Pathian Naq Zosef Le A Insungkhua A Khamq Hai

Kwm le can, ni le thu a liam lawngmang ei Zakomq zawng a wpu ei tawlam a pan caw. Nikhaiq cu a dw cem mi naq a hrin piq mi a sapu Zosef khaw tw le mei le saty a cuanmintw hai a wtei le a zung kawi a sei sawq.

A si nu mawq Zosef a wtei le naq aa nautei Zosef cu rem va hai. Zakaw ka le cawmacu aa po naq aamu nawqmawq Zosef khaw a dawiq am a leng awq Zosef naq a mang ei a wtei le a wq aw hai lemawq mang a man cu law nawq a si. Cacu lawq Zosef khaw aa zung kawi a phawq khamawq aa tai ei saw a lai pu hai soleiq le a zung law aa zua.

A wtei le cu in kawi a leiq kia hlan khanawq Zosef a angky khaw a bawkhy thw. "Saram a thy sung law noq pawq kaa po naq a hwmq tyq nawq saram hrang naq a ko thaiq lemawq a ruiq aw," a le ei tw a thy sung law aa noq khau mawq aa po a zung kawi sei hai awq aa hwmq sawq. Aa po naq a hwmq ei a ngai a si ei a tamq cuicui.

Saw a lai pu hai canaq Zosef cu Nai tyvu ham ei a wm pu ram heipy Izimq ram kawi khanawq a sei py. Izimq ei bawi a tuan pu a zung law nawq Zosef cu aa zua. Calaw canawq rian khaw a thutei mawq a tuan. Pathian zawng naq thasuinawq a peiq.

Vawikhaiq cu a bawipu a hawinaunw naq Zosef cu a dw cu lawq a lem. Zosef naq cahu pu cu Pathian a dw lau pu a si lekhaw a hni cu lawq a ei thang. A bawipu a hawinaunw naq a pa dw henhen veq lemawq a thin a haw ei a hawinaupu a zung lawq, "Tai heng a pa dwm ei a heipy mawq au nawq a angky zawng a zam hlwm," lemawq a swm. Amu camawq a hawinaupu naq Zosef cu thawng a thawq. A si nu mawq Zosef cu Pathian khaw a bosan ei Pathian naq thasuinawq a peiq.

Thawng sung lawq kwmhni sung a wm. Zosef cu a suanawq a wm lau nu mawq thawng law mawq luiq khau va lai. Nikhaiq cu Izimq siangpahang pu naq a lung tuai ngaitei mi mang mawhni a sawq. Ahu nahmaw a mang cu a sylam leiq piq khau va hai.

Pathian naq siangpahang pu a mang cu Zosef khanawq a sylam a leiq khau vau mawq a bawm. Cacu lawq siangpahang pu a hmai lawq dia mawq a mang sylam cu a leiq piq. A mang sylam cu Pathian naq Izimq ram lawq kwmsary sung kwmvawi a thaiq sawq hu ei ngainawq a suiq aw. Cakhau mawq kwmsary sung pamnawq a sui sawq aw lenawq a si.

Faro siangpahang cu Zosef a cung paw lawq a lung a lawm tawiq ei cacu lawq Izimq ram ei amu a sangtw a pahni nawq nuangaitw lawq rian a peiq.

Zosef naq kwmvawi a thaiq kwm kwmsary sung lawq Izimq milai hai cu sawq a khawn sawq hai. Amu camawq kwmsary sung pam a va sui tyq khanawq aamu aa oq kwm a leng khanawq aa zua vau tampy a wm lai.

Izimq ram law lawng pam a sui si lau mawq Kanan ram ei a wm mi Zakomq le a insungkhua zawng pamnawq a suihno rawq hai.

Cacu lawq Zakomq naq a suteipu le kawi canawq Izimq ram kawi kangphia vau mawq a sei sawq hai. Zosef a wtei le cu sawq lai vau mawq aa nautei Zosef a hmai lawq a dia nu hai mawq Zosef a si lemawq lwmq ty va hai.

Sawq lai vau mawq Zosef a hmai ei bi a haw thw khau hai mawq Zosef naq a swm hai. "Kamu cu naamu naa nautei Zosef ka si. Pa ty khawq uq! Ka wtei le naq saw vau mawq naa pa zua kau nu mawq Pathian naq naa ruiqnawq a thu lau pu khaw a thu pu kawi a theng sawq. Ka wtei le naa bintei mawq Izimq ram kawi naa va loq thw aw. Naa wm naa thwq nawq naa oq naa din naa zy naa sen vau kamu naq ka ca rin thw hai. Tavuan ka ca lawq hai," lemawq a le hai.

A wtei le cu in kawi a phawq tyq khanawq Zosef cu thy veq lemawq aa po khaw aa swm. Aa po cu a lung lawm ngaitei.

Zakomq cu a taw tawiq kau caw nu mawq aa in sung pwmtei mawq Izimq ram kawi a va pem thw hai. Zakomq cu a thyq hlan nawq a sutei le pakhaiq cio khamawq thasuinawq a peiq hai.

Bawipu Pathian naq Abaraham a zung ei a bikam cu Isak law mawq Zakomq, Zakomq law mawq a sutei le pahlaihni a cung paw ti aa hwmq thw. A sutei le pahlaihni cu Isarel miphun phunhlaihni law aa cang hai.

Zenesiq daw 37 - 50 law mawq a tia mi tuan bi