Iesus Uqacan Mesaiah Soian Ec Le Qel Qetec Niea
Deiwit uqa Israel hoageu king bileanah, oda hoqa, Iesus uqa elcel hau ohis nieadecia hocai, hau gemacu nieadecia hocai, mil gudecai, mil facalisdecai, uqa elcel unug ageu king bilea! Uqa esi ehelawe soafa, uqa ilo bahin bileian hogu, uqau ilo bilec houqa, uqa esi tutucuncai, wawa meu niecgu bileccai, uqa houqa ilo bile ofdeb gaidgaidun nieian.
Ifan uqa mel hoil aid wacu gude alesoian houqa esi Satan gati lacude nanasaleian, odeb Satan uqa esi dana mel houqa faci gobisi gataweuteian ec le made qel qeteanah. Heuqau gug ho, Satan uqa esi Mesaiah houqa qeb almeian, odeian hoqa, Ifan uqa esi tulideb, uqa eac bilec houqa oafa ehelawe aiean, odebafa Mesaiah uqa esi Satan uqau gagadi odec ho nanasaleb qeimebcaiteian. Iar mati bahinag nue hedeanafa, Ifan uqa, Iesus uqa ho Mesaiah ec ho amasac mudeanah.
Sain Ifan uqa Isip hogu ulumen meuqe efelufel ho itqecgu suldeanahgu hogu, uqa Israel dana hoage sihul ageu ageugu himenacilcai, hoage sipsip haun hoil, odeb sipsip houqa deweu ho itotom adi houqa, qebil almebafa logac ho ociafa lo aba wacgu ohiscai qesi nanahaigu log ho pilisideic loudenigan hocon madadeanah. Sain Ifan uqa log houqa feafa, uqa lo hoageu ho mehelude nuean hocon, uqa hoageu dana mel matude ho qei aqean almeadeanah. Etacub ho alesoan houqacan ho Pasowa ec madecia.
Sain Ifan uqa Abraham uqa melah Aisak qeb almebafa uqa ihandec uteian maudeanahgu ho, Ifan uqa Abraham melah Aisak uqau abengu ho, uqa sipsip haungu ihandec ho uteian Abraham uqau saideuteanah. Ige unug qisolmec igeuan almecun niea! Oda hoqa, Ifan uqa Iesus saideanah, uqa ho Ifan uqau sipsip haun, odan uqa igeu aben oafa ihandec ho mudeian almeanah.
Adamcai Ewa hoale qisol mehian houqacan, etacub meuqe bahin hofa alesoanah. Hoale Ifancai ad bileinah. Odan houqau elianig ho, sain hogu hananmec ho, dana aid unug bahin qisolmec duman houqacai basedecian alesocia, ode hocon hoagefa Ifancai ad bilecia. Dana aid hoage Ifancai hoageu bilecusade houqa ho qisomec uqa ho ifuldeanah. Odan hoqa, Ifan uqa bilecusadec houqa ehelawe tutumudeian hocon uqa isdec hoil ilamean nieanah.
Ifan uqa Abraham maudeanah, “Mil gude dana aid am filfil unug hoage esi inacangu hoage eldec onigan.” Iesus uqa ho Abraham uqau sihul gude alesoanah. Dana aid am filfil unug gude hoage uqacangu eldec ocia, elacin, dana aid unug in uqa Iesusun wacu cefeacai ho, uqa silail duman hogude esuldec besulec houqa oa, ode uqa kis odecgu uqa Abraham uqau sihul alesoa.
Ifan uqa King Deiwit uqa sihul uqau gude hoil esi alesoian ho, uqa esi Ifan uqau dana aid hoageu king ilo bile gaidgaidun ofadeian ec uqa king Deiwit le qel qete maudeanah. Iesus uqa ho uqa Ifan Melah, odan uqa Mesaiah, ode hocon uqa ho Deiwit uqau sihul gude uqa fil alesoan hocon uqa ihoc, uqa gaidgaidun king ilo bile Ifan uqau dana aid hoage ofadeian.
