Ramhni Law A Then Khy

Kwm can a liam ei David siangpahang a thyq khau mawq a sapu Solomon naq Isarel cu wq ham a tho. Bawipu Pathian naq Solomon cu a mang lawq bi a khwm ei, "Na dw pu pa haw, zapu i ka ca peiq aw?" lemawq a le. Amu camawq Solomon naq swmnawq khaw a haw tyq nawq Bawipu Pathian cu a lung a lawm sawq ei, laiphy paw ei a swm cem pu lawq a can sawq. Solomon zawng naq swmnawq a phunphun khaw a cawn ei miswm bicai khau tw law a cang. Bawipu Pathian naq ngairwmnawq zawng a samq sy.

Siangpahang Solomon naq Biq-in a sawq nawq vau mawq Zerusalem khui lawq a po naq a zaw so pu syngun le thingrui khaw a hman ei, Biqnawq in khaw a sawq. Atw nacu milai tampy a pwmnawq puan biq-in a ham lawq Solomon naq a sawq mi Biq-in lawq Bawipu Pathian khaw aa biq caw. Bawipu Pathian cu Biq-in kawi a va twm ei, amu a milai le hawi nawq a wm.

Amu camawq Siangpahang Solomon cu ramdang kawi ei hawqnw a tampy khaw a dw hai. Amu camawq Bawipu Pathian a bi khaw ngai lau mawq ramdang ei amalw mawq thawngkhaiq hawng a si mi hai hawqnw khaw a hawi hai. Amu kha sung law mawq hawqnw tampy naq aamu aa zwq khaw aa va phua hai ei aa zwq cu aa biq thathau. Solomon siangpahang zawng a kwm cu a pacang am khau mawq a hnapy le aa biq pu aa zwq le khaw a biq rawq.

Cacu lawq Bawipu Pathian cu Solomon a cung paw lawq a thin a haw ei zwm oq tawq mawq a wm lau cu lawq swmhrinnawq le suaphonawq cu lawq Solomon Siangpahang a thyq khau mawq Isarel ram cu siohni lawq ka so khy aw lemawq a le.

Siangpahang Solomon a thyq khau mawq a sapu Rehoboam cu siangpahang law a cang. Rehoboam cu miswm si veq. Cacu lawq Isarel milai hai cu Rehoboam Siangpahang a zung kawi sei vau mawq aa pwm hai ei zang ma naiq lemawq a nua haw vau mawq aa sei hai. Aani naq, "Solomon Bawipu a kyq thui lawq kaa wm sung ruantei kaa temnawq le kaa rei a thai nawq, kaa rwnawq hai le ngunkhy kaa peiqnawq khaw, kaa soryq cu ma zan piq sawq lawq ma thwm piq am," lemawq aa nua.

Rehoboam naq aamu kawi canawq, "Ka po naq naani cu a rw pu rian khaw a ma tuan sawq lemawq naa ruiq. A si nu mawq kha nawqmawq a rw am pu rian khaw ka ca tuan sawq aw hai. Ka po nawqmawq a hei am pu dantaiqnawq khaw kamu naq ka ca peiq hai," lemawq ngaiqngaiq bwqbwq mawq a le hai.

Isarel miphun phunhru naq Rehoboam cu aa raw san. A tang mi phunhni hai lawng naq zwm oq tawq mawq a dia py. Amu ca phunhni hai a wmnawq cu Zudaq ram lemawq a le.

Rehoboam a raw san pu hai Isarel miphun hai cu Zeroboam a le mi pu khaw a siangpahang a vau lawq a thwm. Ram a sawq kawi khanawq ram ramkhaiq mawq a dia hai. Isarel ram lemawq aa au.

Zeroboam cu Bawipu Pathian khaw a raw san ei a ram milai hai cu suanawq kawi a kun py hai. Zudaq ram Biq-in law nawq Bawipu Pathian khaw biq lau mawq a zwq mawhni khaw a tui ei a ram milai hai cu a zwq khaw a biq sawq hai.

Isarel ram le Zudaq ram cu raw law a cang hai ei aamu le aamu khaw a tw hai.

Isarel ram thaw ei a wm mi siangpahang aa bintei mawq mithulau lawngtei a si hai. Amu ca siangpahang le law canawq mitam am siangpahang hai cu siangpahang tuan aa dw mi hai Isarel milai naq rawiphianawq le thunawq a tawng hai.

Isarel siangpahang aa bintei le Isarel ram sung ei a wm mi viatei sung ei mitam am hai cu a zwq lawngtei khaw aa biq. Aamu naq aa biq mi a zwq lawq canw capu suanawq tuinawq le aa sutei le khaw raithawinawq cu lawq aa hman hai.

Zudaq siangpahang le cu David a hrinsua le khaw a si hai. Misio cu mithu a si hai ei a hmantei mawq aa wq hai. Bawipu Pathian khaw aa biq. A si nu mawq Zudaq siangpahang mitam am hai cu mithalau le zizaw thaiq lau nawq a ngaitw le nawisuangpu a zwq a bi pu a si hai. Siokhaiq siangpahang hai cu a sutei le khahmaw pathian a si lau pu a nawisuang pu a zung lawq biqnawq cu lawq a hman hai. Zudaq ram sung ei milai tampy hai zawng naq Bawipu Pathian khaw raw san mawq pathian dang khaw aa biq.

__