20. Balelekwa le go boela gabo

Bogoshi jwa Iseraele le bogoshi jwa Juta jwa leohela Morimo. Ba hetyoshela kgolaganyo ye Morimo ye e rihile nabo Sinai. Morimo a roma baporofite bagwe go ba thagisa gore ba ikwathaye ba mo obamele gatshi, mbe ba gana go uzwa.

Morimo a athola magoshi othe gka go letelela baba babo go ba gaila. Bogoshi jwa Aseriana, jo bo maata, lehatshe le le shethogo, ba gaila bogoshi jwa Iseraele. Baasiriana ba bolaya baqtho ba le bantsi mo bogoshing jwa Iseraele, ba tshola shengwe le shengwe she she na le boleng, ba hesa bontsi jwa lehatshe.

Baiseriana ba kgobokanya baetyeleripele bothe, bagumi, le baqtho mba ba nale kitso ba ba tsholela Asaria. Baiseraele mba ba gumaneshile qthatya, mba haya ba bolaiwa ga sala bona heri mo bogoshing jwa Iseraele.

Basiriana ba nere batswakwa go rula mo lehatsheng ho bogoshi jwa Iseraaele ye bo le hoho. Batswakwa ba joga gatshi ritoropo je ye ye ja shenwa ba ngwala baiseraele mba ye be see. Rikokomane ja Baeseraele mba ye be ngwee batswakwa ye be bijwa Basamaria.

Baqtho ba bogoshi jwa Juta ba bona jwagka Morimo ya ya a othaela baqtho ba bogoshi jwa Iseraele go thogka go mo rumela le go mo uzwa. Mbe ba jwelela be obamela meringwana ya risetywa le meringwana ya Bakanana. Morimo a romela baporofite go ba thagisa, mbe ba gana go reeja.

Mojwa ga ringwaga ri gka chwara lekgolo Basiriana ba nyeleja bogoshi jwa Iseraele, Morimo a roma Nebukadinesa, kgoshi ya Bababilone go thasela bogoshi jwa Juta. Babilone ye e le bogoshi jo bo maata. Kgoshi ya Juta a rumela go rula lelatya la ga Nebukadinesa ene e mo ruwela mari uwa mantsi ngwaga le ngwaga.

Mojwa ga ringwaga ri sekaenyana, kgoshi ya Juta ya ingaolela Babilone. Bababilone ba boya ba da go thasela bogoshi jwa Juta. Ba chwara toropo ya Jyerusalema, ba shena Tempele, ba ba ba tshola bilo ze bi bothogkwa qthatya ja toropo le Tempele.

Go othaya kgoshi ya Juta mo go ingaoleng gagwe, mashwele a ga Nebukadinasa a bolaya bana ba bantjana ba kgoshi ha pele gagwe ba be be mo hoguhaja. Mojwa ga mmohong, ba tshola kgoshi gore a ye go shwela mo toronkong ya Babilone.

Nebukadinesa le mashwele agwe ba tshola bontsi jwa baqtho ba bogoshi jwa Juta be ba isa Babelone, ba lesha mba ba gumaneshile qthatya go lema masimo. Mo nakong ye yong ha baqtho ba Morimo be gatyelelwa go jwa mo Lehatsheng la Cholohejo go bijwa balelekwa.

Leha ntswa Morimo ye e othaya baqtho bagwe mo bibeng jabo go ba tjinya mo baqthong mba ba lelekilwego, ha ya ta a ba lebala kana a lebala richolohejo jagwe. Morimo a jwelela e thogkomela baqtho bagwe e bola nabo gka baporofite bagwe. A tshepisa gore, mojwa ga ringwaga ri le mashome a supa, ba da go boela Lehatsheng la Kanana gatshi.

Mojwa ga ringwaga ri gka chwara mashome a supa, Siras, kgoshi ya Bapheshia, a henya Babilone, bogoshi jwa Pheshia jwa sukisa bogoshi jwa Babilone. Baiseraele jyaanong ye be bijwa Bajuta gatshi bontsi jwabo ya ba chela bochelo jwabo jothe mo Babelone. Bajuta ba sekaenyana mba ba tsoheego ye be gagkoloshelwa lehatshe la Juta.

Bogoshi jwa Peshia ye bo nonohile mbe ba le mauzweloborogko mo baqthong mba ye be ba henya. Gka bonako a la Siras a rula kgoshi ya Bapheshia, a ntsha molao wa gore mojuta mongwe le mongwe yo ye e bata go boela Juta a gka jwa mo Pheshia a boela Juta. A ba a ba naya mari go joga gatshi Tempele! Mojwa ga ringwaga ri le mashome a supa mo bolelekweng, shethophana sha Bajuta sha boela toropong ya Jyerusalema mo Juta.

Ha baqtho be goroga mo Jyerusalema, ba joga gatshi Tempele le lebotyana go rukuloga toropo. Le ha ntswa ye be shantse be buswa ke baqtho mba bangwe, ye be rula gatshi mo Lehatsheng la Cholohejo be obamela mo Tempeleng.

Polelo ya Baebele go jwa mo go 2 Rikgoshi 17; 24-25; 2 Rikihagalo 36; Esera 1-10; Nehemia 1-13