Ñuhu kue ñayiu Israel ichi kuahaⁿ-yu xɨtɨ yuku yichi.

Te sata ni yaha ni xahaⁿ ya Ndioxi xii nayiu Israel nchaa ndudu sa sanu ichi ñaha xiiyu nakuaa kunde ku-yu nuu kuahaⁿ nuu vexi, ndaduaⁿ ni kuuxi sa ni kide ndaa-ga ndɨhɨ-yu sa kɨndaa kada-yu nakuaa nduu tnuhu kahaⁿ ndudu-aⁿ. Dukaⁿ te ni ndee-yu yuku Sinaí te mee ya Ndioxi ta danehe ñaha-ga ichi, kuahaⁿ-yu nuu ni kachi-ga sa kundeku-yu ñuu nani Canaan. Te ni taxi ndeku-ga ɨɨⁿ viko yodo nuuxi nuu-yu kuahaⁿ ta danche ñahaxi ichi kɨhɨⁿ-yu ñuu Canaan.

Ya Ndioxi ni xahaⁿ-ga xii ndii Abraham, ndɨhɨ ndii Isaac, ndɨhɨ ndii Jacob, sa kuaha ñaha-ga ñuhu Canaan kundeku kue ñani tnaha ndii vitna kaku tuu nuu kuahaⁿ nuu vexi. Diko ñuhu Canaan sa xindeku ñayiu nani Cananeu, te kue ñayiua chi ña tuu chihi ñuhu-yu ya Ndioxi, chi ña tuu sandaa ini ñaha-yu xiiga. Chi nieeni ndioxi sa ni kadnhua meeyu kide kahnu-yu, te meeni sa ña tu vaha kide-yu.

Te ya Ndioxi ni xahaⁿ-ga xii kue ñayin Israel: "Nchoho danaa-ndo nchaa ñayin Cananeu xindeku ñuhu Canaan, va kahaⁿ ndɨhɨ vahado-yu te ni vatnaha ndaha-ndo ndɨhɨyu. Nchaa sa ni dandaku-yu kachi-yu kuu ndioxi-yu danaa-ndo. Te nuu va kɨndaa ini-ndo kada-ndo nchaa nakua kahaⁿ-i, te na nguita-ndo kada kahnundo sa kachi-yu kuu ndioxi-yu-aⁿ te yuhu kunaa ñahana-ndo xii"

Te ore ni kexio ñayiu Israel yuhu ñuu Canaan, te tee Moisés ni kaxi-de ɨɨⁿ kaa ɨɨⁿ kaa nani tnaha kue tee uxuu ni xindeku ndee sanaha te ni xitnuhu ñahade xiiguede nakuaa kadaguede te ni tendaha ñaha-de xiiguede kuahaⁿ-guede Canaan kuenda kini-guede nasa kaa. Te tnaha kundehe-guede nasa ndaa kue tee CAnaneu nuu ndaa ñɨɨ guede adi ñaha.

Te ndɨ uxuu kue teé kuahaⁿ ngoto ndodo Canaan ni xika ndo do-guede ñunaⁿ udiko nduu, dukaⁿ te ni nakui ko-guede nin xindeku ñayiu te ni xahaⁿ-guede xiiyu: "Io vaha ñuhu chi io vaha kuu nchaa sa xitu ñáyiu ndeku yakaⁿ". Diko uxi kue teé ni sahaⁿ ngoto ndodo Canaan-ni xahaⁿ-guede xii ñayia: "Io tɨtnɨ ñuu nahuu kaa, te teé te ñadɨhɨ io dukuⁿ-yu". Te io ndee ndaa-yu te nuu na kɨhɨⁿ-o te kada ndahu ñaha-guede te kahni naha-guede".

