A Hmy A Theng Nawq Kawng

Nikhaiq cu Zisuq naq Pite le Zem le Zohan khaw a au hai ei aamu lawng mawq tang sang mawkhaiq kawi a kai py hai. (Typia peitw Zohan si lau mawq midang Zohan pakhaiq a si.)

Zisuq cu thu a cam lawq nawq a hmysam a va theng ei a sovu cu a vang tawiq mi hu mawq a ran mawq a rang. Amu twq a vang le a rang mi hu macu ahu nahmaw tui khau va hai.

A hnwzytw pathwm naq Moses le Elaizaq khaw a va lang hai ei Zisuq hawi bi a hau khemq khaw aa hwmq hai. (Moses le Elaizaq cu a hlan lawq py ei Pathian naq a va hman mi hai a si hai.) Aani cu a rau hlan awq Zerusalem khui lawq Zisuq a thyq hu nawq kawng khaw birau aa thawiq khemq hai.

Moses le Elaizaq le Zisuq mawq birau a thawiq pu hai khaw Pite naq a cuan hai ei a dw tawiq cu law hai awq, "Sazaw, halei law wm hi a nuam. Tham mawthwm mawq kaa sawq aw, namu na cu law mawkhaiq, Moses a cu law mawkhaiq, Elaizaq a cu law mawkhaiq mawq," lemawq a le. Pite cu amu le amu mawq zapu bi i ka hau lekhaw hniq veq.

Cahu mawq Pite naq bi a hau liamaw lawq canawq mairang naq a va zen hai ei mairang sung law mawq o mawkhaiq naq, "Amu hi ka dawiq mi ka Sapu a si. A bi khaw ngai uq!" lemawq a va le hai. Amu khaw a hnwzytw le naq aa ty ei laiphy law aa boq hai.

Cakhau mawq Zisuq naq a hnwzytw le cu a kyqdawng mawq a tawng hai ei, "Ty khawq uq, a tho uq," lemawq a le hai. A hnwzytw le cu a tho hai awq aa cuan cu Zisuq pakhaiq lawng aa hwmq. Midang cu hwm ty va hai.

Zisuq le a hnwzytw le cu tang law mawq a sei swq hai. Calawq canawq Zisuq naq, "A rau hlan nawq thyqnawq ka in aw. Thyqnawq law mawq ka tho kia hlan ti atw ei naa hwmq pu hai hi ahu a zung law nahmaw hau va cii," lemawq bi a cu hai.

__