21. ALKAWAL ALLAH DOW ALMASIIHU

1 Gada tatki duuniyaru Allah waaɗi niiya liiloygo Almasiihu. Alkawal aranal gam garki Almasiihu wadnama Adamu e Hawwa. Allah waɗɗi alkawal nder taaniraɓe Hawwa ɗum danyata goɗɗo fuusey hoore mboodi. Mboodi jarrabiiɗi Hawwa ndum Seyɗan. Alkawal waɗaama Almasiihu jaaloto Seyɗan.

2 Allah wadni Ibrahiima alkawal gam maako duuniyaru fuu keɓɓey barka. arka ka'a tabbitey to Almasiihu wari. Almasiihu oo hokkata yimɓe duuniyaru fuu laawol no kisrata.

3 Allah wadni Muusa alkawal o liiloye Annaboojo goɗɗo baa ma'ako. Allah wi'i : Annaboojo oo ɗum Almasiihu.

4 Allah wadni Laamiɗo Dawda alkawal go'oto nder taaniraɓe maako laatooto Almasiihu. O laatooto Laamiiɗo, o Laamoto yimɓe lenyol Allah faa abada.

5 Allah wolwani Annabi Jeremiiya wi'i: mo nyanɗe go'o mi waaɗey alkawal kesal. Alkawal kesal nga'al laataatako ba kisngal ngal Allah wadni Isra'iila dow hooseere Sina. To o waɗi alkawal kesal ngal e lenyol, o hokkey koomoye anndal. Koomoye Neɗɗo yiiɗey ɗowtaanago Allah e kiitaaji mu'um. Allah wi'i ndum laatooto ba koomoye winɗi kiitaaji ɗin nder mbernde mu'um. O laatooto lenyol maako, nden Allah yaafooto hakkeeji maɓɓe. Ɗum Almasiihu wadta alkawal kesal ngal e maɓɓe.

6 Annabo'en Allah mbi'i Almasiihu laatooto Annaboojo e Limaanjo, e Laamiiɗo. Annaboojo ɗum Neɗɗo naneyɗo wolde Allah nden ɓaawo ndon o wi'a nde yimɓe. Almasiihu mo Allah waɗi niiya liiloygo laatooto gooŋgaajo wi'igo Almasiihu naney wolɗe Allah e gooŋga.

7 Liiman'en Isra'iila tokki waɗɗango Allah sadaka gam lenyol. Sadaka ka'a no ittey kiita Allah dow hakkeeji yimɓe. Liiman'en e ɗon toro Allah kadima gam lenyol. Ammaa Almasiihu laatooto mawɗo liiman'en gooŋgaajo o hokkey hoore ma'ako e Allah ba sakkiri, waala ngoɗɗi sakkiri laatooto gooŋgari gam ittogo hakke.

8 Laamiiɓe e ardiiɓe kawtal yimɓe, goggel sarel e ɓe ndon mbaaɗa boofi. Laamiiɗo Dawda Laamaani Isra'iila tan, ammaa Almasiihu taaniirawo Dawda Laamanto duuniyaru fuu o ardoto faa abada. Ko ɓuuri ɗum o Laamorto e gooŋgaaku faa abada, o waɗɗey niiya mbooka faa abada.

9 Annabo'en Allah mbolwi areeji ɗuɗɗi dow Almasiihu, miisaalu Annabii Malaakiya wi'i Annabiijo goɗɗo gooŋgaajo warey yeeso Almasiihu. Annabii Isaaya winndi wi'i Debbo mo annda gorko danyata Almasiihu. Annabii Mika wi'i ɗum danye Almasiihu nder Gariri Baytiilami.

10 Annabii Isaaya wi'ino kisnoowo danyete nder lesdi Galiili. Kisnoowo oo de'itiney Yemɓe monnaɓe. O hoynaney nyawɓe e fahɓe, wosɓe bo jahhey.

11 Annabii Isaaya wi'i yimɓe nganye mo ɓe teddinta mo. Annabii Zakaariya wi'i hiigo Almasiihu wanyey mo jaɓɓa ceede sappanɗe tati gam ɗum wara mo. Annabo'en ɗudɓe mbi'i yimɓe mbarey kisnoowo on, ɓe mbaɗey caasa gam ɓe kebta moye hoonjata Hennare maako.

12 Annabo'en anndi no Almasiihu mayrata. Isaaya waɗi annabaaku wi'i yimɓe tuutaney mo joode ɓe nguusoto mo, ɓe piiya mo. Nden ɓe juwaa mo nden o maya, mayde torra koo ɗe o waaɗay ko halli.

13 Kadima annabo'en mbi'i Almasiihu laatooto boɗɗo, mo waala hakke ammaa Allah hiiti mo gam hakkeeji Yimɓe duuniyaru fuu. Gam mayde ma'ako, koomoye heɓey jam e Allah. Gam maajum mayde Almasiihu laati bawɗe Allah.

14 Annabo'en mbi'i Allah ummiitiney mo nder mayɓe ɗum fuu ɗum laati anniya Allah gam tabbitingo alkawal kesal, gam hisnugo ummatooje duuniyaru e hakkeeji ɗi ɓe mbaɗi yeeso Allah.

15 Allah wagginani annabo'en areeji ɗuɗɗi dow Almasiihu, ammaa Almasiihu waray nder sarel annabo'en ɓen. Ko ɓuuri duuɓi keme nayi (400) ɓaawo anndiikki annabo'en artuɓe, ɗum laati non sarel ngel Allah suuɓi liiloygo kisnoowo nder duuniyaru.

TAARIHA KA'A ITTAAMA NDER DEFTERE LAATAANOJI 3:15; 1;3 TOKKITAKI TAWRETA 18:15 ; 2 SAAMUYLA 7: JEREMIIYA 31; ISAAYA 59: 16: DANEYEL 7: MAALAKIIYA 4:5; ISAAYA 7:14 ; MIKA 5:2 ISAAYA 9: 1-7;35:3-5; 61 ;53; JABUURA 22:18;35:19; 69:4; 41:9; ZAKAARIYA11:12-13; ISAAYA 50:6 JABUURA 16:10-11.