26. YEESU SOOMAKE KUUGAL MU'UM.

1 Ɓaawo jaalaago jarriibooji Seyɗan, Yeesu soo'i Lesdi Galiili to o jooɗi no. Ruuhu Ceniiɗo hokki mo bawɗe ɗuɗɗe , Yeesu yahhi kootoye fuu o ekkitiini yimɓe. Ɗum wolwi mbodka dow ma'ako kootoye.

2 Yeesu yahhi Gariiri Nazaratu to mo jooɗiino sarel ko'o laati bilki. O naati suudu do'are ɗum hokki mo Deftere taggande nde waaju Annabi Isaaya gam o jaŋga nde. Nde Yeesu taŋgiti nderewol ngol waaju.

3 Yeesu jaŋgi: << Allah hokki yam Ruuhu gam mi anndina talaaka'en habaaru belɗum. O liiliyam gam mburtiŋgo haɓɓaɓe nder daŋgaye, gam mbumtiŋgo mbumɓe, gam hokkugo huŋnjuɓe mbelwelo. Ɗum sarel ngel Jawmiiraawo waɗata mboondenga mu'um dow me'en ngel o mballata'en bo.

4 Nden Yeesu jooɗi. Koomooye fuu suuti mo gam e ɓe anndi ko mbinɗa dow Almasiihu. Yeesu wi'i ɓe : << Ɗum ko njaŋgumi hannde heemɓi >> yimɓe fuu kayɗini. Ɓe kayɗini ɓe mbi'i na ɗum ɓi'i Yuusufu na?

5 Nden Yeesu wi'i : << Ndum gooŋga waala Annaboojo jaaɓete nder Garii to ummi. Wakkasi Annabi Eliya e woodi yuurumɓe nder Isra'iila, kowadta duuɓi tati e reeta Allah liiloyay Eliya to yuurumɓe Isra'iila, ammaa Allah liili mo to debbo juurumɗo mo lenyol feere. >>

6 Yeesu tokki wi'i go ɓe : << Wakkasi Annabi Elisa e woodi yimɓe Isra'iila ndudɓe ngoodi nyaw nyamowu laral. Ammaa Elisa hoynay koo go'oto maɓɓe, o hoyni koɗɗo bi'eto ndo Na'ama o go'oto nder mawɓe konne'en Isra'iila. Yimɓe naanoɓe Yeesu ndum yahuudu'en, nde ɓe nani ko Yeesu mbi'i . e kuŋnjani mo. >>

7 Nden yimɓe Nazaaratu naŋgi Yeesu ndasi mo yaaci inaare do'a maɓɓe. Ɓe njahri mo dow fowɗe gam ɓe iijo mo ɓe mbara mo. Ammaa Yeesu tokki caka maɓɓe o mburti wuuro Nazaaratu.

8 Nden Yeesu yiili nder lesdi Galiili , yimɓe ngari to ma'ako ɓe ngaddi yimɓe nyawɓe e mbosɓe, wumɓe, kuturu'en e fahɓe ɓe fuu Yeesu hooyniiɓe.

9 Kadima ɓe ngaddani Yeesu haaŋaɓe. Ɗon e ɗon jinni mburti ɓe e ɗi mboya e ɗi mbi'a: << An woni ɓiɗɗo Allah. >> Yimɓe kayɗini ɓe seeyi ɓe njetti Allah.

10 Ɓaawo ɗon Yeesu suɓi liilaɓe sappo e ɗiɗo. Liilaɓe ɓen e njahda e Yeesu, o ɗon ekkitina ɓe

TARIHA KA'A ITTAAMA DEFTERE NDER MATTA 4: 12-25; MARKUS 1: 14-15, 35-39; 3 : 13-21; LUKKA 4: 14-30 , 38-44.