Luiqnawq

Isarel milai hai cu Izimq ram law mawq a sei thang khau caw cu lawq a nuam ngaitei hai. Aani cu saw si ty va hai. Caleng nawq Pathian naq a kamq mi hai ram kawi a sei ca hai. Izimq milai hai zawng naq Isarel milai hai naq a haw mi hai sy, ngun le a man rw pu a dw mi a haw pu poqpoq cu a peiq thw hai. Miphun dang hai zawng Pathian khaw aa zwm rawq ei Isarel milai le hawi nawq a sei thang khemq hai.

Bawipu Pathian naq aamu aa cu lawq nisun lawq khuidawm mai a tung hu mawq le zan can lawq mai tung hu mawq lam a hruai hai ei lam a hwmq sawq hai. Bawipu Pathian cu a zung lawq a wm cuicui ei lam a hwmq sawq hai. Aamu zawng naq Bawipu a hnw khaw a kawiq hai.

A can rai lau mawq Faro siangpahang le a milai hai cu aa lung aa theng maiq kia hai ei Isarel miphun khaw saw lawq hman aa dw kia hai. Bawipu Pathian naq Faro a lung thin khaw a hamtho lawq ei hu mawq a khawn sawq kia nawq a sylam cu Bawipu Pathian cu a ding a thiang ei zungzu a nung mi Pathian pakhaiq lawng a wm pu a si lemi leq. Zehovaq Pathian lemawq a au pu Pathian cu Faro le naq aa biq pu pathian nawqmawq a hei py mawq a lian a hei lekhaw a hni sawq dw cu law hai a si.

Amu camawq Faro le a rawkamq le naq Isarel miphun khaw saw law tai mawq riantuan sawq aa dw hai cu lawq a hnw law mawq a kawiq san hai. Khatyq nawq Isarel miphun le naq Faro a rawkamq le naq a ma va zy san lekhaw a hwmq tyq nawq aamu cu Faro a rawkamq le Raly Sen a kaw lai lawq kaa wm lekhaw aa hni. Cacu lawq a ty tawiq ei, "Kaamu hi zapu cu law i Izimq ram law mawq naa ma au tham ei naa ma sei py tham? Hilei lawq kaa thy thw caw," lemawq aa tamq hai.

Khatyq nawq Moses naq a milai hai khaw, "Naa thinphang khawq uq, Bawipu Pathian naq aamu aa kyq sung law mawq kaa luiqnawq vau a ma tui piq kau te lai," lemawq a le hai. Amu khanawq Bawipu Pathian naq "Raly Sen kawi nawq sei sawq am hai," lemawq a le.

Amu cakhau mawq Bawipu Pathian naq a hmai law mawq lam a hruaitw hai khuidawm mai tung khaw Izimq milai hai le Isarel milai a kaw lai kawi a thawn sawq. Amu camawq rawkamq le naq Isarel milai hai khaw hwmq khau ty lau mawq a wm hai.

Bawipu Pathian naq Moses cu raly kawi khanawq a kyq a reng sawq. Cakhau mawq Bawipu Pathian naq thy a thuzang mawq ralypy cu paihni lawq a then sawq khy. Amu camawq raly lawq lam mawkhaiq a va lang.

Amu khamawq Isarel milai hai cu raly ty vawi le cang mawq a dia hai ei a lailung ei a raunawq lam law mawq a sei hai.

Amu camawq Bawipu Pathian naq khuidawm mai tung khaw a phen tham ei Isarel milai hai a luiq khaw Izimq rawkamq le naq aa hwmq cangku mawq aa hnw kawi kawiq a twm hai.

Izimq rawkamq le cu raly law mawq Isarel milai a hnw mawq a kawiq hai tyq khanawq aa baling aa balang mawq aa doq mawq aa doq hai. Amu kha can lawq khanawq, "Aa zam pa luq, Bawipu Pathian cu Isarel le kawi mawq a tang ei a ma twq caw," lemawq a au hai.

Amu camawq Isarel milai hai cu varaw kawi phawq mawq a luiq tyq khanawq Bawipu Pathian naq Moses a kyq cu a reng sawq kia. Moses naq Bawipu Pathian a hau hu mawq a tui kia tyq nawq raly ty cu cahlan ei ning mawq a cang kia ei raly ei Izimq milai hai cu ty naq a phwm hai ei aa thy thw hai.

Isarel milai hai naq Izimq milai a thyq thw khaw aa hwmq tyq nawq Moses cu Pathian a bi khaw a ma swm khau tw a si lemawq aa zwm. Bawipu Pathian zawng aa zwm ei aa bosan hai.

Isarel milai hai cu Pathian naq thyqnawq sung le saw diahmun law mawq luiqnawq a peiq hai cu lawq aa nuam tawiq hai. Atw cu Pathian khaw zalawngtei mawq aa biq khau caw. Aani naq luiqnawq aa hwmq cu leq rawkamq le aa kyq law mawq aa luiq caw cu lawq Bawipu Pathian khaw aa thang thaiq. Hlu khaw aa tho ei lunglawmnawq puai aa tui.

Bawipu Pathian naq Isarel milai hai cu, "Saw diahmun le Izimq rawkamq le aa kyq sung law mawq luiqnawq aa hwmq ni a phawq tyq poq nawq kwm siatei mawq Lanhlwm Puai naa tui aw. Amu puai a cu mawq a hmu a zung a wm lau pu Dau a tu pu tw khaw naa thu aw. Thynw a te lau pu sangro lawng naa oq aw," lemawq bi a tiam hai.

Exodus 12:33-15:21 law mawq a tia mi tuanbi