Ní Ndaa ndute ñuyíú
Te ní xika kuehe kuia, te ìó ní kaya ñayiu nuu ñuyíú, te nchàa-yu ìó ní kúú kuihna ini-yu. Te Yá Ndiòxí ndehe-gá sa nchàa nayio xindeku ñuyíú ìó ni kúú kuihna ini-yu, te ní nd.ixi kuechi ini-gá te ní kachi-gá sa danaa-gá nchandɨ tuhu ñayiu ndeku nuu ñuyíú, te dakuuⁿ-gá dau nihi danaa ñaha-gá xiiyu.
Te davaaⁿ ní xinde ɨɨⁿ tee ní xinani-de Noe, teaⁿ ìó ní kudɨ-de nuu-gá. Te Yá Ndiòxí ní xahaⁿ-gá xii te Noe sa da kúúⁿ-gá dau.tendaa ndute ñuyíú.Te Yá Ndiòxí ní xahaⁿga xiide sa kaduha-de ɨɨⁿ barcu kahnu.
Te kanehexi sa kani ɨɨⁿ siendu udiko metru sa kani (140 mts), te oko uni metru kanehe-xi sa keheⁿ, te uxuni metru yodo uhuⁿ siendu cm. sa dakuⁿ. Te Yá Ndiòxí ní xahaⁿ-gá xii te Noé nakuaa kunduu barcu, te kaduha-de meeni ndɨhɨ yutna, te kuhuⁿ nehu xɨtɨxi, te kodo tnaha uni vehe, te ɨɨⁿ ventanaxi. Te xɨtɨ barcuaⁿ kee te nee, ndɨ kue nani tnaha-de kuenda kaku-yu, te tnaha nchàa nuu kɨtɨ ìó ñuyíú keedɨ xɨtɨ barcuaⁿ kuenda kaku-guede ore na ndaa ndute ñuyíú.
Te tee Noe ní sandaa inide cadade nchàa nakuaa ní xahaⁿ Yá Ndiòxí, te meede ndɨhɨ uni dehe-de ní kaduha-guede ɨɨⁿ barcu kahnu nakuaa ní xahaⁿ Yá Ndiòxí. Te tɨtnɨ kuia ní xindekuu.guede te datnuni ní xinu. Te te Noe ní dateku-tnuhu-de kue ñayiu, te ní xahaⁿ de sá Yá Ndiòxí dakuuⁿ-gá dau nihi, te nachitu ndute ñuyíú, te ní xahaⁿ tukude sa na natuha-yu ichi Yá Ndiòxí kuenda kaku nihnuyu, diko ña tuu ní kuiniyu kɨndaa iniyu.
Nukaⁿ te ní xahaⁿ Yá Ndiòxí xii te Noé ndɨhɨ kue nani tnahade sa nduku-yu vai sa kaxi-yu ndɨhɨ sa kaxi ncha kɨtɨ kee xɨtɨ barcu. Te ore sa ní ndɨhɨ ní kidetuha-tu, te ní xahaⁿ Yá Ndiòxí xii te Noe: "Vitna ní saa nduu sa yoho ndɨhɨ ñadɨhɨ-n ndɨhɨ ndɨnuni dehe dukuⁿ-n ndɨhɨ ke ñadɨhɨ-guede keendo nchàa-ndo xɨtɨ barcu." Duha ní xahaⁿ-gá xii te Noe. Te nuu nchàa-yu xinu una tnaha-yu ní keeya barcu.
Te tee Noe ní ndu kude ɨɨⁿ kaa tayu nchàa nuu kɨtɨ ìó ñuyíú, kue kɨtɨ xika nuu ñuhu, ndɨhɨ kue kɨtɨ ndava, te ní chihi-deguedɨ xɨtɨ barcu, kuenda kakuguedɨ va kuuguedɨ ore na ndaa ndute ñuyíú. Te sata ní xinu kava nchàa-nacuaa ní xahaⁿ Yá Ndiòxí, te meega ní nakadɨ-gá yuyehe barcuaⁿ.
