3. Morwalela

Mojwa ga lebagka le lekyelele, bontsi jwa baqtho mba ye be rula mo lehatsheng ba be be simolola go riha boshethogo le rikgoka. Ga simolola go riha thyatya Morimo mbe wa bona gore o shene shengwe le shengwe mo lehatsheng gka go riha morwalela wo motyona.

Mbe Noah a bona bopelothomoshi go jwa Morimong. Noah ye ele mosiyami yo yee rula le baqtho mba ha ba siame. Morimo wa jwelwa Noah gka morwalela wo o bata go o riha. A be e mo jwela gore a rihe shekepe she she tyona.

Morimo wa mo raya ware a sherihe bokyelele jwa lekgolo le mashome uwa mane, le bophara jwa mashome ale maberi le boraro le bokyelele jwa gorimo jwa shelegkanyo sha leshome le boraro le botlhano. Noah a e joga gka rikgong a riha rikgaoganyo ri le rithyaro je ri thathaganyego, ritwana rile rintsi, marulelo le sheokomela bagwe. Shekepe she ye le gore Noah le ba loba lagwe ba chabele morwalela mo tyeng le ripholoholo gka go harolagana gajo.

Noah a obamela Morimo. Ena le bongwane ba bantjana mba bararo ba she joga gkaho Morimo yo ba laeng gkaho. Yeye ga ba tshola rijyara go she joga gka gore ye shele she tyona. Noah ye ya a tsibosa baqtho gore morwalela u dago le gore bainaakanye le Morimo, mbe babe ba sha morumele.

Morimo ye ya wa raya Noah le bongwane ware ba bate rijyo je re ba legkanyego le ripholoholo. Noah ya re e heja a jwela Morimo, mbe Morimo wa mo jwela gore ke nako ya gore ena le bongwane le basari bagwe batjene mo shekepeng, ye bale boheraboberi bothe.

Morimo wa romela pholoholo nngwe le nngwe ye tyonanyana le ye namagari le nnyane go Noah gore re tjene ri chabele morwalela mo shekepeng. Morimo wa romela ripholoholo ri supa je ri tyonanyana le je rinamagari gka go harologana ga jo je ri gka rihisiwa mo shetabelong. Ha ri sena go tjena jothe Morimo wa hitja shetswalo.

Pula ya simolola go na qthatya. Yeye yana malatji ale mashome ale mane le masigo ale mashome ale mane e sha eme. Shengwe le shengwe ye she khurumerijwe ke maze, le rithaba je rityona tota.

Shengwe le shengwe she ye shele mo lehatsheng sha shwa, kgaite ga baqtho le ripholoholo je ye rile mo shekepeng. Shekepe ye she kalakala ha gorimo ga maze heri shengwe le shengwe she ye she le mo kyeng ye she babaleshile mo go nweleng.

Mojwa ga pula ala ya ema, shekepe ye ya sha rula rikgweri ri le rithano ha go rimo ga maze, mo lebagkeng le ke ha maze e simolola go hogkojega. Laatji lengwe shekepe sha kgona go ema ha gorimo ga thaba mbe lehatshe ke ha le nje le nale maze. Mojwa ga rikgweri rile rithyaro, rithaba ke ha ri bonana jyaanong.

Mojwa ga malatji ale mashome ale mane, Noah a roma legakabe gore leye go thola gore a maze na a kgala. Legakabe la putela ho go omeleye hooho mbe la shegka la bona shengwe.

Mojwa Noah a roma lephoi. Mbe la shegka la bona shengwe la boyela goye. Mojwa ga beke ale roma gatshi, mbe lada gka gkala ya shethare sha Mothware! Maze ye hela , le bithare ye be simolola go thoga!

Noah a letya beke abe e roma lephoi gatshi laboraro. Hombe, ke ha leya go bona borulo la be le shaa thole le boyela goye. Maze ye e kgala!

Mojwa ga ri kgweri rile ri peri Morimo wa raya Noah, "Weni le ba loba lago le ripholoholo jothe le gka jwa. Rihala le baqthwana le rikokomane je ri ntsi le daje lehatshe." Noah le ba loba lagwe ba be be jwa mo shekepeng.

Mojwa ga ga Noah a sena go jwa mo shekepeng, abe e joga aletare go rihela Morimo shethabelo sha pholoholo ngwe le ngwe. Morimo wa ityumela wa segohaja loba la ga Noah.

Morimo ware, "Ke tshepisa gore ha ke kita ke guja lehatshe gka bilo ze bi mashwe ze baqtho ba berihago, le go shena lehatshe gka merwalela, le ha baqtho ele ba leohi go simologa bo nxung jwabo."

Morimo wa riha moze wa barimo go supa chwolohejo. Nako le nako ha moze wa barimo o bonana mo lewaping, Morimo o gagkoloshelwa cholohejo ya gwe le baqtho bagwe heri jwalong.

Polelo ya Baebele gojwa go Genesisi 6-8