۳۸. ایسّا دْرۆهگ و دُژمِنانی دَستا دئیگَ بیت

هَر سال یَهودیان سَرگوَزئے ائییدا جَشنَ گِپت. اے ائیید پَمێشکا گِرگَ بوت که هُدایا باز کَرنا پێسَر آیانی پِت و پیرُک چَه مِسرئے گُلامیا رَکّێنتگ‌اَتنت. ایسّایا چَه وَتی دَرس و تالیمئے شُرو کَنگا کساس سئے سالا رَند گۆن وَتی مُریدان گوَشت که من گۆن شُما پَه سَرگوَزئے ائییدئے گِرگا اورشَلیما رئوگَ لۆٹان بَله بزانێت که هَمۆدا کُشگَ بان.

ایسّائے یَکّ مُریدێئے نام «یَهودا» اَت. یَهودا مُریدانی زَرّانی پێلِکئے سَمبالۆک اَت. باز بَران آییا چه پێلِکا زَرّ دُزِّتگ‌اَت. وهدے ایسّا گۆن وَتی مُریدان اورشَلیما سَر بوت، یَهودا، دینی پێشوایانی کِرّا شُت و گوَشتی که من په ایسّائے نِشاندَهی کَنگا تئیار آن. شُما منا زَرّ بدئیێت و من ایسّایا شُمئے دَستا دئیان. یَهودایا زانت که یَهودی دینی پێشوا نمَنّنت که ایسّا، مَسیه اِنت و آییا کُشگَ لۆٹنت.

یَهودیانی مستِرێن دینی پێشوا چه اے دِگه دینی پێشوایان پێسَر بوت و یَهودائے دَستا سی نُگرَهێن سِکَّهی دات که تئو ایسّایا مئے دَستا بدئے. اَنچُش بوت که نبیان پێسَرا گوَشتگ‌اَت. یَهودا رازیگ بوت، زَرّی زُرتنت و شُت. نون شَرّێن وهد و مۆهێئے چارگا لَگِّت که ایسّایا یَهودیانی دَستا بدنت.

ایسّایا سَرگوَزئے ائیید گۆن وَتی مُریدان اورشَلیما گِپت. ائییدئے شام کنگئے وهدا ایسّایا لَهتێن نَگن زُرت و ٹُکُّر ٹُکُّر کُرت و گوَشتی: «اِشان بزورێت و بوَرێت که اے منی جِسم اِنت که من پَه شُما کُربانیگیَ کَنان. اے چیزّا په منی یات دارگا بکَنێت.» گۆن اے گَپّان ایسّایا آ سَرپَد کُرتنت که منَ مِران و وَتی جانا په شُما ندرَ کَنان.

پَدا ایسّایا جامے زُرت و گوَشتی: «جاما نۆشێت. اے منی اَهد و پئیمانئے هۆن اِنت که په شُما رێچانی و هُدا شُمئے گُناهانَ بَکشیت. هَمے کارا بکَنێت که من کَنگا آن و هَر وَهدا که جاما نۆشێت منا یات بکَنێت.»

رَندا ایسّایا گۆن وَتی مُریدان گوَشت: «چه شُما یَکّے منا دْرۆهیت و دُژمنانی دستا دَنت.» مُرید هَبَکَّه منتنت و وَت‌مان‌وَتا جُستِش کُرت که بارێن چه ما کئے چُشێن کارے کنت؟ ایسّایا گوَشت: «مَن اے نَگنئے دَپارا هَما مردُما دئیان که آ منا دْرۆهیت.» نَگنئے دَپار یَهودائے دَستا داتی.

اَنچُش که یَهودایا دَپار دَست گِپت شئیتان آییئے جانا پُتِرت. یَهودا دَر کَپت و یَهودی دینی پێشوایانی کِرّا شُت که آیان په ایسّائے دَزگیر کَنگا کُمَکّ بکنت. شَپئے وَهد اَت.

