Pathian A Bi A Hautw Hai

Isarel tuanbi a thuang thuan mawq Bawipu Pathian naq Pathian bi a hau sin vau mawq milai khaw a thu piq tham hai. Amu Pathian bi a hau sin tw hai cu Bawipu Pathian a zung lawq a bi khaw a ngai khau mawq milai hai a zung lawq aa swm sin hai.

Isarel miphun le khaw Ahamq siangpahang naq a wq lawq can sung law khanawq Pathian bi a hau piq vau mawq Elaizaq a le mi pu a wm. Ahamq siangpahang cu a ram sung milai hai khaw, "Balaq" a le mi pathian a hman lau pu khaw naa biq aw lemawq a heiq san mi bawi thulau a si. Cacu lawq Bawipu Pathian a dantaiqnawq bi khaw amu hamawq a hau sawq. Elaizaq canaq, "Khui le damqty le khaw Isarel ram sung lawq wm sawq lemawq ka le hlan sung van paw lawq wm aw veq," lemawq Ahamq bawipu khaw a swm. Amu bi a thai pu khanawq Ahamq bawipu cu a thin a haw sawq ngaitei.

Bawipu Pathian naq Elaizaq khaw thu vau mawq a hoq pu Ahamq a zung law mawq a luiq sanawq lemawq ramsung kawi tyvutei a ham lawq na va rei aw lemawq Elaizaq cu a swm. Zingtwm zang kawi mawq langawq naq sangro le su khaw a va peiq tawn. Ahamq a rawkamq le naq a hoq nu mawq hwm va hai.

Khui a kang khaw a le tawiq caw cu lawq tyvutei ti mawq ty a kyq thw. Cacu lawq Elaizaq cu aa inpu ram a nai nawq kawi a sei ei lamainw le a sapu a wm nawq in lawq a suiq. Cakang a si ei oq din a rw tawiq cu lawq aa oq vau sawq khaw a sam deng caw nu mawq lamainw le a sapu naq Elaizaq khaw sawq aa dang, aa in law aa wm sawq. Bawipu Pathian naq a bawm cu law hai nawq aa in sung khaw aa oq vau sangro le saty khaw sam thiam veq. Sawq a rw, cakang a sui sung ruantei, aani cu oq kwm din kwm mawq aa wm hai. Elaizaq cu kwm a sau nawn amu cu ram law canawq a wm.

Kwm thwm le sio a rai khau mawq Pathian naq khui a sua sawq hu caw cu lawq Isarel ram kawi leiq kia mawq Ahamq bawipu hawi birau thawiq vau mawq Elaizaq cu a swm. Elaizaq le Ahamq cu a tawng hai ei, "Na va leiq kia leq, rwhawnawq a sui sawq tw cu namu na si!" lemawq Ahamq naq a le. Amu camawq Elaizaq naq, "Bawipu, namu capaw rwnawq a phawq sawq tw cu na si cu. A hman mi Zehovaq Pathian khaw na vaw tham ei Balaq pathian le khaw naa biq hai. Isarel ram ei aa wm mi milai hai a bintei mawq Kamel tang kawi va sei py hai," lemawq a swm.

Isarel ram ei a wm pu milai hai le Balaq pathian a bi a hau sin tw zaly le sawmngu zawng Kamel tang kawi canawq a sei rawq hai. Amu camawq Elaizaq naq a tho py hai ei, "Kha can ti i naa thinlung cu Bawipu Pathian hawi naa hlaiq sawq aw? Zehovaq cu, a hman pu Pathian a si cawmacu amu cu bi uq. Balaq zawng a hman pu pathian a si cawmacu amu cu bi uq," lemawq a le hai.

Cakhau mawq Elaizaq naq Balaq pathian bi a hau tw hai kawi canawq, "Cotwm mawkhaiq khaw thaiq lawq raithawi vau mawq aa twm uq. A si nu mawq mai khaw hmang khawq uq. Kamu zawng amu camawq ka tui rawq aw. Biqtheng khaw mai a kang sawq tw Pathian cu Pathian tawqtawq a si," lemawq a le. Balaq pathian a bi pu hai hruaitw hai cu biqtheng khaw aa tui, aa rem sun. A si nu mawq mai ro va hai.

Amu camawq Balaq pathian a bi a hau piq pu hai cu Balaq pathian kawi canawq, "Ngai lawq, Balaq pathian!" lemawq aa haw. Nitanu aa au hai ei thu aa cam. Amu le amu khaw nam mawq a aiq hai ei naiqnawq aa pei khau mawq thu aa cam. A si nu mawq a pathian naq bi lei va hai.