Te ndɨhɨni ni kahaⁿ kuetee uu nuu uxuu tnahaguede ni sahaⁿ ngoto Canaan, te nani Caleb ndɨhɨ teé Josué te ni xahaⁿ-guede xii ñayiu; "Ndaa sa io vihi ndaayu, dukuⁿ-yu, ndee-yu, diko ndaa sa ndaku-o nuu-yu, chi ya Ndioxi chindee ñaha-ga, te dɨn-ga naa-ga kuenda-o".

Diko kue ñayiu Israel ñatun ni xindedoho-yu tnuhu ni kahaⁿ teé Caleb ndɨhɨ teé Caleb ndɨhɨ teé Josué. Te da ni ngüita-yu ni kudeeⁿ-yu nuu teé Moisés ndɨhɨ nuu teé Aarón, te ni xahaⁿ-yu xiiguede. "¿Na kuenda ndeka ñaha-ndo vexi nuu duha io nehe kaa? vaha-ga nuu ni xindeku nahini-o Egiptu ni kuu a dɨu da iha vexi kahni ñaha-guede nuu naa-o, te kue ña dɨhɨ-o ndɨhɨ landu-o ndoho-yu kunu kuechi-yu nuu kue ñayiu ñuu-áⁿ". Te kue ñayiu Israel ni kuini-yu nduku-yu ɨɨⁿka te kodonuu nuu-yu nuhu Egiptu.

Te ya Ndioxi ñatuu tnahi ni kuu vaha ini-ga nuu-yu, te ni sahaⁿ-ga nun ndeku-yu te ni xahaⁿ-ga xiiyu: "Na kuenda ni nancho kaua ini-ndo ña tuu-ga kuu ini ñaha-ndo, nchaa-ndo kɨhɨⁿ-ndo ichi xɨtɨ yuku yichi. Diko teé Josué ndɨhɨ teé Caleb chi va kɨhɨⁿ ndɨhɨ ñaha-guede xiindo, te nchaa kue ñayiu ndeku oko kuiaxi adi vihi-ga ndɨhɨ-yu kuu, nchaa ñayiu-aⁿ va saa-yu kundeku-yu ñuu Canaan".

Te sa ni teku doho-yu nakuaa ni kahaⁿ ya Ndioxi, te io ni ndɨhu ini-yu, chi ni kutnuni ini-yu sa ña tuu ni kide vaha-yu. Dukaⁿ te ni nanduku-yu nchaa sa dèéⁿ ndeku ndɨhɨ-yu kuenda kɨhɨⁿ-yu naa-yu ndɨhɨ ñayiu ñuu Canaán. Diko teé Moisés ni xahaⁿ-de xii-yu sa va kɨhɨⁿ-yu kɨhɨⁿ meeyu chi ya Ndioxi va kɨhɨⁿ ndɨhɨ ñaha-ga xiiyu, diko ña tuu ni saudaa ini-yu tnuhu ni xahaⁿ-te Moisés.

Te ni sahaⁿ mee-yu te ña ni ndaku-yu naa-yu ndɨhɨ ñayiu nuu Canaán, ni xia-yu, chi io vai-yu ni sahni ñaha kue ñáyiu xindeku ñuu-á, te dukaⁿ ña tuu ni ndaku-yu chi ña tuu ni sahaⁿ ndɨhɨ ñaha ya Ndioxi xii yu. Te sata ni nakuiko-yu sa ni sahaⁿ naayu ndɨhɨ ñayiu ñuu Canaán, te ni nguhuⁿ-yu ichi kuahaⁿ-yu xɨtɨ yuku te ni xuhuⁿ-yu ichi xɨtɨ yukuaⁿ udiko kuia.

Te ndɨ uu diko kuia ni xuhuⁿ-yu ichi xɨtɨ yuku, ya Ndioxi io ni xito ñaha-ga xiiyu. Ña tuu ni ndoho-yu doko, chi ni xoo kuha ñaha-ga sa ni xinchito-yu nani "mana". Te ni kuini-yu kaxi-yu kuñu, te ni tendaha-ga kaha ñuhu ni sahni-yu-guedɨ ni xexi-yu-guedɨ. Te kuei doo-yu, chau-yu ña tuu ni daña-ga tehnde ndɨ udiko kuia ni xuhuⁿ-yu ichi.