وراکئے وَرگا رَند ایسّا گۆن وَتی مُریدان زئیتونئے کۆهئے نێمگا راه گِپت. گۆن مُریدان گوَشتی: «اِنشَپی شُما سَجَّهێن منا یَلَهَ کَنێت. اے نِبیسگ بوتگ: ‹مَن شِپانکا جَنان و پَس شِنگ و شانگَ بنت.›»

پِترُسا دَرّاێنت: «اَگَن سَجَّهێن تَرا یَلَه بکَننت، من تَرا یَلَهَ نکَنان و هِچبَر ٹگَلَ نئوَران.» ایسّایا گۆن پِترُسا گوَشت: «پِترُس! شئیتان شُما سَجَّهێنان رَد دئیگَ لۆٹیت، بَله من په تئو دْوا کُرتگ که تئیی باوَر ٹگَل مئوارت. بَله اَنگَت تَرا راستێنَ گوَشان، هَمے اِنشَپی چَه کُرۆسئے بانگا پێسَر، تئو منی پَجّاه آرگا سئے رَندا اِنکارَ کَنئے.»

پِترُسا گوَشت: «بِلّ تُرے منی سَر برئوت، بَله من تَرا هِچبَرَ ندْرۆهان.» اے دِگه سَجَّهێن مُریدان هَم اَنچُش گوَشت.

ایسّا گۆن وَتی مُریدان «جِتسیمانی» نامێن جاگَهێا شُت و گۆن آیان گوَشتی: «دْوا کَنێت که آزمائِش و چَکّاسا مکَپێت.» ایسّا وَت تَهنا په دْوا کَنگا کمّے دێمتِرا شُت.

ایسّایا سئے رَندا دْوا کُرت: «او منی پِت! اَگَن بوتَ کنت، چه من اے سَکّیانی جام و پیالَها بٹگَلێن. بَله اَگَن په اِنسانئے گُناهانی بَکشگا دِگه هِچّ راه نێست، گُڑا هَما پئیم بکَن که تئو لۆٹئے.» ایسّا باز تَکلیپ اَت و هێدی هۆنئے پئیما پِٹّگا اَتنت. هُدایا پرێشتگے راه دات که ایسّایا مُهر و مُهکَم بکنت.

هَر دْوایا رَند ایسّا وَتی مُریدانی کِرّا آتک، بَله مُرید واب اَتنت. وهدے آ سئیُمی رَندا آتک، گوَشتی: «پاد بیاێت که هما مرد آتکگ که منا دژمنانی دستا دَنت.»

یَهودا گۆن یَهودیانی لهتێن دینی پێشوا و سِپاهیگانی رُمبے آتک. آیان زَهم و لَٹّ گۆن اَت. یَهودا ایسّائے کِرّا آتک و گوَشتی: «او اُستاد! سَلام و درۆت.» پَدا ایسّایی چُکِّت. یَهودایا پَمێشکا چُش کُرت که یَهودی دینی پێشوا بزاننت که کئیا بگِرنت. ایسّایا گوَشت: «یَهودا! گۆن چُکّگێا منا دْرۆهگا ائے؟»

اَنچُش که سِپاهیگ ایسّایا دَزگیر کَنگا اَتنت، پِترُسا وَتی زَهم کَشِّت و مستِرێن دینی پێشوائے نئوکَرێئے گۆشی سِست. ایسّایا گوَشت: «وتی زَهما جَهل کَن. منَ توانت چه وَتی پِتا پرێشتگانی لَشکَرے په کُمَکّا بلۆٹِتێن، بَله اَلَّم پِتئے هُکما منّان.» رندا ایسّایا نئوکَرئے گۆش دراه کُرت. پَدا سَجَّهێن مُرید تَتکنت.

چه پاکێن کِتابا کِسَّهے که مَتّائے اِنجیل دَر ۲۶ بَند ۱۴ تان ۵۶آ؛ مَرکاسئے اِنجیل دَر ۱۴ بَند ۱۰ تان ۵۰آ؛ لوکائے اِنجیل دَر ۲۲ بَند ۱ تان ۵۳آ؛ یوهَنّائے اِنجیل دَر ۱۸ بَند ۱ تان ۱۱آ نِبیسگ بوتگ.