Isarel Ram Sung Law Mawq Hawiqthangnawq Le A Leiqkianawq

Isarel ram le Zudaq ram aa ramhni mawq Bawipu Pathian khaw aa raw san. Aani naq Sinai tang ei Bawipu Pathian hawi ei bikamnawq a ngai pu khaw aa roq caw. Bawipu Pathian naq aa ngaisy hai salawq amu khaw aa hni thaw kia ei aa biq kia nawq vau mawq Pathian a bi a hau sin vau hai khaw a thu thang hai ei a swm sawq nu hai mawq aani naq rawrinnawq aa peiq mi hai khaw zapu hmaw rei va hai.

Cacu lawq Pathian naq aa raw le khaw a tho sawq hai ei aa ramhni khamawq a twq sawq hai. Aa raw le kawi khaw tainawq nua a peiq hai ei Isarel ram le Zudaq ram cu dan a taiq hai. Isarel le cu a thuzang aa thawng ei mithulau a si mi hai Asiria siangpahang naq a twq hai ei a tai hai. Asiria milai hai naq Isarel milai hai cu aa thu hai ei hmun tampy lawq mai mawq ro hai awq calawng si lau mawq aa ram sung ei a man a thu mi so hai khaw a lawq piq thw hai.

Asiria miphun le naq Isarel ram ei hruaitw hai le mingai mirwm hai le swmnawq a ngai mi hai khaw Asiria ram kawi a seipy hai. Isarel ram law cu thyqnawq law mawq a luiq mi hai misynu lawng khaw a tang so hai.

Asiria miphun le naq ramdang milai hai khaw a roq ci mi Isarel ram kawi aa seipy hai. Ramdang milai hai naq a roq mi khuipy khaw aa rem. Amu ramdang milai hawi a hawi hai ei a hrin mi Isarel hrinsua hai cu Samaria miphun lawq aa cang hai.

Bawipu Pathian khaw aa zwm lau le a bi aa ngai dw lau cu lawq Isarel ram cu dantaiq a si khaw Zudaq miphun le naq aa hni nu mawq Kanan milai naq aa biq pu pathian le a nawisuang pu a zwq le khaw aa biq cuicui kau rawq. Bawipu Pathian naq a bi a hau piq vau hai khaw a zung kawi a sei sawq hai ei rawrinnawq a peiq kau hai nu mawq ngai dw hlai va hai.

Asiria le naq Isarel ram khaw a roq khau mawq kwm zakhaiq twq a rai khanawq Nebukhaqnezer cu Zudaq ram khaw lawq vau mawq Pathian naq nua a peiq. A thuzang a thawng pu Babilon siangpahang Nebukhaqnezer naq Zudaq siangpahang cu a tai. Cakhau mawq Babilon lawq saw law a tang hai ei kwm siatei mawq tangkaw a tampy khaw aa peiq cuicui.

Kwm cawmpai a rai khau mawq Zudaq siangpahang naq Babilon siangpahang cu a dau. A si nu mawq Babilon naq Zudaq ram cu a twq thaw kia ei a tai kia. Aani naq Zerusalem khui ei Biqin khaw a roq thw. A man a sung pu sy le ngun le khaw aa lawq thw hai.

Babilon rawkamq le naq a dau mi hai le khaw dantaiqnawq a cu lawq Zudaq siangpahang Zedekiaq a sapu khaw amu a miq hwmq ei aa thu a leng awq amu zawng khaw a miq a co sawq. Cakhau mawq Babilon thawngin kawi a seipy ei thawng sung lawq a thyq ti aa wm sawq.

Nebukhaqnezer le a rawkamq le naq Zudaq milai a tampy khaw Babilon ram kawi a seipy hai. Misynu cem pu le khaw Zudaq ram lawq lau tho rian tuan vau mawq a sei hlwm hai. Cahu mawq Pathian a milai hai cu bi a kam pu hai ram law mawq a sei thang lawq can khaw a ram law mawq hawiq thang can lemawq aa au.

Bawipu Pathian naq amu a thwm pu hai miphun le khaw dantaiqnawq cu lawq a hawiq thang kau nu hai mawq a milai hawi bi aa kam pu hai khaw heithu veq. A milai hai khaw a cuan hai ei amu a bi a swm sawq pu hai a zung law mawq bi a hau liamaw kau. Kwm sawmsary khau mawq bi ka ca kam nawq hai ram kawi naa leiq kia aw lemawq bi a tiam hai.

Kwm sawmsary a rai khau mawq Pasia siangpahang Sairas cu Babilon khaw a twq ei a tai cu lawq Pasia naq a wq sy vau ram lawq Babilon wqnawq ram viatei zawng khaw a cang thw. Isarel miphun sung ei mitam am hai cu Babilon ram law nawq khui aa sawq. A kwm a cang ci mi Isarel miphun cawmtei lawng naq Zudaq ram khaw aa ngai.

Pasia a wqnawq ram cu aa thuzang a thawng nu mawq aamu naq aa tai mi hai miphun le a cung paw lawq zangnaiqnawq, zawnruiqnawq aa ngai. Siangpahang Sairas cu Pasia siangpahang a si ei a rau hlan awq Isarel milai kawi khanawq Zudaq ram kawi a leiq kia dw mi cu naa leiq kia khau lemawq thawng a thanq. Biqin sawqnawq vau a hria pu tangkaw zawng a peiq hai. Kwm sawmsary sung saw a can khau mawq Isarel miphun a cawmtei am lawng khaw Zudaq ram Zerusalem khui kawi aa leiq kia hai.

Amu miphun micawmtei cu Zerusalem a phawq tyq nawq Biqin le khui dwmnawq khaw aa sawq thaw hai. Aani cu Pasia kyq thui lawq aa wm nu hai mawq aamu bi a kam pu hai ram kawi aa leiq kia hai ei, Biqin sung law mawq Pathian biqnawq canthu khaw aa hwmq kia.

__