Bi A Kam Mi Hai Ram

Isarel miphun hai cu Bawipu Pathian naq bi a kam mi hai ram kawi kun can khaw a phawq caw. Zawsuaq naq sungthoq pahni khaw Kanan ram ei a wm pu Zeriko khui kawi a thuthang hai. Amu ca khui cu a swmq tawiq a hei tawiq pu tawqro hruang mawq a dwm thw. Amu khui law canawq hlawqhlangnw a ming Rahab a le mi pakhaiq a wm. Amu nw canaq sungthoq pahni hai cu a seiphy khau hai mawq khui leng kawi a tawi thang khau nawq vau zawng a bawm hai. Zakaw ka le cawmacu amu ca milainw cu Bawipu Pathian khaw a zwm pu a si. Sungthoq pahni zawng naq, "Hahu mawq na ma bawm cu lawq kaani Isarel miphun naq Zeriko khui roq vau mawq kaa va sei tyq nawq namu le na insungkhua khaw luiqnawq ka ca peiq hai," lemawq bi aa kam so.

Isarel miphun le cu Zawdan tyvu khaw a tan ei bi a kam mi hai ram kawi khanawq a sei hai. Bawipu Pathian naq Isarel biqnawq kawi hruaitw le khaw hmai kawi sei sawq hlang vau mawq Zawsuaq khaw a swm. Cahu mawq Isarel miphun biqnawq kawi hruaitw le naq Zawdan tyvu cu aa kei a tawn cangku mawq a luang liamaw pu ty cu a dia. Cakhau mawq Isarel le cu laiphy rau law nawq a sei hai.

Zawdan tyvu aa tan thw khau mawq Bawipu Pathian naq Zawsuaq kawi khanawq hi a thuzang a thawng pu Zeriko khui hi zapu tui mawq naa twq aw lemi khaw a swm. Isarel milai hai zawng naq Bawipu Pathian a bi khaw aa ngai ei Pathian naq a swm hu hai mawq aa tui. Biqnawq kawi hruaitw hai le rawkamq le cu Zeriko khui khaw nikhaiq vawikhaiq mawq nirwq sung a ngia sahlwm sawq hai.

Amu camawq nisary nawq ni lawq vawisary aa ngia sahlwm. A hnwtwcem aa ngia sahlwm tyq nawq biqnawq kawi hruaitw le naq muikaw aa twm khamawq rawkamq le zawng aa au rawq hai.

Amu ca can law canawq Zeriko khui aa dwm nawq tawqro hruang cu a cwm thang thw. Cakhau mawq Isarel miphun le cu Bawipu Pathian naq a swm hu hai mawq amu ca khui sung ei aa wm pu viatei cu aa roq thw. A si nu mawq hlawqhlangnw Rahab le a insungkhua cu luiqnawq aa hwmq ei Isarel miphun lawq aa cang hai. Kanan ram ei aa wm rawq mi hai a dang kawi khui hai zawng naq amu ca kawng aa thai tyq khanawq Isarel miphun naq aa ma va twq bawm sua aw lemawq aa thin aa phang aa ty ngaitei.

Bawipu Pathian naq Kanan ram ei a wm mi milai hai hawi remdainawq tui aw va ci lemawq Isarel miphun le cu nua a peiq so hai. Kanan ram ei miphun phunkhaiq a si mi hai, Gibeon miphun le khanaq Zawsuaq kawi nawq khuilam hlaiq nawq kawi mawq a va sei pu kaa si lemawq aa hlen hai. Zawsuaq le Isarel miphun le naq zapu law mawq a va sei pu hai i a si hai lemawq Bawipu Pathian khaw haw taw lau mawq remdainawq aa tui py hai.

Isarel le cu Gibeon miphun naq a ma hlen lekhaw aa hni cangku mawq a thin a haw. A si nu mawq Gibeon miphun le hawi Pathian ming mawq bikamnawq aa tui caw cu lawq Pathian a hmai lawq zapu hmaw tui khau ty va hai. Vawikhaiq cu Amor milai le naq Gibeon miphun le Isarel miphun cu remnawq aa tui lekhaw aa hni. Amu camawq Gibeon le khaw dau vau mawq aa twm hai. Amu camawq aa twm pu khaw Gibeon le naq aa hni tyq nawq Zawsuaq a zung kawi thawng a thai sawq.

Amu camawq Zawsuaq naq Isarel rawkamq le khaw a pwm sawq hai ei Gibeon khui milai hai a zung kawi zan khuidai lawq a sei sawq hai. A zingtwm baitei lawq aamu le canaq Amor milai hai cu aa cawn aa thia sawq hai ei aa twq hai.

Amu ca ni law canawq Pathian naq Isarel milai le a vau mawq a twq piq hai. Amor rawkamq le khaw aa baling aa balang mawq a zam sawq hai. Cakhau mawq ri a heipypy khaw Amor rawkamq le a cung paw lawq khui hu mawq a sua sawq ei aa thy thw hai.

Isarel miphun le naq Amor milai hai cu phancangtei mawq aa tai hai. Zakaw ka le cawmacu Pathian naq van paw ei ni khaw a dia sawq. Amu ca ni law canawq Bawipu Pathian naq Isarel miphun hai cu tainawq a heipy a peiq hai.

Bawipu Pathian naq Amor rawkamq le khaw a tai thw khau hai mawq Kanan ram milai hai le naq Isarel miphun cu dau vau mawq aa pwm hai. Zawsuaq le Isarel miphun le naq aamu le zawng khaw aa twq hai ei aa tai hai.

Amu ca rawtwqnawq a dy khau mawq Bawipu Pathian naq Isarel miphun le cu bi a kam pu hai ram law canawq hnungamtei mawq wmthwqnawq nua a peiq hai. Amu camawq Zawsuaq naq Isarel miphun phunhlaihni khaw phun khaiq ram khaiq cio mawq a so khy hai.

Zawsuaq a kwm a wpu caw cu law Isarel miphun le khaw a au hai ei Sinai tang paw ei Pathian naq Isarel miphun le a swm pu hai khaw a hni sawq thaw hai. Isarel miphun le zawng naq Bawipu Pathian khaw thinlung bitawqtei mawq kaa biq aw ei nuabi le zawng kaa zy aw lemawq bi aa kam hai.

Zawsuaq cu-wq 1 - 24 law mawq a tia mi tuanbi