Yá Ndiòxí dákăku nihnu-gá té Chèé ndɨhɨ kue ñaní tnáhá-dĕ.
Te ní xika kuĕhé kuìá, te t'ée Jàcób ío ní sahnu-dé, te ní tendaha-dĕ déhe-dé té Chèé tée íogá kúú ìní-dé, kuáháⁿ-de yuku nŭú xĭndeku kue ñaní-dé xító-guèdé mbèé-guèdé kuáháⁿ ngoto ñaha-dĕ.
Diko kue ñaní-dé chi ñà túú kùu váha iñí ñáhá-guèdé xiidé kuèndá sá ĭogá kúú ìní ñáhá tătá-guèdé xiidé, ndɨhɨ kuèndá nàkuáa ní káháⁿ saní-dé sá săá nduu kùnúu-dé. Te òré ní kexìo té Chèé núú xĭndeku kue ñaní-dé, te ní chihi váha ñaha-guèdé, te dătnùní ní díkò ñàha-guedé,ni saaⁿ ñaha kuè tée xìka kuaaⁿ ñáyiu kìde chiuⁿ vehe.
Te kue ñaní té Chèé ní taunuú-guédé dóó kání nìhnu-dé, te ni sahni-guedé ɨɨⁿ mbèé te ní dákánùu-guedé nɨñɨ-dɨ dóó-dĕ sá nĭ taunuu-guedé-áⁿ, te nèhe-guedé kuánuhú núú tătá-guèdé kuèndá kiní-dé. Te òré ní xiní-dé te ní nàkiní-dé sá dɨú dŏó dĕhe-dé té Chèé kúúxí. Te ní ndɨhú víhí ìní-dé.
Te tée Jàcób ní sani iní-dé sá ɨɨⁿ kɨtɨ kuihna ní sahni ñaha xìi déhe-dé té Chèé. Te kue tée ní saaⁿ ñaha xìi té. Chèé ndéká ñàha-guedé xiidé kuáháⁿ ndéé ñuú káhnú nàni Egiptú, te ñuú-áⁿ ío kùnuu-xi, te kàa-xi ɨɨⁿ xio yúte nàni Niló. Te kue tée ní saaⁿ ñaha xìi té Chèé ní nadiko ñàha-guedé ní saaⁿ ñaha tée nàni Pontifár, ɨɨⁿ tée kuika ndèku nŭú tĕe tàxi tnuní nàcióⁿ Egiptú. Te ío ní kudɨu té Chèé ní xinu kuechi-dĕ núú tĕ Pòntifár, chi Yá Ndiŏxí ío chindee ñàha-gá xiidé.
Diko ñadɨhť té Pòntifár ní kuiní-aⁿ sá kăháⁿ ndɨhɨ ñaha tĕ Chèé ní kùu te ñà túú ní kuìní-dé, te ní xáhaⁿ-dĕ xiiaⁿ: "Và kúú kàda-o sá sání ìní-n, chi Yá Ndiòxí ñà túú kuìní-gá sá dúkáⁿ kàda-o."
Te ñaha-áⁿ nĭ kùdééⁿ-a sá ñà túú ní săha-dé tnúhu kada-dé sá sá saní ìníaⁿ, te òré ní ndexìo yɨɨ-aⁿ te ní dakuándèhde-aⁿ núú-dĕ, chi ní xáhaⁿ-a xìidé sá tĕ Chèé kuìní-dé káháⁿ ndɨhɨ ñaha-dĕ xiiaⁿ ni kùu, te ñà túú ní săhaⁿa tnúhu núú-dĕ. Te ní kùdééⁿ tĕ Pòntifár núú tĕ Chèé, te ní chihi ñaha-dĕ vehe kaá. Te tée Chèé dɨuni dukaⁿ ìo ní kudɨu-dé núú nchàa kue tée xìnu kuechi xɨtɨ vehe kaá, chi Yá Ndiòxí ìo ní chindee ñàha-gá xiidé.
Te sá ní kuu vìhigá úú kuíá yɨhɨ tĕ Chèé vehe kaá, te ñá túú kuĕchi-dé. Te ɨɨⁿ niú ní káháⁿ saní té Faràón úú xito, te ní ndúkú tnŭhu-dé núú kue tée túha kùtnuní iníxi kuèndá kuñaha-guedĕ xiidé nása kèexi nakuáa ní káháⁿ saní-dé, chi ío dàkani iní ñáháxí xìidé nàkuáa ndùu tnúhu ní káháⁿ saní-dé. Diko ni ɨɨⁿ kue tée túha-áⁿ ñà túú ní kùtnuní iní-guedé nása kèexi tnúhu ní káháⁿ saní té Faràón.
Te Yá Ndiòxí ní sáha-gá té Chèé sá xìní tnùni-dé, chi kùtnuní iní-de nàkuáa kèexi tnúhu kàháⁿ saní. Te yɨhɨ té Chèé vehe kaá te ní tendaha té Faràón ɨɨⁿ tée xìnu kuechi nŭú-dĕ ní sáháⁿ ngana-dé té Chèé, te òré ní kexìo-dé núú tĕ Faràón, te tée Faràón ní kani-dé kuèndú nákuáa ní káháⁿ saní-dé núú tĕ Chèé. Te tée Chèé ní xáhaⁿ-dĕ xii té Faràón sá kútnùní iní-dé nàkuáa kèexi tnúhu ní káháⁿ saní-dé, te ní xáhaⁿ-dĕ: “Yá Ndiòxí kada-gá sá ŭsá kuíá ío váha kuu itú, te usá kuíá kixi tnamá.”
