Zohan Typia-innawq

Zekhariaq le Elizabeq a sapu Zohan cu pacang a suiq ei Pathian a bi khaw a au py khau caw. Amu cu ramsung ram caw law khanawq a wm ei thaukaben le khuihlyty khaw a oq. Kala-wq a hmui mawq tu pu angky khaw a hei.

Milai le naq Zohan a hau pu khaw ngai vau mawq ramsung kawi khanawq a va sei hai. Zohan naq, "Naa suanawq a ngaisy uq! Pathian a pennawq a nai caw," lemawq a hau.

Milai le cu Zohan naq thawngthu a hau pu khaw a thai ei aa suanawq aa ngaisy hai cu lawq Zohan naq typia a peiq hai. Biqnawq kawi hruaitw mitampy le zawng Zohan a zung lawq a cawnpiqnawq ngai vau mawq a va sei rawq hai.

Zohan naq biqnawq kawi hruaitw le cu, "Naani cu pary a ei a ciamq pu naa si! Naa thaiqlaunawq viatei khaw a theng lawq naa sua a ngaisy uq. A thai thu a thai lau pu a kung cu hau mawq mairo a su aw," lemawq a le hai. A hlan lawq ei parofet le naq a va hau ci mi khaw, "Cuan ti uq, na hmai lawq ka lamseitw vau mawq ka va thuthang pu cu amu a lam khaw a rem piq aw," lemi bi khaw atw Zohan naq a ting sawq caw.

Isarel milai siokhaiq naq Zohan khaw, "Mesiaq le Mi Khamtw na si maw?" lemawq a haw tyq nawq Zohan naq, "Kamu cu Mi Khamtw si va ni. Ka hnw law mawq a va sei vau tw hi milian mihei a si. Kaw nacu a phaneqhry a tham piq vau nahmaw a tawq va ni," lemawq a le hai.

A thaithw nawq Bawipu Zisuq cu Zohan a zung kawi typianawq in vau mawq a va sei. Zohan naq a hwmq cangku mawq, "Cuan ti uq, laiphy suanawq a sei py vau hi, Pathian tw teitei a si," a le hai.

Zohan naq Zisuq kawi canawq, "Namu typia peiq vau mawq kaw cu a tawq va ni. Namu napaw typianawq na pa peiq vau ka si cu," lemawq a le. Zisuq naq, "Kamu khaw typianawq pa pei kau. Zakaw ka le cawmacu amu ha cu tui vau a si," lemawq a le. Khatyq nawq Bawi Zisuq cu suanawq a ngai lau nu mawq Zohan a zung lawq typianawq a in.

Typianawq a in khau ei ty sung law mawq a va tho sau lawq khanawq Zisuq a siang paw lawq Thiang Tharau cu vainw hu mawq a va tau. Amu ca can lawqtei canawq vancung law mawq Bawipu Pathian a o naq, "Namu cu ka dawiq mi ka sapu na si," lemawq a le.

Bawipu Pathian naq Zohan kawi khanawq, "Namu naq typia na peiq pu a zung lawq Thiang Tharau a va twm ei, amu khaw Bawipu Pathian a sapu a si," lemawq a le. Bawipu Pathian cu pakhaiq lawng a wm. A si nu mawq Zohan naq Bawi Zisuq typia a peiq lawq khanawq, a Po Pathian a zung law mawq o a thai, a Sapu Pathian a si mi Bawi Zisuq zawng a hwmq, cakhau mawq a thiang pu Thiang Tharau Pathian zawng amu naq a hwmq.

__