaha-de nuu te Acab: tee yɨhɨ ndaha ñaha xii ñayiu Israel, chi kuini-de kahni-de te Elías. Te Ya Ndioxi ni xito-ga te Elías nuu ni xɨhɨ vaha-de, chi saknuaa, datnee ni xoo tendaha-ga tɨkaka ni xoo kanehe-dɨ sa kaxi-de ni xoo kɨhɨ yuu nuu ni xɨhɨ vaha-deaⁿ. Te yuuaⁿ ni xuhuⁿ ndute ni xihi-de. Te ni xika nduu te ni yichi ndute yuu-aⁿ chi ña tuuga ni kuu dauⁿ. Te tee Acab ndɨhɨ ndiaa kue sandadu-de ni xɨhɨ-guede naudukuguede te Elías kuenda kahni ñaha-guede xiide, di ko ña tuu ni nanihi ñaha-guede. Te ni saa nduu te ni yichi ndute yuú nuu yɨ vaha-de, kuenda sa ña tuuga ni kuuⁿ dau.

Te Ya Ndioxí ní xahaⁿ-ga xii te Elías. Sa va kundeku-gáde yuuaⁿ, chi kee-de kɨhɨⁿde ɨɨⁿ ñuu kaa yatni nini ni Sarepta de Sidón; te ni xi ka-de kuahaⁿ-de ñuuaⁿ. Te ñuu-aⁿ ndeku ɨɨⁿ ñadɨhɨ ña tuuga yɨɨaⁿ, te ndekuaⁿ ndɨhɨ ɨɨⁿ dehe-aⁿ, te ñayiu-aⁿ luha liina sa kaxi-yu ndeku, ta ndɨhɨ kuahaⁿ, kuenda sa ñatunga dau kuuⁿ. Te vehe ñadɨhɨaⁿ ni kexio te Elías. Te io ni xitoyu te Elías, te Ya Ndioxi io ni xito ñaha-ga xíiyu ndɨhɨ te Elías. Chi sahaⁿ nuu ñuhu yuchi kuaha sa xexi-yu, ndɨhɨ acitiyn ña tuu tnahí ní ndɨhɨ nihnu. Ña tuu tnahi ni ndɨhɨ nihnu sa kaxiyu ndɨ nchaaga nduu ni xoo tnama. Te tɨtnɨ kuia ni xiude te Elías vehe ñadɨhɨaⁿ.

Te sata ni yaha uni kuia dava sa ña tuu ni kuuⁿ dau; te Ya Ndioxi ni xahaⁿ-ga xii te Elías: ii sa na nuhu-de nacioⁿ Israel te kahaⁿ ndɨhɨ de te Acab. Tee yɨhɨ ndaha ñaha xii ñayiu Israel, kuenda nuu kuita saa-ga dakuuⁿ-ga dau. Te ore ni xini ñaha te Acab xíí te Elías te ni xahaⁿ-de: "¡Na iha ndeku te datɨka nuu ñayiu!" Te tee Elías ni xahaⁿ de xii te Acab: "iyoho kuu-n tee datɨka nuun ñayiu ñadɨu yuhu, chi yoho kuu-ⁿ tee ni dañ. Ña tunga sandaa ini-n Ya Ndioxi ndisa, chi da sa ñadiu kuu ndioxi chihi ñuhu-n sa nani Baal. Kuahaⁿ kuñaha nchaa nayiu Israel na kixi-yu yuku nani Carmelu"- daha ni xahaⁿ de xii te Acab.

Te nchaa ndɨtuhu ñayiu Israel ni sahaⁿ-yu yuku Carmelu, te tnaha ndɨ kúmí siendu dava. Kue tee kuundɨhɨ sa daniani-yu ndioxi-yu nani Baal. Te tee Elías ni xahaⁿ de xii nchaa ñayiu ñuu Israel: "¿Te na ndee ama na dama ini-ndo? Te nuu saní ini-ndo sa Ya Ndioxi kuu-ga Ndioxi ndisa, te Yaaⁿ kanchikuⁿ nihnu-ndo te kunu kuechi-ndo nuu-ga. A di sani ini-ndo sa Baal sa kachi-ndo kuu ndioxi-ndo kuuxi ndioxi ndisa. Te xiaⁿ chi kunu kuechi nuu-xi" -duha ni xahaⁿ te Elías xiíyu.

Dukaⁿ te tee Elías ni xahaⁿ-de xii nchaa kue tee kuu ndɨhɨ sakachi-yu kuu ndioxi-yu nani Baal: Nchoho kahni-ndo ɨɨⁿ dɨkutu, te da kachi-ndo kuñu-dɨ kuenda nduu tahn ndioxi-ndo, diko va taxi-nde ku ndo nuu ñuhu, te na yaha dukaⁿ ka da-ndo sa kuuxi ndioxi-ndo. Te datnuni tnaha-i dukaⁿ kada-i sa kuuxí Ya Ndioxi ya kuu Ndioxi ndisa. Te Ndioxi na kada kuikuⁿ ñuhu kuñu-aⁿ, te ya kuu-ga Ndioxi ndisa Ndioxi kuɨtɨ" - duha ni xahaⁿ te Elías xii kuetee xinukuechi nuu Baal.