Te ya Ndioxi ni kide-ga sa va yóo tnahi ndaku kada chi ore ni yichi-yu ndute te ni kide-ga ni too ndute ɨɨⁿ nuu kava ni xihi-yu. Te kuei io ni xito ñaha ya Ndioxi xiiyu, diko ni dukaⁿ ña tuu ni kuuaha ini-yu nuu ya Ndioxi ndɨhɨ nuu te Moisés te kuei dukaⁿ ni kide-yu, diko ya Ndioxi ni kideni-ga ncha nakuaa ni xahaⁿ-ga xii ndii Abraham, ndɨhɨ ndii Isaac, ndɨhɨ ndii Jacob.

Te ñuhu-yu ichi ta yaha-yu ɨɨⁿ yuku yichi nuu ña tuu tnahi ndute te kuinu-yu koho-yu. Te ya Ndioxi ni xahaⁿ-ga xii teé Moisés: "kuahaⁿ kahaⁿ ndɨhɨⁿ-n kavaaⁿ kuenda too ndute koho ñayiu". Diko te Moisés ña tuu ni kide-de ha kuaa ni xahaⁿ ya Ndioxi kada-de sa kahaⁿ ndɨhɨ-de kavaaⁿ chi da ni kani-de uu xito ndɨhɨ tatnu nehe-de. Te dukaⁿ te ni too ndute ni xihi ñayiu Israel. Diko ya Ndioxi ña tuu ni kuvaha ini-ga nuu teé Moisés sa dukaⁿ da ni kani-de nuu kavaaⁿ, chi ni xahaⁿ-ga sa kàháⁿ ndɨhɨ-de kavaaⁿ ni kuu, te ni xahaⁿ-ga xiide: "yoho, va ndɨhu-n ñuu Canaán".

Te ndiko kuia ni xuhuⁿ ñayiu Israel ichi xɨtɨ yuku. Te nchaa ñayiu ña tuu ni kuu vaha ini ñaha xii ya Ndioxi ni xihi-yu ichi. Te ya Ndioxi ni sanu ichi ñaha-ga xii ñayiu Israel ndee yuhu ñuu Canaán. Te teé Moisés sa ni sahnu-de, nuu ya Ndioxi ni kaxi-ga teé Josué kuenda chindee-de teé Moisés kanu ichi-guede ñayiu. Te ya Ndioxi ni xahaⁿ-ga xii teé Moisés sa saa nduu te tendaha-ga ɨnga tee kixi kahaⁿ tnuhu-ga datna ni kide teé Moisés.

Te sata ni yaha dukaⁿ ni xahaⁿ-yu Ndioxi xii teé Moisés, te ni xahaⁿ tuku-ga xiide sa kaa-de ndee nuu ɨɨⁿ yuku dukuⁿ-ga chi yakaⁿ tuu kini-de nakuaa kaa ñuu Canaán. Te dukaⁿ ni kide-de te ni xini-de nakuaa kaa ñuu ni kachi ya Ndioxi kundeku kue ñayiu Israel, diko ya Ndioxi ni xahaⁿ-ga sa va ndɨhu-de ñuu Canaán. Te ni saa nduu ni xihi te Moisés te kue ñayiu Israel io ni ndahi-yu sa ni xihi-de, te oko uxi nduu ni ndahi-yu sa ndɨhu ini-yu sa dukaⁿ ni xihi-de. Te dukaⁿ te teé Josue ni nduu nuu-de ni nukuɨñɨ-de nuu teé Moisés. Teé Josué ni kuu-de ɨɨⁿ tee vaha, te io ni xoo kɨndaa ini ñaha-de xiiga.

Éxodo 16-17, Números 10-14; 20; 27 y Deuteronomio 34.