16. Bagolori

Mojwa ga losho la ga Joshua, Baiseraele ba shegka ba obamela Morimo le go shaa leleka baqtho bothe ba Kanana kana go obamela Molao wa gwe. Baiseraele ba simololola go obamela meringwana ya baqtho ba Kanana go nale Yahweh, Morimo wa boammaaruri. Baiseraele ye ba sena kgoshi, mongwe le mongwe e riha shengwe le shengwe she ye e akanya gore sha mo siamee.

Gkagore Baiseraele ye be jwelela gka go sha obamela Morimo, a be e ba othaya gka go letelela baba ba bo go ba henya. Baba mba ba iba bilo mo Baiseraeleng, ba shena bilo zabo, ba be be bolaya bontsi jwa bo. Mojwa ga ringwaga je rintsi ba sha obamele Morimo le go gatyelelwa ke baba babo, Baiseraela ba ikwathaya ba kopa Morimo go ba golola.

Morimo a ntsha mogolori yo ye ba golola mo babeng ba bo a be e nere kagiso mo lehatsheng la bo. Mbe baqtho ba lebala gka Morimo ba simolola go obamela meringwana gatshi. Morimo a be e letelela Bamidiana, shethopha sha baba mba ba hautshana, go ba henya.

Bamidiana ba tshola bimela jothe ja Baiseraela ringwaga ri le supa. Baiseraele ba delwa ke poiho; ba be be iphira magageng gore Bamidiana ba shegka ba ba bona. Ba helela be, lelela Morimong gore aba bologke.

Latji lengwe, monona wa Moiseraele yo ye e bijwa Gidione a be e phokhela mo shephiring gore Bamidiana ba shegka ba mo ibela. Moengele wa Morimo a da go Gidione a mo raya are, "Morimo o nale wo, mothabani yo motyona. Doga wa go bologka Iseraele mo Bamidiana."

Ise wa ga Gideon ye e nale aletara ye ye e rihwee moringwana. Morimo a raya Gideon gore a gagole aletare. Mbe Gideon gko ye e chaba baqtho, a be e emela gore go rihe bosigo. Abe e ya go gagola aletare e be e silasila e sala e le bitokana. A joshela Morimo aletare ye e tsha go bapa le ho ya moringwana ye e le hoho, a be e rihela Morimo shethabelo mo go yo.

Moshong baqtho ba bona gore mongwe la a gagola a ba a shena aletare, ba be be kgotjwa. Ba ya itung ya ga Gideone goa go mbolaya, mbe ise a be ere, "Gka go reng le legka go thywisa moringwana weno? Ha e le gore ke morimo, a a itshireleje!" Mahogko uwa a be e riha gore ba shegka ba bolaya Gideon.

Bamidiana be da gatshi go iba mo Baiseraeleng. Ye ba le bantsi thyatya ba sha balege. Gideon a bija Baiseraele go lwa nabo. Gideon a kopa Morimo gore a mo supegeje bikai bi le biberi go rurihaja gore Morimo a gka mo rihisa go bologka Iseraele.

Go bata shesupo sha ntha, Gideone ala ledalo la iku hatshe a be e kopa Morimo gore a weseze monya ha gorimo ga ledalo e seng hatshe. Morimo a riha jwalong. Bosigo jo bo latyelago a kopa gore go rihe khawa mbe ledalo la iku le omelele. Morimo a riha jwalong gatshi. Ritshupegejo je ja riha gore Gideon a rumele gore Morimo a gka mo rihisa le go bologka Baiseraele mo Bamidiana.

Mashwele a Baiseraele ba le riketye rile mashome a mararo le boberi be da go Gideon mbe Morimo a ba jwela gore ba bantsi thyatya. Gideon a be e botsa ba le riketye rile mashome a le maberi le boberi mba ye be chaba go lwa. Morimo a jwela Gideon gore ba santse ba le bantsi. Gideon a ba botseja gaya bothe gkaite ga mashwole ale makgolo ale mararo.

Bosigo jo bo yong Morimo a raya Gideon are, "doga wa kampeng ya Bamidiana mbe ha o gka uzwa gore ba reng, ha ngkagke la thole le weiha." Bosigo jo bo yong Gideon a ya kampeng a hetya a uzwa leshwele la Midiana le jwela tsala yagwe gka tyoro ye e le e lorile. Tsala ya monona are, "Tyoro ye e raya gore mashole a Gideon a dile go henya mashole a Midiana!" Ha Gideon e uzwa she, a obamela Morimo.

Gideon a be e boela mashweleng a gwe a be e naya nngwe le nngwe lenagka, pija le shebonesho. Ba be be rikologa kampa ya mashole a Bamidiana ye ye be leye mogoyo. Mashwele a ga Gideon ye be na le bibonesho mo ripijeng gore Bamidiana ba shegka ba bona leseri la bibonesho.

Mashwele a ga Gideon ba thyuma ripija ja bo nako e le me yengwe, ga shenoga molelo wa bibonesho gka choganyejo. Ba leja rinagka ja bo ba be be gowa be re, "Chaka ya Morimo le Gideon!"

Morimo a tsika Bamidiana, gore ba simolole go lwantshana le go bolaana. Heri mhoyong, Baiseraela bothe ba bijwa magaeng go da go thywisa go leleka Bamadiana. Ba ba bolaya gka bontsi ba ba leleka bothe mo lehatsheng la Iseraele. Bamidiana ba le riketye rile lekgolo le mashome uwa maberi ba shwa laatji le leyong. Morimo a bologka Iseraele.

Baqtho ye be ba ta go riha Gideon kgoshi yabo. Gideon a shegka a rumejana nabo, mbe a ba kopa ripalamenwana ja gouta je ye be ri tshola Bamidianeng. Baqtho ba mo naya gouta ye ntsi.

Gideon a rihisa gouta go riha sheaparo she she kgethyeshilego she she chwana le sha moperesite yo mogolo she ye she apara. Mbe baqtho ba simolola go she obamela henke ke moringwana. Morimo a othaya Baiseraele gatshi gka gore ye be obamela meringwana gatshi. Morimo a letelela baba ba bo go ba henya. Ba helela be kopa Morimo thyuso gatshi, Morimo a ba romelela mogolori yo mongwe.

Kihagalo ye ya boelela ga ntsintsi: Baiseraele be leoha, Morimo a ba othaya, be be bi ikwathaya, Morimo e romela mogolori go ba bologka. Mojwa ga ringwaga ri le rintsi, Morimo wa romela bagolori ba le bantsi go bologka Baiseraele mo babeng ba bo.

Labohelo baqtho ba kopa Morimo gore a ba neye kgoshi jwa agka mahatshe u wa mangwe. Ye be bata kgoshi yo mo tyelele a le thyatya, ebile yo a gkaba etyelela pele mo etyweng. Morimo a shegka a ratya kopo yabo, mbe a ba naya kgoshi heri jwaagka ye be kopile.

Polelo ya Baebele go jwa go Baathori 1-3; 6-8