Sain Ifan uqa wa alecgu mil he unug qe ifuldean hogu, uqa dana aid ini hoage uqacan wawa cefein hoage esuladeb meu bilenigan hocon uqa bot hoil saiade adeanah. Hi odecet bahin, dana aid unug bahin qisomec ageuan Ifan uqa aqeb qeimenigan ec niea, oda hoqa, Ifan uqa Iesus saiadeanah, Iesus uqa dana aid unug ini uqacan wawa cefenigan hoage esuladeb hoage meu bilenigan.
Asac asac 100 iar mati bahin nueadeinahgu ho, dana aid hoage silail hoageuan qan bi onigan niea ec houqa ifaecgu ho, ihanec dana hoage ho gaid ode Ifan ihandec utec abi ho mudeciahan. Odan hoqa, ihandec utec ho mudadein houqa ho dana aid hoageu silail ho agase adewahuqec. Iesus uqa ho Ihanec Ilo Dana Ben bahin bilea. Uqa ihanec dana odacat hoage iwe qe, uqa ihanec osahi houqa adi ihoc dana aid mil gude unug ageu silail agaseian houqa ho, uqa dodo uqa deweu feladean qecian almeanah. Hogu uqa ihandec houqa mudeanah. Iesus uqa ho, uqa ihoc bahin uqa tutucun ihandec ilo dana ben alesoanah, elacin, el silail adaha ho unug houqacan qan bi ocun niea hoqa Iesus uqa oanah.
Iesus uqa ho uqa ige Mehelige nuec houqau (Pasowa) sipsip haun houqa alesoanah. Iesus uqa ho itotom adi odan uqa silailcai qitigi odan uqa Mehele nuec (Pasowa) houqacan isdede elubaec eli lec sain hogu uqa qecian almeanah. Hocon in hoil uqa Iesusun wacu cefeacai ho, uqa Iesus almeanahgu logac nean houqa ho, dana, o, aid houqau silail hoqacan edeweuteacai, ode hocon Ifan uqau olohon qan bi soa houqa dana, o , aid houqa mehelude nueacai.
Moses uqa ho Ifan uqau le ahun madec dana wenicai, odan uqa ho Ifan uqau le ho amasac qasale madeanah. Oda hoqa, Iesus uqa ho Ifan uqau le ahun madec dana unug bahin holimadec uqa weni ben bahinag aienah. Uqa ho Ifan, hocon uqa elcel unug mumude, uqa el le ade madean houqa ho, uqa Ifan uqau dumanig hogu ocobe uqa Ifan uqau le houqa madeanah. Ode hocon, Iesus uqacan ho mamadeic, uqa ho Ifan uqau le ec maudecia.
Ifan uqa Israelde dana aid hoagecai uqa wacu osahi meafa le qel qete gagadi mudeanah. Israel dana aid hoage ho, uqa hoage gawoade oadeanah. Odan hoqa, Ifan uqa qil wacu osahi meafa Le Qel qetec Qilde mudean houqa ho, uqa dana aid unugun ageuan mudeanah. Wacu osahi meafa Le Qel Qetec Qilde mudean houqacangu ho, uqa dana aid am filfil gude, ini hoage Iesusun wawa cefecia ho, hoage ho Ifan uqau dana aid uqa gawoadean hoagecai hoage osahi alesocia.
Sain Ifan uqa mil ifanean ho, elcel unug ho itotom adi nieanah. Qesolmec kobol ho qei nieanah. Adamcai Ewa hoale, hoale nanan wawalai niecgu bilehianah. Odan hoale Ifanun wawalai utec bilehianah. Hogu sag o almec ho qei nieanah. Ifan uqa mil qa ode nieian galedeanah.
Abi iacul hogu, Satan uqa Ewa ulduleian hocon uqa man wacugu noafa uqa le madeanah. Odean aid houqacai Adam hoale Ifan amuggu qisol mehianah. Hoale qisolmehian hondeggun ho, mil hegu dana aid unug sag ociaciafa hoage unug almeciacai.
Ifan uqacan louqec totqec heuqa: Gugqec dac 1- 3, 6, 14, 22; Ehelawe Oc 12, 20; 2 Samuel 7; Hibru 3:1- 6, 4:14-5:10, 7:1-8:13, 9:11-10:18; Le Amasacdec 21 hogude