Te kue tee kuu dutu xiuukuechi nuu Baal ni sahni-guede ɨɨⁿ dɨkutu te ni dakachi-guede kuñu-dɨ diko ña tuu ni taxi nde ku-guede nuu nuu ñuhú. Te sata dukukaⁿ te ni ngüita nchaa kue tee xinukuechi nuu Baal xikaⁿ tahu-guede nuuxi sa na te ñuhu-xi kuñu-aⁿ, te xahaⁿ-guede: -"yoho Baal te doho ñaha xiindɨ". -duha ni xahaⁿ guede xii ndioxi-guede. Te vihi-ga kuadava nduu ni kahaⁿ-guede ni kanasaguede doho ndioxi-guede, te ni danihi kuéhe-guede mee-guede ndɨhɨ yuchi, kuenda kuini-guede te doho ñaha ndioxi-guede, diko ña tuu vedana na ni kidexi.Te sata ni yaha dukaⁿ ni kana sayu doho ndioxi-yu.

Te dɨuni sakua ndunaⁿ. Te Elías ni kide tuha-de sa nduu tahu Ya Ndioxi ya kuu Ndioxi ndisa, te dɨuni kuñu ndɨkute ní dakachi-de nduu tahu-ga. Dukaⁿ te ni kana-de nchaa ñayiu. Dayatni ñaha-yu xiide, te dukaⁿ te ni xahaⁿ-de xii ñayiu ni chu ku-yu uxuu kɨdɨ nahnu ndute nuu sa nduu tahu Ya Ndioxi, kuei nuu nduku, ndiaa ni chu ku-yu ndute, ni na kakana ndute ndee nuu ñuhu.

Dukaⁿ te ni nguita te Elías ni xikaⁿ tahu-de nuu Ya Ndioxi te xahaⁿ de xííga: - Yoho Ya Ndioxi ya kuu Ndioxi ndisa, yoho Ndioxi ndii Abraham. Ndioxi ndii Isaac, Ndioxi ndii Jacob. Yoho Ya Ndioxi kahaⁿ ndahu-i nuu-n sa kadan sa xikaⁿ tulu-i nuun, kuenda na ndixi tuu ini ñayiua, sa yoho kuu-n Ndioxi ñayiu Israel, te yuhu kuu-i tee xinu kuechi nuu-n. Te kahaⁿ ndahu-i nuu-n sa kada-n sa xikaⁿ-i nuun kuenda na kini ñayiu-a sa yoho kuu-n Ndioxi ndisa, Ndioxi kuɨtɨ -duha ni kahaⁿ ndahute Elías nuu-ga.

Te orenia ni da kuuⁿ Ya Ndioxi ñuhu ndee andɨu ni xikuⁿ ñuhu sa nduu tahuga, te tnaha nchaa nduku te kueí ndee nchaa yuu yu kuaⁿ ni kayu, te tnahani ndee nchaa ñuhu yu kua ni kayu. Te ore ni xini nchaa nayiuaⁿ nakuaa ni kuu te ni ngüɨñɨ xɨtɨ-yu ndee ñuhu te ni kachí-yu: -Ya Ndioxi kuu-ga Ndioxi ndisa, Ya Ndioxi kuu-ga Nidioxi ndisa- duha ni kachi-yu.

Te tee Elías ní xahaⁿ-de xiiyu: -Va daña-ndo kaku ni ɨɨⁿ kue tee xinu kuechi nuu Baal duha ni xahaⁿ-de xiiyu. Te kue ñayina: ní tnɨɨ-yu nchaa kue tee xinu kuechi nuu Baal, te ndeka ñaha-yu kuahaⁿ ɨɨⁿ xichi nuu ni sahni-yu nchaa kue teeaⁿ.

Duka te tee Elías ni xahaⁿ-de xii te Acab tee yɨhɨ ndaha ñaha xii ñayiu Israel: -Kuanuhu ndɨhɨni xɨtɨ ñuú, chi tnavií sa kuuⁿ dau-duha ni xahaⁿ-te Elías xii te Acab. Te uuⁿ ni ni nataka viko andɨu te ni kuuⁿ dau nihi. Te ndee davaaⁿ ña tuuga ni xinduu yichi yuku, chi Ya Ndioxi ni na tendaha-ga dau. Te dukaⁿ ni kide Ya Ndioxi kuenda sa na kutnuni ini nchaa ñayiu sa dɨu-ga kuu-ga Ya Ndioxi ndisa, Ndioxi kuɨtɨ.

