Bawi Zisuq A Va Twm Kia Nawq Kawng

Bawi Zisuq thyqnawq law mawq a tho kia khau mawq kwm thawnghni a rai caw. Laiphy paw ei a wm pu milai viatei naq Mesiaq Mi Khamtw a kawng thawngthu a thai khau nawq vau mawq a lam tampy mawq thawngthubi a au py cio. Khariqfawbw zawng a thang sau caw. Bawi Zisuq naq a hnwtwcem ni lawq ka va twm kia aw lemawq bi a tiam so hai. Atw can nawq a va suiq lai lau nu mawq a bi tiam so mi hu mawq a va twm kia hrwhrwm aw.

Bawi Zisuq a va twm kia nawq hu a can khaw kaa hru lawq sung hanawq kaani naq a thiang hlwm mi nun can zizaw mawq amu khaw wpaiq peiq mawq ka thangthaiq vau khaw a dw. A pennawq kawng khaw midang swm sin hai sawq lekhaw a dw. Bawi Zisuq laiphy paw ei a va len lawq khanawq a hnwzytw le kawi khanawq, "Khui kengkwmq kawi va sei lawq Pathian pennawq thawngthu khaw va swm sin hai uq," lemawq a swm hai. "Hmun kengkwmq ei a wm mi hai aa zung lawq naa swm thw khau hai mawq ka va twm aw," lemawq a swm hai.

Zisuq a kawng a thai lai lau pu mitampy a wm hai. Zisuq van kawi a kai hlan khanawq a hnwzytw lekhaw a thawngthu hau vau mawq bi a cu so hai. "Va sei law miphun viatei khaw a pa zy tw va sa sawq hai uq! Sacang u a zu caw," lemawq a le hai.

Bawi Zisuq naq a le mi hai cu, "Sinwm cu a bawipu nawqmawq hei am veq. Laiphy paw ei bawi le nuangaitw hai cu kamu a pa hryq hu mawq naamu zawng kamu ka ruang lawq hemnawq naa in aw. Kamu ka ruang lawq thu naa tawng aw. Naani cu hi laiphy paw law synaiq temnawq naa in kau nu mawq kamu naq hi laiphy ei nuangaitw Seitan cu ka tai caw. Kha khaw naa hni a si caw macu hnungamnawq naa hwmq aw. A dawngnawq ti mawq swmqtei mawq wm kau uq! Naani cu Pathian naq a ca khamq aw hai."

"Hi laiphy a dawngnawq can a phawq kawi nacu milai hai hi zapu tui mawq i aa tui hai lemi kawng khaw Bawi Zisuq naq tausunnawq hawi hamawq a swm hai: "Milai pakhaiq naq laituang sung lawq thaicy thu khaw a vaw. Thaicy vawtwpu a ythaiq lawq sung awq a rawpu khaw a va sei ei thaicy a vawnawq law canawq laubeicy khaw a vaw sy ei a sei hlwm."

"A kung a va khau tyq nawq a riantuanpu pakhaiq naq, 'Bawipu, Bawipu, thaicy a thu pu khaw laituang sung law na vaw a si ve? Zakaw i laituang sung lawq laubei kung zawng a va khau rawq?' lemawq a haw. "Hi laubei a khau sanawq lemawq ka rawpu khaw a va sei ei a cy a vaw pu a su aw," lemawq a lei.

"A riantuanpu canaq, 'A si cawmacu laubei kung hai hi ka po thang hai maw?' lemawq a haw tyq nawq, 'Ca macu tui va pi. Sawq kung hi a pawiq thang sy sua hai. Ka u kawi tw naq laubei kung hai cu kaa pwm hai ei mai ro a su la hai. Sawq a thai hai cu ben sung lawq rawn a su la hai,' lemawq a le."

A hnwzytw le naq Zisuq naq a swm pu hai tausunnawq cu hniq khau va hai. Cacu lawq Zisuq kawi canawq, "A sylam ma swm lawq," lemawq aa le. Zisuq naq, "A thu mi thaicy a vawtw cu Mesiaq khaw a hau dw pu a si. Laituang cu laiphy cung paw khaw a hau dw. A thu pu thaicy cu Pathian pennawq ei a wm pu hai khaw a le dw mi hai a si," lemawq a le.

"Laubei kung cu Seitan naq a hman mi milai khaw a hau dw pu a si. Laubeicy a vaw pu cu Seitan a si. A thaipaw zun can cu hnwtwcem can khaw a hau dw. Sawq a tuantw hai cu vancung milai hai khaw a le dw mi hai a si."

"A hnwtwcem laiphy a roq can a phawq tyq nacu Seitan hawi ei peitaipu milai hai cu a khawm hai ei maiphw a ling ngaitei mi sung lawq vaw phwm su hai awq ca maiphw sung law a thy khau lau pu mai naq a kang hai ei a tamq cuicui hai. Zisuq a zwm pu miding a si mi hai tw cu Pathian pennawq sung lawq ni hu mawq aa ceu hai."

Bawi Zisuq cu hi laiphy a roq hlan nawq a va twm caw. A hmataw a va sui taw lawq ei milai mawq a va sui lawq ei hu mawq mairang sung law mawq amu cu pwm neitei mawq a va twm kia aw. A va twm tyq nacu a thy ci mi zwmtw hai zawng a va tho thaw kia hai ei amu hawi nawq vancung law a tawng hai.

Bawi Zisuq a va twm ti a nung lai mi hai zwmtw le cu mairang kawi a kai hai ei thyqnawq law mawq a tho kia pu zwmtw le hawi nawq hmunkhaiq mawq a tawng thw hai. Cakhau mawq Zisuq cu a milai le hawi nawq a tamting pu dainawq a leng awq lungkhaiq thinkhaiq tei mawq a leng khemq hai.

Bawi Zisuq naq amu a zwm pu hai cu a bintei mawq nunnawq sy lwkhw ka peiq hai lemawq bi a tiam so hai. Ani cu Pathian hawi nawq hnungamtei mawq a wm khemq hai ei a zungzu mawq a wq hai.

Zisuq Khariq a zwm lau pu hai milai viatei hai cu Pathian naq bi a cai hai. Aani cu naiqnawq khaw a in hu ei mai sung law vaw phwm a su hai. Mailing sung law canawq zang naq caiq lau mawq a oq zungzu hai.

Bawi Zisuq a va twm tyq nacu amu hentei nawq Seitan naq a wq pu viatei khaw a roq thw hai. Cakhau mawq Seitan le Pathian a zwm dw lau mi hai cu a aw hluamaw pu mai nawq a zungzu mawq a kang hai.

Adam le Evuaq naq Pathian a bi ngai lau cu lawq laiphy paw lawq suanawq a va wm. Pathian naq hi laiphy cu suanawq ka kawq sawq hu ei, a hnwtw nawq ka roq thw aw lemawq a va le. A si nu mawq Pathian naq nikhaiqkhaiq nacu van thaw le laiphy thaw a nawi kia aw.

Bawi Zisuq le amu a milai hai cu laiphy thaw law canawq aa wm hai. Laiphy thaw ei aa wm pu viatei hai cu amu naq a wq hai. A miqthy viatei khaw a hrwq piq hai. Rwhawnawq zawng wm ty aw veq. Ngaisiqnawq wm aw veq. Tunawq zawng wm ty aw veq. Thyqnawq zawng wm ty aw veq. Bawi Zisuq cu amu a pen pu ram cu a zungzu mawq a zungzu tidainawq le ruannawq mawq a wq la hai.

__