Kgolagano ya Morimo le Aborahamo

Ringwaga je rintsi mojwa ga morwalela, ye go nale baqtho bale bantsi mo lehatsheng, ye be bola puo ele me yengwe. Gonale go daja lehatshe jwaagka Morimo ye o layee, ba kgobokana bothe ba joga toropo.

Ye be dee gka boikgantsho, ebile ba sena sepe gkashe Morimo ye e she bola. Ba simolola go joga kago ye e tyelele ye e hitha legorimong. Morimo a bona gore ha ba gka ba bereka bothe be riha shebe, be de be jwelela be riha shebe she shentsi.

Morimo a hetyolela puo yabo mo ripuong je ri harologanyego a be e halaja baqtho mo lebopong lothe. Toropo ye ye be simolola go e joga ye e bijwa Babel, go raya, ''tsietsego.''

Mojwa ga ringwaga rile makgolokgolo, Morimo a bola le monona e bijwa Aboramo. Morimo a mo jwela are, ''lesha lehatshe lago le ba loba lago o bo o ya lehatsheng le ke daa go le go kakanyeja. Ke da go go shegohaja ke be ke go riha chaba ye tyona. Ke da go gorisa lebijo lago. Ke da shegohaja mba ba go shegohajago ke be ke guja mba ba go gujago. Ripa jothe mo lehatsheng re da go shegohala gka ntha yago.''

Aboramo a be e obamela Morimo. A tshola mosari wagwe, Sarai, le malatya othe agwe le shengwe le shengwe shagwe a be e ya lehatsheng le Morimo ye e le mo kakanyerije, lehatshe la Kanana.

Ha Aboramo a sena go hitha Kanana, Morimo are, ''labelela tyikologo yago. Ke daa go naya weni le rikokomane jago lehatshe lothe le o le bonago jwaagka boshwa.'' Aboramo a be e rula mo lehatsheng.

Laatji lengwe, Aboramo a kopana le Melchizedek, moperesita wa Morimo yo mogolo. Melchizedek a shegohaja Aboramo are, ''A Morimo yo mogolo monyi wa legorimo le lehatshe a shegohaje Aboramo.'' Aboramo a be e naya Melchizedek leshome la shengwe le shengwe shagwe.

Ringwaga je rintsi ja hetya, mbe Aboramo le Sarai ba jwelela ba sena moqthwana, Morimo a bola le Aboramo a mo sholoheja gatshi gore o daa rula le moqthwana le rikokomane je rintsi jwaagka rinyeleri mo lewaping. Aboramo a rumela cholohejo ya Morimo. Morimo a supa ha Aboramo e siame gka gore yaa rumela cholohejo ya Morimo.

Morimo a riha kgolagano le Aboramo. Kgolagano ke tyumejano ha gare ga baqtho ba le baberi. Morimo are, ''ke daa go go naya moqthwana go jwa mbeleng wago. Ke naya rikokomane jago lehatshe la Kanana." Mbe Aboramo a jwelela a sena moqthwana.

Polelo ya Baebele go jwa go Genesis 11 - 15