Te ndekuga te Elías te Ya Ndioxi ni kachi-ga sa tee Eliseu nukuɨñɨ-de nuu tee Elías kahaⁿ-de tnuhu-ga. Te Ya Ndioxi ni kide-ga sa tee Eliseu ni ndaku-de ni kide-de tɨtnɨ vihi nuu sa va yoo tnahi ndaku kada. Te ɨɨⁿ nuu sa va yoo tnahi ndaku kada Ya Ndioxi ni chindee-ga te tee Eliseu ni kide-de sa kuuxi ɨɨⁿ tee nani Naamán, te kuu-de ɨɨⁿ te taxitnuni ɨnga ñuu ɨnga ñuu, kue tee ña tuu kuu kini tnaha ndɨhɨ kue tee ñuú nuu ndeku tee Eliseu. Te tee Naamán tnaha-de ɨɨⁿ kuehe sa ña tuu tatnaxi, nani "kuehe sa datehyn nihuuxi yɨ kɨ kuñuo. Te teea ni nihi-de tnuhu sa te Eliseu kide tatna-de ñayiu tnaha kuehe sa ña tuu tatnaxi. Te tee Naamán ni kexio-de nuu ndeku te Eliseu te kahaⁿ ndaku-de nuu-de nuu va kundee ini-de kada tatna ñaha-de. Te tee Eliseu ni xahaⁿ-de sa kɨhɨⁿ de usa xit xɨtɨ ndute yute Jordán te dukaⁿ ni kide-de.

Diko dihnaga ni kudeeⁿ te Naamán nuu te Eliseu sa dukaⁿ ni xahaⁿ-de, te ña ni kuini-de kɨhɨⁿ-de, chi ni sani ini-de sa ña tuu nandɨhɨ tunhu ni xahaⁿ te Eliseu. Te sata dukaⁿ te kuee ni xinu ini-de te ni sahaⁿ-de ni kee-de usa xito xɨtɨ ndute yute Jordán, te nuu ndɨhɨna xito kuu usa ni nene-de xɨtɨ ndute, te orea ni kutnuni ini-de sa ni nduha vaha-de kuehe tnaha-de. Te dukaⁿ chi me Ya Ndioxi ni kide-ga ni nduha-de.

Te Ya Ndioxi ni taxi ndeku-ga tɨtnɨ vihi-ga kue tee kahaⁿ tuuhu-ga ni xoo kahaⁿ-guede yuhu-ga. Te nchaa kue teeaⁿ ni xoo kuñaha-guede xii nchaa ñayiu sa va kɨndaaga ini-yu nchaa sa danani-yu ndioxi ni kaduha kue tee ñuyiu. Te nchaayu na kada vaha-yu kundeku-yu te na kuu nadahu ini-yu tnaha ñayiu-yu. Te kue tee kahaⁿ tnuhu Ya Ndioxi kue tee kahaⁿ yuhu-ga ni xahaⁿ-guede xii nchaa ñayiu ñuu sa nuu va daña-yu sa kide-yu sa ña tuu vaha, te ni va ndixi tuu ini-yu kɨndaa ini-yu Ya Ndioxi, te meega kachi-ga sa ndeku kuechi-yu, te dan doho ñaha-ga xiiyu.

Te vai xito ña tu ni kuini ñayiu kɨndaa ini-yu Ya Ndioxi. Te ni xoo kuñaha uhu-yu xii kue tee kahaⁿ tnuhu Ya Ndioxi, te dava-guede ni sahni ñaha-yu xiiguede. ɨɨⁿ xito tee kahaⁿ tnuhu Ya Ndioxi nani Jeremías ni chihi ñaha-guede xiide ɨɨⁿ xɨtɨ doko yichi, kuenda ni sani ini-guede sa yakaⁿ kuu-de. Te tee Jeremías ni kee naa saha-de xɨtɨ ndehyu ñunu xɨtɨ dokoaⁿ, diko tee kunuu yɨhɨ ndaha ñayiu ni kuu ndahu ini ñaha-de, te ni xahaⁿ-de xii kue tee xinu kuechi nuu-de ni sahaⁿ-guede ni natava-guede te Jeremías xɨtɨ dokoaⁿ, kuenda sa va kuu-de.

Te kue tee kahaⁿ tnuhu Ya Ndioxi ña tuu ni daña ndee-guede ni xoo kahaⁿ-ni-guede tnuhu Ya Ndioxi kuei ío ni xoo kuu uhu ini ñaha ñayiu xiiguede. Te nixoo kuñaha-guede xiiyu sa Ya Ndioxi danaa ñaha-ga xiiyu te nuu va ndixi kuechi ini-yu sa ña tuu kide vaha-yu ndeku-yu. Te tnaha ni xoo dandaku ini ñaha-guede xiiyu nakuaa ni kahaⁿ Ya Ndioxi sa saa nduu kixi ya kuu Mesías tendaha ñaha Ya Ndioxi kixi.

1 de Reyes 16-18; 2 de Reyes 5; Jeremías 38.