Filipi Khui Lawq Pawl Le Sailas

Sawl cu Rom wqnawq ram sung viatei khaw a tawn tyq nawq a ming khaw Sawl lemawq au ty lau mawq Rom ku mawq Pawl lemawq a theng. Nikhaiq cu Pawl le a hawipu Sailas cu thawngthubi khaw hau vau mawq Filipi khui kawi aa sei hai. Aa pahni mawq khui a leng ei tyvukam lawq milai aa tabua mawq aa wmnawq kawi khanawq thu cam vau mawq aa sei hai. Amu law canawq a man a ry mi puan sen a zua pu Lidia hawi nawq aa tawng hai. Amu milainw cu Pathian a bi mi a si.

Zisuq a thawngthubi khaw a cauhlannawq vau mawq Bawipu Pathian naq a thinlung a hawn piq. Amu camawq Lidia le a insungkhua cu typia aa in. Lidia naq Pawl le Sailas cu ka in law va tung uq lemawq a sawm hai ei aa tun.

Pawl le Sailas cu thucamnawq hmun law nawq milai a tampy hawi aa tawng hai ei aa pwm hai. Amu ca hmun kawi aa sei siatei lwm khuivang naq a tui pu saw hawqnw naq a va kawiq hai. Amu milainw cu lwm khuivang canaq hmai kawi a su hu vau kawng khaw a hau sawq khau cu lawq a bawi khaw tangkaw a tampy a hwmq sawq.

Amu milainw canaq Pawl le Sailas le aa seinawq kawi a sei rawq ei, "Halei hi Cung Nung Cem Pathian a saw le a si hai. Naamu khaw zapu tui mawq i khamq naa su aw lenawq kawng khaw aa ca swm hai!" lemawq aa sei khemq nawq siatei a au cuicui cu lawq Pawl cu a ai puang.

Nikhaiq cu cahlan ei hu mawq a au kia ei Pawl naq a mia paleiq awq a sung khua ei a wm pu khuivang thulau, "Zisuq ming mawq amu law khamawq suiq thang!" lemawq a hawiq thang.

Cacangku mawq khuivang cu a suiq thang ei, saw hawqnw a bawi le cu aa thin aa haw ngaitei. Zakaw ka le a si cawmacu milainw a sung law mawq hmai kawi kawng a hautw khuivang cu a tawi thang caw cu lawq milainw cu hmai kawi kawng hau khau ty veq. A hau khau ty lau cu lawq a bawi le naq tangkaw ma hwmq piq khau ty veq le aa hni cu law a si.

Cacu lawq sawnw a bawi le naq Pawl le Sailas cu aa tai hai ei Rom milai bicai bawi a hmai lawq aa sui py hai. "Aani hi Zudaq milai a si hai. Kaa khui sung lawq hnuhnoqnawq aa tui," lemawq aa le hai. Amu camawq Rom rawkamq naq a heipy mawq aa zei khau hai mawq thawng aa thawq hai.

Rom wqtw bawi le naq Pawl le Sailas cu thing twm lawq a kei a cei sawq hai ei, aa wm sawq hai. Cakhau mawq a cawngtw zawng naq rawringtei mawq aa cawng. Aani pahni cu zan a twm khau mawq thawng sung lawq Bawipu Pathian cu aa thangthaiq hai ei hlu aa tho.

Hlu aa tho liamaw lawq canawq ling a va hen ei, thawngin suiqkhaw cu aa hawng thw. Thawngtu le aa hennawq thiary cu aa caiq tham thw.

Thawngin bawi naq thawngin suiqkhaw naq hawng thw khaw a hwmq tyq nawq a cawn ei a ty ngaitei. Thawngtu viatei aa zam thw ca hai lemawq a ruiq. Cacu lawq amu le amu mawq ka thaiq aw lemawq a twm. Zakaw ka le cawmacu thawngtu a luiq thw a si cawmacu Rom wqtw le naq a pa thu aw lekhaw a hni cu law a si. Pawl naq amu le amu mawq a thaiq twm khaw a hwmq tyq nawq, "Namu le namu mawq rwnawq a pei khawq, kaa bintei mawq kaa wm thw kau!" lemawq a heipy mawq a au.

Thawngin bawi cu a cawn thiatei mawq Pawl le Sailas kawi canawq, "Khamqnawq hwmq oq cu lawq zapu i ka tui aw?" lemawq a haw hai. "Bawipu Zisuq khaw zwm law khamq na su aw, namu le na insungkhua mawq khamqnawq naa hwmq aw," lemawq aa swm. Amu camawq thawngin bawi naq Pawl le Sailas cu a in kawi a sei py hai ei aa hmu le khaw a khei piq hai. Pawl le zawng naq Zisuq kawng thawngthu khaw aa cawnpiq rawq hai.

Thawngin bawi le a insungkhua cu Zisuq khaw aa zwm ei typianawq aa in. Cakhau mawq aa in lawq hmunkhaiqtei mawq sawq aa dwm khemq.

A thaithw nawq Rom a wqtw bawi naq palyq bawipu kawi khanawq Pawl le Sailas khaw a va luiq sawq hai lemawq a le hai. Pawl le naq, "Kaani cu Rom milai kaa si nu mawq suanawq ngai lau mawq thawng na ma thawq. A phytei mawq sei sawq na ma twm kia. Si khau veq. Rom bawi le hehen nawq ma va luiq sawq hai sawq," lemawq a le hai. Palyq le naq Rom wqtw le cu aa swm hai ei amu camawq Rom bawi le naq ngaithiam aa haw khau hai mawq Filipi khui law mawq a dang kawi sei kau uq lemawq a le hai. Amu camawq a hawi le khaw aa biq so hai ei aa sei hai. Aa phawqnawq kwmq lawq thawngthubi a hau ei Khariqfawbw zawng aa kawq tymaw hai.

Pawl le a dang a hnwzytw le cu khuikhaiq hnw khuikhaiq mawq aa tawn ei thawngthubi aa hau. Aani naq zwmtw aa wmnawq kengkwmq kawi khanawq cu aa kui hai. Siokhaiq cukui hai cu Baibacu sung lawq kaa hwmq khau.

Lamseitw cu-wq 16:11-40 law mawq a tia mi tuanbi