Te tée Faràón ío ní kuñúhu-dé sá dúkáⁿ nĭ ndaku té Chèé ní xáhaⁿ-dĕ nàkuáa kèexi tnúhu ní káháⁿ saní-dé. Te dukaⁿ nĭ ndaku té Chèé ní kide-dé chi Yá Ndiòxí ndékú ndɨhɨ ñaha-gá xiidé. Te tée Faràón ní sáha chìuⁿ-dé té Chèé núú ío taxi tnùní-dé, chi ní kuu-dé segùndú té Faràón nàcióⁿ Egiptú.
Te tée Faràón ní xáhaⁿ-dĕ xii té Chèé: “Vitna te yòhó kada chìu-n, chi kɨhɨⁿ-n ndùku-n nchaa sà kúú kàxi-o kuu nchito-o ndɨhɨ ñáyiu, te datàká-n kùu vai vihi te kùndekunáxi ɨɨⁿnă xichi, te na sàá nduu kòo tnamá usá kuíá, te dàvá-áⁿ keñuhu-n dìko-n kuaaⁿ ñáyiu kaxí-yu. Te dukaⁿ nĭ kide té Chèé. Te sátá ni sàá tnamá te ní keñuhu-dé nchaa sá nĭ Taxúha-dé kuu nchito ñáyiu, te ní díkó-dĕ ní kehéⁿ-yu nchaá-yu kuènda sá vă kùú-yu dokó.
Te ña dɨúní nàcióⁿ Egiptú ní sàá tnamá, chi tnàhá ndeé nàcióⁿ Cànaán ní sáá tnamá núú ndékú tĕ Jàcób ndɨhɨ kue ñaní tnáhá-dĕ. Te tée Jàcób ní tendaha-dĕ kue déhe-dé, kue tée sàkuéhé-gă kuáháⁿ-guedé nàcióⁿ Egiptú kuáháⁿ nguaaⁿ-guedé núní kaxi-guedé. Te òré ní kexìo-guedé núú ñàní-guedé té Chèé, te ní díkó-dĕ nŭní nĭ keheⁿ-guedé. Te ñà túú ní nàkiní ñáhá-guèdé xiidé, diko té Chèé chi ní nàkiní ñáhá-dĕ xiiguedé sá dɨú ñàní-dé kúú-guèdé.
Te tée Chèé ní kuiní-dé kiní-dé te núu sà ní dáma iní-guedé, te ní xáhaⁿ-dĕ xiiguedé: “Yúhú kúù-í ñaní-ndó tĕ Chèé, te vá kɨhɨ yùhú iní-ndó, chi nchòhó ní sani iní-ndósà ɨɨⁿ să ñà túú văha ní kide ñaha-ndo xìí ní díkó ñàha-ndo, diko Yá Ndiòxí, sá ñà túú văha-áⁿ n! ndada -gá sá văha. Te vitna chí kuánùhú te kixi-ndo ndɨhɨ nchaa kue ñaní tnáhá-ndó kùndéku-ndo nàcioⁿ Egiptú-a, dukaⁿ te ndakú-í chindee ñàha-í xiindo.”
Te dukaⁿ te kuáháⁿ nuhú kue naní té Chèé, te òré ní nàsáá-guedé vehe-guedé te ní kani-guedé kuèndú núú tătá-guèdé, te xáhaⁿ-guèdé xiidé sá ndékú ñàní-guedé té Chèé, ña túú ní xĭhí-dé. Te tătá-guèdé ío ní kudɨɨ ìnídé sá ni nĭhí-dĕ tnúhu sá ndékúní dĕhe-dé té Chèé, ña túú ní xĭhí-dé.
Te kuéi sà ní sahnu té Jàcób diko ní xínu iní-dé kuáháⁿ-dé ndɨhɨ nchaa kue ñaní tnáhá-dĕ kùndeku-dé ndɨhɨ-yu ñàcióⁿ Egiptú. Te kùmánígăsáá nduu kùú té Jàcób te ní xíkáⁿ táhú-dĕ núú YăNdiòxí kuènda ɨɨⁿ déhe-dé sá ná kùuxi sá văha xiiguedé.
Te nchàa nàkuáa ni káháⁿ Yă Ndiòxí kada-gá sá kúúxí ndíi Abráhám, nchàa tnúhu-áⁿ nĭ kendóo ndɨhɨ ndii Isàác, te dătnùní ní nàyáha dɨuni nchaa tnúhu-áⁿ xi ndíi Jàcób. Te ndéé núú ndťhťnă, dɨuni nchaa tnúhu-aⁿ nĭ kèndóo ndɨhɨ, ndɨ ùxúú déhe ndíi Jàcób ndɨhɨ nchaa kue ñaní tnáhá-guèdé. Te nchaa kue ñaní tnáhá-guèdé ío ní káyá-yu, ní kuu ùxúú xichí-yu, te duha ní ngúnàní; “Uxúú xichi ñayiu Israèlitá.” Te dukaⁿni nàní-yu ndéé vitna.
Tnúhu ndèé sanaha ndèé nuu tutu tnúhu Yá Ndiòxí Génesis 37- 50