Dukaⁿ te ní nguitaxi, ní kúúⁿ dau nihi nduu niu ni kúuⁿ te udiko nduu, udiko niu dukaⁿ ní kúúⁿ dau, ní nachitu ndute ñuyíú, ní naa nchàa ndɨtuhu sá ìó ñuyíú, kuei nchàa tɨnduu dukuⁿ-gá ní dahu sa ní ndaa ndute.
Meena ñayiu ñuhu xɨtɨ barcu ní kakuyu ndɨhɨ nchàa kɨtɨ ní kee ndɨhɨ-yu xɨtɨxi.
Te sata ní nguɨñɨ dau te barcuaⁿ kandonaxi nun ndute. Te sata ní kúú uhuⁿ yóó sa ní nguɨñɨ dau, te barcuaⁿ xokuhuⁿ xi nuu ndute, te dukaⁿ te ní nguitaxi ni nuu ndute, te ndèé nuu uni yóo te ní natuu nchàa tɨnduu. Te barcuaⁿ ní nangaundoxi ɨɨⁿ nuu tɨnduu nani Ararat.
Te udikoga nduu ní xiudetu te Noe te datnuni ní tendahade ɨɨⁿ tɨkaka kuahaⁿ-dɨ kundehedɨte nuu sa ní yichi ndute, te kɨtɨaⁿ na tuu ní nihidɨ nuu ngoodɨ nuu ní nakuikodɨ.
Te sata ní yaha ɨɨⁿ uuga nduu te ní tendaha te Noe ɨɨⁿ loma kundehedɨ te nuu sa ní yichi ndute, diko ní nakuikodɨ chi ña tuu ní nihidɨ nuu ngoodɨ. Te nuu iñu nduu te ní tendaha tuku te Noe dɨuni loma kuenda kimid nuu sa ta yiga ndute, te kɨtɨaⁿ ní nasaadɨ nehedɨ ɨɨⁿ dite lihli olivu ní nasaa, xíǎⁿ ní kutnuni inide sa sata yichiga ndute kuahaⁿ.
Te xito kúú uni ní kúú tuku iñu nduu te ní tenda tu ku te Noe dɨuni Loma, te ña tuu ni nasaadɨ, chi ní nihi-dɨ nuu ní ngooddɨ, xíǎⁿ ní kutnuni ini te Noe sa sata yichiga ndute kuahaⁿ.
Te yóo no kúú sa ní tendaha te Noe Loma te ña tuu ní nasaadɨ, te ní xahaⁿ Yá Ndiòxí xiide: "Vitna te kenen xɨtɨ barcu nchàa-ndo, ndɨhɨ nchàa kɨtɨ nuhu xɨtɨ-xi, te na kutenuu-quedɨ ñuyíú te na dakaya tnaha-guedɨ." Duha ní xahaⁿ Yá Ndiòxí xii te Noe.
Te ní xahaⁿ tuku-gá xiide: "Nchoho kundekuni-udo ñuyíúa te nakayando te kutenuu-ndo nɨ hii ñuyíú kundeku-ndo." Duha ní xahaⁿ-gá xiide. Te sata dukaⁿ, te tee Noe ní kaduha-de ɨɨⁿ nuu naa, te xíǎⁿ ní sahnide ɨɨⁿ kaa nuu kɨtɨ sa kuuxí Yá Ndiòxí. Te ìó ní kuvaha ini Yá Ndiòxí sa dukaⁿ ní kidede ní sahni-de kue kɨtɨaⁿ sa kuuxi-gá.
Te ní xikaⁿ tuhu naha-gá xii te Noe ndɨhɨ nchàa kue dehe-de sá ìó na kuuxí sá vǎha xiiyu kundekuyu. Te Yá Ndiòxí ní kachi-gá sá ní ɨɨⁿ xitoga va dandaa-gá ndute ñuyíú danaa-gá ñayiu kuenda nchàa sa natuu vǎha kideyu.
Te ní taxi ndeku-gá ɨɨⁿ koo yanchi kuenda kutnuni ini-yu sa va kúúⁿ-gá dau nihi danaaxi sá ìó ñuyíú.
Tnúhu ndèé sanaha ndèé nuu tutu tnúhu Yá Ndiòxí Génesis 6-8