Nitanu a rai khau mawq Elaizaq cu Pathian khaw biq vau mawq biqtheng khaw a tui. Cakhau mawq milai hai kawi canawq typung a heipy pung hlaihni a bei pu ty mawq su le thing biqtheng a ham ei a wm pu laiphy a bintei a ceiq thw vau mawq biqtheng khaw a tawi sawq hai.

Elaizaq naq, "Abaraham, Isak, Zakomq le a Pathian, Bawipu cu Isarel miphun le a Pathian na si nawq le kamu cu Bawipu na saw ka si nawq le Bawipu cu a ding pu Pathian na si nawq khaw a phi pa pei lawq aani ruantei nawq a ca hni khau nawq vau mawq a lang sawq kau," lemawq thu a cam.

Van paw law mawq hlyqhleq mai a va tu ei su le thingcang le lung, vyty le biqtheng a ham ei a wm pu ty ruantei zawng mai naq a kang thw. Amu kha ruantei khaw milai tampy naq aa hwmq thw tyq nawq, "Zehovaq cu Pathian, Zehovaq cu Pathian a si," lemawq a boq hai awq aa biq.

Cakhau camawq Elaizaq naq, "Balaq pathian a bi hau piq pu hai cu pakhaiq hmaw luiq sawq khawq hai uq," lemawq a le hai. Milai hai canaq Balaq pathian a bi a hau piq pu hai cu tai hai awq a thu thw hai.

Cakhau mawq Elaizaq naq, "Khui a sua aw caw, atw a rannawq mawq khui kawi a leiq kia ni! Zehovaq Pathian naq khui a kang nawq khaw a sam sawq caw ei a ding mi Pathian a si nawq khaw a lang sawq caw," lemawq Ahamq bawipu khaw a swm.

Pathian a bi a hau piq tw Elaizaq a hnw mawq Elaisa a le mi khaw Pathian naq amu bi a hau piq vau mawq a thwm. Elaisa naq kharuiqhawnawq a tampy a tui. Ty sawq a hawi pu pavun naiqnawq a inq tw raw bawipu Naman a zung lawq kharuiqhawnawq mawkhaiq a sui sawq. Amu ca milaipu cu Elaisa a kawng khaw a thai tyq nawq amu a zung kawi damnawq hwmq vau mawq a sei ei Elaisa naq Zawdan tyvu sung lawq vawisary a va noq lemawq a swm.

Kha tyq nawq Naman cu a thin a haw ei amu ca hupu mawq a tui pu cu mangu a su aw lemawq a ruiq cu lawq a ham tho lawq cu a ei. A si nu mawq a lung a theng kia ei Zawdan tyvu sung lawq vawisary a noq phwm. A hnwtw cem a noq khau mawq a naiqnawq a hmu ruantei a dam thw. Pathian naq a dam piq sawq thw.

Bawipu Pathian naq amu bi a hau sin vau mawq mitampy a thuthang hai. Aani naq Isarel miphun hai khaw a zwq nawisuang pu biq lau vau le theidannawq ngai lau mawq dawiqnawq ngai vau khaw aa swm hai. Pathian a bi khaw ngai lau mawq suanawq khaw naa tui liamaw thauthau a si cawmacu sua dantaiq na su aw lemawq rawrinnawq aa peiq hai.

Isarel milai hai cu vawi tampy Pathian a bi khaw ngai dw va hai. Aani naq Pathian a bi a hau tw hai khaw atw le atw mawq aa hem hai. A cancan nawq aa thu ben hai. Vawikhaiq cu Pathian a bi a hau tw Zerimiaq khaw a thyq sanawq lemawq tykhua a thwmq pu a ta rawn ei tintoq sung law a thawq phwm. A si nu mawq siangpahang pu naq a zang naiq ei a thyq hlan nawq tykhua sung law mawq doq thang uq lemawq nua a peiq hai.

Milai naq hryqnawq le rem lau nawq a tawng kau nu hai mawq Pathian a bi khaw aa thai vau mawq aa au py kau. Ngaisynawq ngai lau mawq ka tui bi mawq ka tui thiamthiam aw naa le a si cawmacu Pathian naq dan a ca taiq hai ei roqramnawq na hwmq aw lemawq rawrinnawq a peiq hai. Mi khamtw a va sui hu nawq kawng zawng milai hai khaw aa swm hlang hai.

__