Lanhlwmnawq

Bawipu Pathian naq Moses a zung law mawq "Isarel milai hai khaw na luiq sawq hen lau hai a si cawmacu milai naq a hrin taw pu sapu cakhau mawq a zui pu saram naq a hrin taw pu le a bintei mawq ka thu hai, a le," lemawq Faro siangpahang pu khaw aa swm. Amu mawq rawrinnawq bi a peiq mi khaw Faro siangpahang naq a thai kau nu mawq zapu hmaw rei veq.

Pathian naq amu a zwm mi hai a sataw capu le khamqnawq vau khaw a tui piq hai. Amu cu aa insungkhua cio ei a zui pu tw sung law mawq a hmu a zung a wm lau pu Dautu pu tw mawq na pa biq aw a le hai.

Bawipu Pathian naq Isarel milai a zung ei bi a cu pu hai cu, "Tw a thy khaw in suiqkhaw a tung le a tang lawq naa thw aw. Tw khaw a pwm mawq na em hu ei thynw a te lau pu sangro hawi nawq naa oq aw. Naa oq tyq zawng nawq Izimq ram law mawq sei thang vau cu lawq twmq ci mawq naa wm aw," a le hai.

Pathian naq a swm hu hai mawq Isarel milai naq aa tui. Zantwm a phawq tyq khanawq Bawipu Pathian cu Izimq ram sung lawq a sei thythaw ei sataw capu poqpoq cu a thu thw hai.

Isarel milai hai a in suiqkhaw a tang le a tung ei thy a thw nawq poqpoq cu Bawipu Pathian naq thu lau mawq a lan hlwm hai. Insung ei a wm mi a bintei mawq a hwm thw hai. Tw nautei a thy thawngmawq a bintei luiqnawq aa hwmq.

Izimq milai hai nacu Pathian khaw zwm va hai. Pathian bi zawng ngai va hai. Cacu lawq Bawipu Pathian naq aa in khaw lan hlwm lau mawq sataw capu viatei a bintei mawq a thu thw hai.

Faro siangpahang a sataw capu law mawq saw le naq a hrinpu sataw capu le Izimq milai sataw capu poqpoq a bintei mawq a thy thw hai. Hi thyqlaunawq a sui ruang lawq Izimq ram milai hai cu tunawq mawq a zen thw.

Amu ca zan law canawq Isarel milai hai khaw a au hai ei, "Izimq ram law mawq atw hen sei thang uq," lemawq Faro siangpahang naq Moses le Aron cu a le hai. Izimq milai hai zawng naq, "Sei thang kau ni uq!" lemawq aa le hai.

Exodus cu-wq 11:1-12:32 law mawq a tia mi tuanbi