Go belegwa ga ga Jyeso

Marea ya a le mbeelejwe ngwalo mo mo noneng yo o boitshepo e bijwa Jyosehe. Ha la uwa gore Marea wa icholohei, ye eze gore ha se ngwane. Ye a sha bate go rabisa Marea rithong, mbe a rulaganya go morala e kharile. Pele ga a gka riha jwalo, moegele eda a be e bola naye mo tyorong.

Moegele a re, "Jyosehe, o shegka wa chaba go tshola Marea jwaagka mogago. Moqthwana yo o mo goye o jwa moyeng o boitshepo. O da go belega morwa. Mbije Jyeso (go raya, 'Yahweh o bologkayo'), gkagore o da go bologka baqtho gojwa mo bibeng zabo."

Jyaanong Jyosehe a ngwala Marea mbe a motsholela gaya lagwe jwaagka mogagwe, mbe haise a lale naye go hithelela e belega.

Ha nako ele hautshana gore Marea a belege, puso ya Baroma ya jwela mongwe le mongwe go ya palong toropong gko bosegolwe babo ye be rula gkayo. Jyosehe le Marea ba chwanenwa ke go rihana le leetyo le tyelele gojwa gko ye be rula gkayo mo Nasareta goya Bethelehema gka gore segolo wabo Dafite yo toropo yagwe ye ele Bethelehema.

Ha be goroga mo Bethelehema, yo go sena lehelo la borulo. Kamore ye meyengwe heri ye ya ba gka e bona ye e le lehelo le ye go rula riphologolo gkayo. Moqthwana a beleshelwa gkayo mbe nnale a mo rapega mo bojyelong, gko ye ba sena bolao jwagwe. Ba mbija Jyeso.

Bosigo jo boyong, ga bo go na le barisa mo tshimong ye e hautshana be thogkomei bihutsana zabo. Gka bonako, moegele yo o phatshimayo a iponagaja gobo, mbe ba boiha. Moegele a re, "Shegka la choga, gkagore ke le chwarei rikgang je ri siamego. Mesiya, Morena, na a beleshelwa mo Bethelehema."

"Ya go bata moqthwana, mbe le da go mohithela a le mophuqthelwe ka bibatya mbe e rapame mo botyelong." Gka bonako, loapi la dala baegele be galaleja Morimo, be-re, "Kgalalelo go Morimo legorimong mbe kagiso mo lehatsheng goya baqthong mba o ba atileyo!"

Barisa gka bonako ba goroga lehelong le Jyeso yale golo mbe ba mo hithela a lei mo bojyelong, heri jwaagka moegele ya ya a ba jwela. Ye be ityumei heri qthaqta. Barisa ba boyela ritshimong gko riku jabo ye rile gkayo, be galaleja Morimo gka zothe ze na ba bi uzwa le go bi bona.

Mojwa ga nakwana, banona mba ba bothjale gojwa mahatsheng uwa a idatshe go ya bothaba ba bona naleri ye ha e twaeleshile mo loaping. Ba lemoga gore e raya gore Kgoshi ye etsha ya Bajuta na ya belegwa. Mbe, ba shekela lebagka le letyona go bona Kgoshi ye. Be da Bethelehema mbe ba hithela itu ye Jyeso le bazari bagwe ye be rula gkayo.

Ha banona mba ba bothale be bona Jyeso ana le nnale, ba khubama hatshe mbe ba mo rapela. Ba naya Jyeso rimpho je ri turago. Mbe ebe be boyela gaya.

Polelo mo Baebeleng go jwa go Mathaio 1; Luke 2