Pite Le Zohan Naq Sawq Haw Pu A Dam Sawq

Nikhaiq cu Pite le Zohan mawq Biq-in kawi a sei hai. Biq-in hmai aa phawq tyq khanawq a kei a zeng pu pakhaiq khaw aa hwmq. Amu milaipu cu milai so haw mawq a o a ding pu a si.

Pite naq milaipu cu a cuan ei, "Kaw cu sy ngun peiq vau zapu hmaw ca ngai va ni, a si nu mawq ka ngai pu cu ka ca peiq aw. Bawi Zisuq a ming mawq a tho lawq seiq!" lemawq a le.

Bawipu Pathian naq a kei a thu lau pu cu a dam sawq. Lam a sei khau ei a hloq a thia awq Bawipu Pathian khaw a thangthaiq. A ham hawng ei aa wm pu hai cu aa bintei mawq aa khuiruiq aa haw thw.

Milai a tampy khaw a va phawq cio ei, a kei a zeng pu khaw a kei a dam caw lekhaw aa hwmq tyq nawq khuiruiq hau mawq Pite khaw aa cuan. A cuan pu hai kawi canawq Pite naq a tho py hai ei, "Zakaw i kamu leq kau cu na pa cuan ei naa khuiruiq aa haw. Kamu ka thiamnawq le ka so tui khau nawq mawq ka tui pu a si tung lau. Bawi Zisuq a ming thawnnawq napaw a dam sawq kau cu," lemawq a le hai.

"Naani naq cahlan nawq Zisuq khaw thu vau mawq Rom cauzawq khaw naa swm hai ei kaa luiq sawq aw a le nahmaw dw va ci ei naa thu. A si nu mawq Bawipu Pathian naq thyqnawq law mawq a tho sawq kia. Naani naq zapu kaa tui lekhaw naa hniq lau nu mawq naani naq naa tui pu cu, Pathian a bi a va hau pu hai nawq Mi Khamtw cu naiqnawq a in hu ei, a thy aw lemawq a va hau hlang pu a ting nawq vau cu lawq naamu naa tui sawnawq khaw a hman caw. Cacu lawq atw hamawq naa suanawq aa ngaisy lawq Pathian a zung kawi a va leiq kia ni luq. Amu camawq naa suanawq viatei khaw a ca thian piq sawq hai," lemawq a le hai.

Biqnawq kawi hruaitw le naq Pite le Zohan aa hau pu khaw aa thai tyq nawq aa thin aa haw. Cacu lawq aa tai hai ei thawng aa thawq hai. A si nu mawq Pite naq a hau pu khaw milai a tampy naq aa zwm ei Bawi Zisuq aa zwmtw capu lawngtei mawq thawngngu twq aa kawq hai.

A thaithw zingtwm lawq Zudaq hruaitw hai le biqnawq kawi phung cawnpiqtw sazaw le a zung kawi Pite le Zohan cu aa sei py hai. Aani naq, "A kei a thulau pu khaw zapu tui mawq i na dam sawq," lemaw a haw hai.

"Na hmai ei a dia pu milaipu cu Zisuq a ming thawnnawq mawq a dam pu a si. Naani naq Zisuq cu naa thu kau nu mawq Bawipu Pathian naq a nun sawq kia. Amu kha Bawipu khaw naani naq naa ei thang kau nu mawq Zisuq a ming thawnnawq mawq khamqnawq si lau cu a dang zapu lam hmaw wm ty veq," lemawq a le hai.

Pite le Zohan a bi hau cu a hlang lawqtei mawq a hau khau cu lawq Zudaq hruaitw hai cu aa khuiruiq aa haw. Zakaw ka le cawmacu amu milai hai cu thiamnawq zapu hmaw a ngai lau pu a si hai lekhaw aa hni cu law hai nawq aa si. A si nu mawq a hnwtwdwm ei a ruiq phwm pu cu, aamu milai hai hi Zisuq hawi aa wm khemq pu a si hai lekhaw a si. Pite le Zohan kawi canawq, "Zisuq a ming mawq ahu hmaw cawnpiq ty va hai ci," lemawq a le hai. Pite le Zohan canaq, "Pathian a miq hwmq lawq naamu naa bi ngai maw a bipy am Pathian a bi ngai?" lemawq aa leiq hai. Bicaitw le canaq a heipy mawq aa ramq hai ei a thu thang hai.

Lamseitw cu-wq 3:1-4:22 law mawq a tia mi tuanbi