Laiphy Paw Ei Sua A Va Sui Nawq Kawng

Pathian naq a dotei mawq a nawi mi Eden dwm sung lawq Adam le Evuaq cu a wm hai. Aamu cu angky taho zapu hmaw zy le sen lau mawq a pwmpalawng ma a wm kau nu hai mawq ningzunawq ngai va hai. Zakaw ka le cawmacu amu kha can lawq khanawq suanawq khaw laiphy lawq a va sui lai lau cu law a si. Pathian cu amu pahni a zung kawi khanawq a sei liamaw tawn ei lam leng khemq hai awq birau a thawiq khemq tawn hai.

Amu ca dwm sung law canawq ziatiannawq le thaiqlaunawq a kem thw mi pary maw khaiq a wm rawq. Vawikhaiq cu Evuaq a zung kawi a va sei ei, “Pathian naq dwm sung ei a wm mi thingthai viatei hai hi o va ci a ca le hai maw?” lemawq a haw.

Evuaq naq, “A thu le a thulau hni nawq thingthai a si lau cu a dang thingthai viatei hai cu oq khau a si hai. Halei a thu le a thulau hni nawq thingthai hi cu, oq cu hau lau, na tawng nahmaw na thy aw lemawq Pathian naq a le,” lemawq a swm.

Pary canaq, “Amu ca macu si veq. Halei thingthai hi naa oq zawng nawq thy va ci. Naa oq cawmacu Pathian hu mawq a thu le a thulau khaw naa hni rawq aw lekhaw a hni cu lawq a si,” lemawq a hau piq.

Amu camawq canwnw cu thingthai khaw a cuan ei a do sawq tawiq, a thawiq zawng a tho tawiq aw lemawq a ruiq. Cakhau mawq swmnawq cu zutwq ma i a va nuam aw lemawq a ruiq. Amu camawq a lo ei a oq. Adam zawng a peiq ei a oq sawq rawq.

Sungkhaiq lau mawq aa lung a va swm ei aa pwmpalawng a si khaw aa hniq hai. Cacu lawq thinghnu khaw sovu hu mawq aa tui ei aa sen hai.

Adam le Evuaq cu dwm sung ei Pathian a va sei pau khaw aa thai tyq nawq aa rei hai ei Pathian khaw a tawng ngam ty va hai. Pathian naq, “Adam, zapu law i na wm?” lemawq a au tyq nawq Adam naq, “Bawipu, dwm sung ei na sei pau khaw ka thai. A si nu mawq ka pwmpalawng mawq ka si khaw ka hni cu lawq ka thin a phang ei ka rei,” lemawq a le.

Pathian naq aamu kawi canawq, “Ahu na i naa pwmpalawng mawq naa wm a ca le hai? O lai ciq ka ca le mi hai a thai khabaw naa oq caw siq?” lemawq a le hai. Capupu canaq, “Na pa nawi piq mi canwnw khanawq oq vau mawq a pa peiq ei ka oq,” lemawq a le. Bawipu canaq canwnw kawi canawq, “Zapu cu i amu hamawq na tui?” lemawq a le tyq nawq canwnw canaq, “Pary naq va sei awq a pa hlen ei a pa oq sawq,” lemawq a lei.

Pathian naq pary kawi canawq, “Hi ruang law hanawq namu cu dantaiq na si. Hi saisawqnawq hi namu lawng nawq na in aw. Atw thoq hamawq na ry mawq na lawn hu ei laiphy na oq aw. Namu cu canw hawi naa raw hu ei a teisu le leq na teisu le cu raw a su hai. Canwnw a teisu naq na lw khaw a ca ri aw ei namu naq a keikhawng khaw cwq na zuam aw,” lemawq a le.

Pathian naq canwnw kawi canawq, “Namu cu sutei na hrin tyq nawq naiqnawq a heipy mawq na in aw. Capu a dwnawq khaw na zy hu ei amu cu namu na bawi a su aw. Amu naq a ca wq aw,” lemawq a le.

Capupu kawi zawng canawq, “Namu cu canw a bi na ngai ei o khawq ka ca le mi a thai khaw na oq cu lawq atw kamu naq laiphy cu sai ka sawq caw. Na oq kwm sawq na hwmq nawq vau na nunsung a heipy mawq rian na tuan aw. Na thyq tyq nawq laiphy law na cang kia aw,” lemawq a le. Adam naq a hawinaunw cu Evuaq lemawq ming a sawq. A sylam cu nunnawq peitw le a si ei amu cu a nung mi milai viatei le aa no a si. Pathian naq Adam le Evuaq cu sapho mawq sovu a tui piq hai ei a hei sawq hai.

Pathian naq, “Atw cu milaipu hi a thu le a thulau a hni rawq caw cu lawq nunnawq thingthai zawng hi lo mawq aa oq phwm aw ei aa nung sua hai,” a le hai ei a do a nuam tawiq mi dwm sung law mawq a hawiq thang hai. Dwm sung ei nunnawq thingthai khaw ahu nahmaw o khawq hai sawq lemawq vancung milai hai khaw a cawng sawq hai.

Zenesiq Daw 3 Lawq A Tia Mi Tuanbi