Mingai Mirwm Tangvaw A Kawng

Nikhaiq lawq mingai tangvaw pu pakhaiq cu Zisuq a zung kawi a va sei ei, "Sazaw thu, zungzu nunnawq hwmq vau mawq zapu so thu i ka tui aw?" lemawq a haw. "Zapu so thu i lemi cu na pa haw? Pathian pakhaiq lawnglawng mithu a si," lemawq a lei. Cakhaumawq, "Nunnawq sung ei kun na dw a si cawmacu nuabi khaw zy lawq. Calawng canawq zungzu nunnawq cu na hwmq aw," lemawq a swm.

"A si cawmacu nuabi zy vau cu, zapu nuabi i ka bau?" lemawq Zisuq khaw a haw tyq nawq Zisuq naq, "Lai va nawng khawq, canw capu suanawq va tui khawq, rw khawq, bi leiq khawq. Na no le na po khaw wpaiq hai, na milai hawi khaw namu le namu na dawiq hu mawq va dawiq hai," lemawq a le.

Amu camawq tangvawpu naq, "Amu nuabi le ha cu ka hawqtei lawq mawq ka tui thw caw. Zungzu nunnawq hwm vau cu lawq zapu i ka bau lai?" lemawq a haw. Zisuq naq a cuan ei amu ha pu hi cu dw sawq a hawi pu a si lekhaw a hni.

Zisuq canaq, "Miting na si dw cawmacu na ngai pu na sovu viatei khaw zua lawq, na hwmq pu tangkaw cu misynu khaw then hai lawq vancung khui lawq rauso na ngai aw. Amu camawq ka hnw pa va zy," lemawq a le.

Zisuq a hau pu bi khaw mingai tangvawpu naq a thai tyq nawq ngaisiq mawq a sei. Zakaw ka le cawmacu a ngai mi khaw ahu hmaw pei dw va hai. Cacu lawq Zisuq a zung law mawq a sei thang.

Amu ca can law canawq Zisuq naq a hnwzytw le kawi canawq, "Mingai naq vancung pennawq sung kawi kun cu a rw ngai kau. Zakaw ka le cawmacu kala-wq thwm ku sung kawi kun khaw mingai naq vancung pennawq sung kawi kun nawqmawq a nawmq am," lemawq a swm hai.

Bawi Zisuq naq a hau pu bi khaw a hnwzytw le naq aa thai tyq nawq aa khuiruiq aa haw ei, "A si cawmacu ahu i khamqnawq cu a hwm khau ty aw?" lemawq aa haw.

Bawi Zisuq naq a hnwzytw le cu a cuan hai ei, "Si khau veq lemi cu milai le law a wm. Pathian a cu law cu a si khau lau mi zapu hmaw wm veq," lemawq a le.

Peter naq Zisuq kawi canawq, "Bawipu, kaani cu kaa ngai mi kaa sei hlwm thw ei na hnw kaa ca zy pu hi zapu i kaa hwmq aw?" lemawq a haw.

Amu camawq Bawi Zisuq naq a lei pu cu, "Kamu ka ruang ei a in a lai a no le po a ngai pu a bintei mawq a sei hlwm a si cawmacu a leiq zakhaiq mawq a hwmq kia hu ei zungzu nunnawq zawng a hwmq aw. Cacu lawq a hmataw a si mi hai mitampy khaw hnwtw awq a cang hai ei a hnwtw khaw hmaisu lawq a cang hai," lemawq a le.

__