43. NO IGILISIYA FUƊƊIRI

1 Ɓaawo so'aaki Yeesu e Asama, fukara'en ma'ako njooɗi e Ursaliima bano Yeesu wiino ɓe. Nuɗɗinɓe e kawriita koondeye gam toraago Allah.

2 Koondeye hitaande balɗe sappannde joowi (50) ɓaawo Julde Paska, yahuudu'en ndon teddina nyalnde woonde nde ɓe noddata Pantekosta. Pantekosta ɗum sarel ngel yahuudu'en tanjata gese mu'um ɗe alkaamaari. Yahuudu'en iiwooyi kootoye nder duniiyaaru ngari Ursaliima kawriiti gam mbaɗa Julde. E hitaande nden Julde Pantekosta waaɗi asaawere wo'ore ɓaawo so'aaki Yeesu e Asama.

3 Sarel ngel nuɗɗinɓe fuu kawriiti, Suudu ndu ɓe ngoni nder mu'um heewi maaɗey ba ɗum henndu semmbiɗum. E sarel ngel goɗɗum nanndum e jayli yiite mbaŋgi ɗum jippi dow hoore koomoye nder nuɗɗinɓe. Ɓe fuu ɓe keewi Ruuhu ceniiɗo ɓe malti Allah nder ɗemɗe feere feere. Ɗemɗe nden Ruuhu Ceniiɗo hokki ɓe bawɗe mbolwugo ɗe.

4 Nde yimɓe Ursaliima nani maaɗey ɗum, ɗuudɓe mburtooyi ngari gam raago ɗume waaɗi. Ɓe nani nuɗɗinɓe mbaŋgiina kayeefi mawɗ'um ɗum Allah waaɗi. Ɓe kayɗiini gam koomoye nani ɗum nder ɗemgal mu'um.

5 Woɓɓe nder yimɓe ɓen mbi'i fukara'en ɓe no wuykuɓe, ammaa Piyer ummi dari wi'i ɓe: << Njewe mi wi'a on, ɓe'e yimɓe na ɓe wuykuɓe bano kammiiɗon, ammaa ɗum ko nji'ooto ɗum ko Annabi Yo'el anndinno: Allah wi'i: << Nder balɗe ragareeje mi jippinooye Ruuhu am dow yimɓe am. >>

6 Piyer ɓesdi wi'igo ɓe : << Onon yimɓe Israa'ila, Yeesu waaɗi kuuɗe boɗɗe ɗuuɗɗe gam hollugo kaŋko o mooye. O waaɗi kayeefiiji ɗuuɗɗi e bawɗe Allah. On anndi ɗum gam on njiiɓe areeji ɗin fuu. Ammaa gam ɗuum on ngaafi mo. >>

7 << Yeesu mayi, ammaa Allah ummitiini mo nder mayɓe. Ɗum ko Annaboojo goɗɗo mbinndi wi'i: << Allah a woorata Ceniiɗo ma'a nyoola nder yenaande >> Ɗum waaɗi. Min saydu'en Allah ummitiini Yeesu.

8 << Allah Babiiraawo mawniini Yeesu o waaɗi mo o jooɗo e juuŋgo ma'ako nyaamo. Yeesu lildoyi min Ruuhu Ceniiɗo bano o wi'i no min. Ruuhu Ceniiɗo waaɗata areeji ɗi'i fuu ɗi nji'ooto e ɗi nanooton jo'oni. >>

9 << On ngaafi Gorko oo, Yeesu. Ammaa annde Allah waaɗi Yeesu Jawmiiraawo e Almasiihu dow kooɗume fuu! >>

10 ko Piyer mbi'i memi naney ɓe fuu. Say ɓe njami Piyer e fukara'en reeta'en ɓe mbi'i banndiraɓe koo hani min mbaaɗa?

11 Piyer tonti ɓe wi'i : << Koomoye mo'on woora hakkeeji mu'um wadne Baptisma e dow Innde Yeesu Almasiihu, nden Allah ya'afanto on hakkeeji mo'on. Nden o hokkey'on gokke Ruuhu Ceniiɗo. >>

12 Ko waaɗi yimɓe dubu tati( 3000) nuɗɗiini ko Piyer wi'i, ɓe ngarti fukara'en Yeesu. Ɓe mbadna Baptisma nden ɓe kawriti e Egilisiya Ursaliima.

13 Lilaaɓe tokki ekkitiŋgo nuɗɗinɓe. E ɓe kawrita koondeye gam waadugo do'are e nyamdugo. E ɓe maltida Allah, e ɓe mballindiira e ɓe ceɗɗiɗiira ko ɓe ngoodi fuu. Koomoye nder ci'ire nden e mbolwa mbodka dow maɓɓe. Kadima koo ndeye nyalnde yimɓe ɗuuɗɓe e nuɗɗiina.

TAARIHA KA'A ITTAAMA NDER DEFTERE KUUƊE LILAAƁE 2.