47. POL E SILAS NDER FILIPI

1 Nde Sol fuɗɗi jahale nder Lesdi Roma say o fuɗɗi hutinirgo innde ma'ako nde roma'en " Pol " wodde nyanndere Pol e higoo mu'um Silas njahhi Gariiri Pilibiya gam ɓe nga'ajina habaru belɗum dow Yeesu. Ɓe njahhi wodde inaare fara maayo yaasi Ci'ire to yimɓe kawriitaata gam wadgo do'aare, ton ɓe potti e Debbo goɗɗo bi'eteeɗo Lidiiya o piloowo. O jiɗɗo Allah e mo suujidana Allah koondeye.

2 Allah waaɗi Lidiiya nuɗɗiini Yeesu. Pol e Silas mbadni mo Baptisma kaŋko e wuuro ma'ako fuu. O wi'i Pol e Silas njahha mbaaŋgo e wuuro ma'ako, ɓe njahhi ɓe mbaaŋgi ton.

3 Pol e Silas e kawriita e yimɓe koondeye e inaare to yahuudu'en mbaɗta do'aare. E woodi korɗo goɗɗo mo ruuhuwol kaluungol tokkata ɓe koondeye, ruuhuwol ngol e hokka mo bawɗe yiigo ko waraata, e ɗum waddana Jawmiiraaɓe ma'ako e keɓra ɗum ceede ɗuuɗɗe nde o nji'oowo ko waraata.

4 Surbaajo on korɗo tokki huygo e tokka ɓe. e wi'a << Worɓe ɓe'e no huwaano ɓe Allah mawɗo. E ɓe mbi'a on no kisroto ! >> E mo wi'a non koondeye nde Pol e Silas njaali fuu.

5 Woɗɗe nyandere korɗo on e tokkiriiɓe gaɗa e huu'a say Pol yeenji mo wi'i Jinnol gonngol nder ma'ako : << E dow Innde Yeesu wurta. >>Ɗon e Ɗon ngol mburti mo.

6 Yimɓe jeyɓe korɗo on monna ŋgorey! Ɓe anniiti tonaa e Jinnowol ngol korɗo on waawata yi'a ko waraata e yimɓe. Gam ma'ajum yimɓe ngaraata kokka jeyɓe mo ceede gam o wi'a ko waraanta ɓe.

7 Nden, jawmiiraɓe korɗo on naŋgi Pol e Silas ɓe ngadi ɓe yeeso mawɓe Roma ɓe piyii Pol e Silas ɓe mba'ati ɓe nder daŋgaye.

8 Ɓe kettinoye Pol e Silas nder inaare naŋgaɓe to renoɓe ɗuuɗɓe ngoni ɓe kaɓɓi kolle maɓɓe e leɗɗe mawɗe. Ammaa nder Jemma Pol e Silas e njiima e jiimi maltugo Allah.

9 Ɗon e ɗon ɓe nani Lesdi dimmbake ! ndammuɗe daŋgaye fuu omti sarŋgaji kaɓɓiraaɗi naggaɓe njani.

10 Nde Denoowo pakki yi'i dammuɗe daŋgaye e maɓɓiti. O hammino ommbaaɓe fuu ndaaɗi. Say o nyuumi mawɓe ma'ako no mbarey mo gam o woori ommbaaɓe fuu nyaari o nyuumi o waara hoore ma'ako ! Ammaa Pol wi'i mo : << Dara taanawnu hoore ma'a, min fuu e miin ɗo. >>

11 Say denoowo daŋgaye on wari to Pol e Silas e diwna o njami ɓe o wi'i : << Noy mbaɗey mii mi hiisa ? >> Pol wi'i mo : << Nuɗɗin Yeesu Jawmiiraawo, o hiisnete an e wuuro fuu. >> Say ɗon ma o honji Pol e Silas o yahri ɓe wuuro ma'ako o looti nawnanɗe maɓɓe. Nden Pol fuɗɗi wajiŋgo koomoye habaru Yeesu nder wuuro maɓɓe.

12 Denoowo daŋgaye on e wuuro mu'um fuu nuɗɗini Yeesu, nden Pol e Silas mbadni ɓe Baptisma. Nden denoowo on e Pol e Silas nyamdi ɓe nandi belɗum.

13 jahgo ma'ajum, mawɓe Ci'ire nden mburtini Pol e Silas nder Daŋgaye nden ɓe mbi'i ɓe mburte Filipiya. Pol e SIlas njahi njaɓɓiti Lidiiya e hiigiraaɓe maɓɓe nden ɓe mburti Gariiri ndin. Habaru belɗum dow Yeesu tokki sammbitaago, Igiliyaaji bo mbaɗi ga ɓesdago.

14 Pol e woɓɓe mawɓe masiihiŋko'en njahi nder Lesɗe feere feere gam wajiŋgo yimɓ habaru belɗum dow Yeesu, say ɓe mbinni ɗereeji ɗuuɗɗi gam cemmbiɗingo e ekkitingo nuɗɗinɓe nder Igilisiyaaji. Goɗɗi nder ɗereeji ndin ngartirama ɗereeji Deftere ceniiɗe.

TAARIIHA KA'A ITTAAMA NDER DEFTERE KUUƊE LILAAƁE 16: 11- 40.