Rwhawnawq Phunhru

Moses le Aron cu Faro siangpahang a zung kawi a sei hai ei hamawq aa swm. "Isarel miphun le a Pathian naq, 'Ka milai hai khaw luiq sawq hai sawq,' lemawq a ca le," lemawq aa swm. Faro siangpahang naq aa bi khaw ngai dw va hai. Isarel milai luiq sawq cu hau lau, rian rw khaw rwmrau mawq a tuan sawq cymaw hai.

Faro siangpahang cu Isarel luiqnawq peiq vau khaw dw veq. Cacu lawq Pathian naq rwnawq phunhru khaw Izimq ram law a sui sawq. Hi rwhawnawq mawq Pathian a lianheiq so tui khau nawq cu Faro siangpahang le Izimq milai le aa pathian a bintei nawqmawq a hwham a heiq am nawq khaw a lang sawq.

Pathian naq Nai tyvu ty cu thy law a can sawq. A si nu mawq Faro siangpahang naq Isarel milai hai cu luiq sawq dw va hai.

Pathian naq ca-y le khaw Izimq ram lawq a thuthang hai ei a oqnawq le a ynawq ti zawng ca-y lawngtei mawq a bei sawq. Faro siangpahang naq Moses cu ca-y thian sawq thw vau mawq a nua. A si nu mawq ca-y a thyq thw khanawq Faro cu a lung a khawng sawq kia ei luiq sawq dw kia va hai.

Amu camawq Bawipu Pathian naq Moses cu laiphy khaw na saithawn mawq tw lawq swmqsu law cang hai sawq a le ei Moses naq a twq khau mawq laiphydwmq cu swmqsu lawq a cang hai. Amu camawq Izimq milai hai le saram hai khaw a zi mawq zi hai awq a ko hai. Faro naq camthiam khaw a au hai ei swmqsu sei sawq thang vau mawq a zuam hai nu mawq tui khau va hai. Camthiam le canaq, "Hilei cu Pathian naq a tui pu a si," lemawq aa le. Faro a lung cu a khawng thathau ei Isarel milai hai khaw luiq sawq dw va hai. Cacu lawq Bawipu Pathian naq Izimq ram lawq bathau a thuthang kia ei siangpahang a in ti Izimq milai a wmnawq poq lawq bathau cu keitawnnawq thaiq lau ti mawq a tam tawiq hringhran hai. Faro siangpahang naq Moses le Aron cu a au kia hai ei, "Bathau hi na hawiq thang hai a si cawmacu Isarel milai hai hi Izimq ram law mawq a sei thang khau hai," lemawq a le hai. Cakhau mawq Moses cu thu a cam ei Izimq ram ei bathau viatei cu Bawipu Pathian naq a thian sawq thw. A si nu mawq Faro cu a lung a khawng sawq kia thathau ei Isarel milai hai cu sei sawq lau mawq a wm sawq kia hai.

Bawipu Pathian naq Izimq milai hai a lau sung ei a wm pu sahring poqpoq khaw a naiq sawq hai ei a thyq sawq kia hai. A si nu mawq Faro siangpahang a lung cu a khawng bi mawq a khawng thathau ei Isarel milai hai cu sei thang nawq nua pei hlai va hai.

Bawipu Pathian naq Moses kawi nawq tamqtabua khaw Faro a hmai lawq theiq thang thw lemawq a le. Amu camawq Moses naq a tui tyq nawq Izimq milai hai cu hmasinawq a twm thw hai ei Isarel milai hai cu zapu hmaw aa tui va hai. Sahmaw salawq Bawipu Pathian naq Faro cu a lung a khawn sawq kau lai cu lawq Isarel milai hai cu Faro siangpahang naq seinawq nua pei dw hlai va hai.

Cakhau camawq Pathian naq ri khaw a tawq sawq cu lawq Izimq ram sung a lin a phwm pu a thai le a paw ruantei a roq thw a leng awq in leng ei a wm mi milai hai khaw a thy thw hai. Faro siangpahang pu naq Moses le Aron cu a au hai ei, "Ka paiq caw, cacu lawq naa sei thang khau caw," lemawq a le hai. Amu camawq Moses cu thu a cam ei ri a tu pu cu a dai thw.

A si nu mawq Faro siangpahang cu suanawq a tui kia. A thinlung cu amu ning mawq a heiq sawq kia ei Isarel milai hai cu sei sawq thang kia dw ty va hai.

Cacu lawq Pathian naq thaukaben mawq a hem hai. Thaukaben a tampy khaw aa tawq sawq kia hai ei ri law mawq a luiq mi thaizun hai khaw thaukaben canaq aa oq thw hai.

Pathian naq nithwm sung muinawq a sui sawq. A mui tawiq cu lawq Izimq milai hai cu in leng kawi zawng aa tawi thang ngam va hai. A si nu mawq Isarel milai aa wmnawq hmun cu mui veq, a ceu kau.

Rwnawq phunkui a sui khau ti zawng nawq Faro siangpahang cu Isarel milai sei sawq thang vau khaw dw thathau veq. Cakhau mawq Pathian naq a hnwtwcem rwnawq phunkhaiq khaw sui sawq a twm kia. Amu ca rwnawq canawq siangpahang a lung khaw a theng sawq aw.

Exodus ca-wq dw 5 law mawq daw 10 ti a tia mi tuanbi