Bikam Sapu

Abram le Sarai le cu Kanan ram aa phawq khau mawq kwmhru a rai ti sutei ngai khau va hai. Cacu lawq Sarai naq, “Kamu cu Pathian a bikam sapu hrin vau cu lawq ka taw caw. Casacu lawq ka sawnw Hagar hi ypy lawq kaa cu lawq sutei a ma hrin piq khau aw,” lemawq Abram cu a swm.

Cacu lawq Sarai a hau hu mawq Abram naq Hagar cu a ypy ei sapu cu a hrin. Amu hawqteipu cu Isahmel lemawq ming a sawq. Khatyq nawq Sarai naq Hagar cu hnu a sui. Isahmel a kwm hlaithwm a ting khanawq Pathian naq Abram cu bi a va swm.

Pathian naq, “Kamu cu a lian a hei mi Pathian ka si. Namu hawi nawq bikamnawq kaa tui aw,” lemawq a le tyq khanawq, Abram naq Pathian cu a khwm by awq a biq. Bawipu Pathian naq, “Namu cu miphun a tampy a hring sua tw ka ca sa sawq aw. Kanan ram cu namu na tei na su le a cu lawq rau a cu mawq ka ca peiq aw. Kamu cu aamu aa cu lawq a zungzu mawq Bawipu Pathian ka su aw. Cacu lawq namu na insungkhua ei aa wm mi capu a bintei mawq a pavunzim tan a su hai,” lemawq Abram khaw a swm.

Pathian naq, "Namu na hnapy Sarai cu sapu a hrin aw, cu na sapu cu bikam sapu a su aw. Isak lemawq a ming na sawq aw. Amu le kamu mawq bikamnawq kaa tui hu ei amu cu miphun a heipy law a cang aw. Isahmel zawng miphun hei lawq ka can sawq rawq aw. A si nu mawq kamu ka bikam cu Isak a zung lawq ka swmq sawq aw." Cakhau mawq Pathian naq Abram cu Abaraham lemawq ming a theng. A sylam cu "miphun heipy le aa po" lenawq a si. Sarai zawng Saraq lemawq a ming a theng rawq. A sylam cu "bawi sanw" lenawq a si.

Amuca ni cu Abaraham a insungkhua ei a wm mi hai capu a bintei mawq a pavunzim aa tan hai. Kwmkhaiq a rai khanawq Abaraham cu kwm zakhaiq a bei ei Saraq zawng kwm sawmkui a bei khau mawq sapu khaw Abaraham a vau mawq a hrin. Pathian naq a swm hu mawq a sapu cu Isak lemawq ming a sawq.

Isak a va pacang am tyq khanawq Pathian naq Abaraham a zwmnawq khaw lwmqcawqnawq mawq, "Raithawinawq cu lawq Isak khaw thaiq law pa bi," lemawq a le. Abaraham naq Pathian a bi khaw a ngai ei Isak mawq biq vau ma a twm.

Abaraham le Isak cu Pathian biq vau mawq a sei hai ei, Isak naq, "Ka po, Pathian biqnawq vau thing lawngtei kaa pwq. Tw nautei sawq zakaw i kaa pwq veq?" lemawq a haw. Abaraham naq, "Ka sutei, biqnawq vau tw nautei cu Pathian naq a ma peiq lai," lemawq a lei.

Aa pusu mawq biqnawq hmun khaw aa phawq tyq nawq Isak cu cuapahry mawq a tawm ei biqtheng paw lawq a khan. Abaraham cu Isak khaw ka twq aw a le lawq khanawq Pathian naq Abaraham kawi canawq, "Hawqteipu khaw naiqnawq pei khawq! Namu naq na pa ty ei na ngaisun pu na sutei pakhaiq hmaw sian lau nawq pa ngai va ci lekhaw ka hni caw," lemawq a le.

Abaraham cu zuncabwq sung lawq tw a caputei mawkhaiq a hwmq. Pathian naq Isak a ham lawq raithawinawq vau mawq a twmq piq mi a si. Abaraham cu lunglawmtei mawq tw khaw a va lawq ei raithawinawq khaw a tui.

Cakhau mawq Pathian naq, "Na ngai mi viatei, na ngaisun mi sapu ti mawq peiq dwnawq lungthin na ngai cu lawq thasuinawq peiq vau mawq bi ka ca kam caw. "Namu na hrin na sua na tei na su khaw van ei a wm pu awsy nawqmawq aa tam am hai. Namu cu ka bi na pa ngai cu lawq laiphy paw ei a wm pu miphun zakwmq viatei hai cu namu na insungkhua aa thawngmawq thasuinawq aa hwmq aw lai," lemawq Abaraham khaw a swm.

Zenesiq daw 16 - 22 lawmawq a tia mi tuanbi