۳۳. دِهکانئے کِسَّه

یَکّ رۆچے ایسّا مَزَن‌گوَرمئے لَمبا مردُمانی مزَنێن رُمبێا تالیم دئیگا اَت. باز مردُم ایسّائے تالیمئے اِشکُنگا آتکگ‌اَت، بَله په اے سَجَّهێن مردُمان اۆشتگئے جاگَه کَمّ اَت و ایسّائے تئوار آیان شَرّیئے سَرا رَسگا نه‌اَت. گُڑا ایسّا بۆجیگێا سوار بوت و چه مَزَن‌گوَرمئے لَمبا کَمُّک دور شُت و چه بۆجیگئے تها مردُمی تالیم داتنت.

ایسّایا کِسَّهے آوُرت: «یَکّ دِهکانے په تُهمئے چَنڈگا شُت، تُهمانی چَنڈگئے وَهدا لَهتێن تُهم راهئے سَرا رِتک و بالی مُرگان راهئے سَرئے سَجَّهێن رِتکگێن تُهم چِت و وارتنت.

لَهتێن تُهم ڈَل و ڈۆکانی سَرا رِتک که اۆدا هاک کَمّ اَت. پَمێشکا زوتّ رُست و سَبز بوتنت که ڈگار تَلگ اَت. بَله آیانی ریشّگ زِمینا جَهل نشُتنت و پَمێشکا آ چه رۆچئے ترُندێن گَرمیا هُشک بوت و مُرتنت.

لَهتێن تُهم شِزّ و چِرِکّانی تَها هَم رِتک و شِزّان آیانی رُست و رُدۆم داشت. آ تُهم که شِزّ و چِرِکّانی تَها رُستنت آیان بَر و سَمَر ندات.

لَهتێن تُهم شَرّێن زِمینا رِتک، اۆدا رُست و بَر و سَمَرِش دات، جاهے سی سَری، جاهے شَست سَری و جاهے سَد سَری. هَرکَس که هُدائے راها گِرگَ لۆٹیت، منی هَبَران دِلگۆش بکنت.»

مُرید اے کِسَّها سَرپَد نبوتنت. ایسّایا کِسَّه په آیان مانا کُرت و گوَشت: «تُهم هُدائے هَبَر اَنت. راه هَما مَردم اِنت که هُدائے هَبَرانَ اِشکُنت، بَله سَرپَدَ نبیت و شئیتانَ کئیت و چَه آییئے دِلا هُدائے هَبَران دَرَ کنت. اے پئیمێن مَردمے هُدائے هَبَرانی نێمگا هِچّ دِلگۆشَ نکنت.

ڈَل و ڈۆکێن زِمین هَما مَردم اِنت که هُدائے هَبَرانَ اِشکُنت و په وَشّیَ منّیتِش. بَله وَهدے که آ تَکلیپَ بیت یانکه چه دِگَه مَردمانی نێمگا آزارے رَسیتی، دَمانا چَه هُدایا سِدیت و دورَ بیت و هُدائے سَرا باوَر کَنگا یَلَهَ دَنت.

شِزّ و ڈَنگَرێن زِمین هَما مَردم اِنت که هُدائے هَبَران گۆشَ داریت، بَله دُنیایی پَرێشانی و مال و زَرّئے مُچّ کَنگئے دُمبا کَپیت. کَمّے وَهدا رَند آ گۆن هُدایا مِهر کَنگا یَلَهَ دَنت و وَتی سَجَّهێن دلگۆشا گۆن زَرّ و دُنیائے آ دِگَه چیزّانَ کنت، پَمێشکا هُدایا وَشنۆد و رَزا کُرتَ نکنت. اے مردُم گَندمئے هَما هۆشَگئے پئیما اِنت که بَری پِر نێست.

بَله شَرّێن زِمین هَما مردُم اِنت که هُدائے هَبَران گۆشَ داریت و باوَرَ کنت و شَرّێن بَر و سَمَرَ دَنت.»

چَه پاکێن کِتابا کِسَّهے که مَتّائے اِنجیل دَر ۱۳ بَند ۱ تان ۲۳آ؛ مَرکاسئے اِنجیل دَر ۴ بَند ۱ تان ۲۰آ؛ لوکائے اِنجیل دَر ۸ بَند ۴ تان ۱۵آ نِبیسگ بوتگ.