Zohan Hrinnawq Kawng

A hlan lawq kha nacu Bawipu Pathian naq a milai le a zung lawq vancung milai a si lau cawmacu Pathian a bi a hautw parofet le a zung law mawq bi a va swm sawq tawn hai. Amu khau camawq kwm zaly a rai ti Bawipu Pathian cu a milai le hawi bi hau khemq ty va hai. Nikhaiq cu vancung milai pakhaiq cu Bawipu Pathian a bi khaw hau vau mawq Zekhariaq a le mi patawpu tangbawi rian a tuan lawq nawq ruiq lau py mawq a va lang. Zekhariaq le a hawinaunw Elizabeq cu Bawipu Pathian a bi mi le a wpaiq mi a si hai.

Vancung milai naq Zekhariaq kawi canawq, "Na hawinaunw naq sapu pakhaiq a hrin aw. Amu cu sutei cu a thiang hlwm pu tharau mawq a khaiq hu ei, milai le naq Mi Khamtw khaw a cau hlan sanawq lemawq a ci hlam mawq a tui piq aw hai," lemawq a swm. Amu lawq canawq Zekhariaq naq, "Kamu le ka hawinaunw cu sutei hrin vau cu law kaa taw tawiq caw. Cacu lawq bitawqtei mawq a si tatawq aw lemawq zapu tui mawq i ka hni aw?" lemawq a haw.

Vancung milai canaq, "Kamu cu amu thawngpang khaw swm vau mawq Pathian naq na zung kawi a pa va sei sawq pu ka si. Cacu na zwm lau a si cu lawq atw hamaw nautei a py hlan sung bi hau khau va ci," lemawq a le ei, vancung milai cu a sei thang. Amu lawq khamawq Zakhariaq cu bi hau khau ty veq. A in kawi a leiq kia ei amu kha can lawq khamawq a hawinaunw cu pwm lawng lau mawq a wm.

Elizabeq nau a pawi lawq canawq Zekhariaq a zung kawi a lang pu vancung milai cu Elizabeq a zuirua a si mi Meri a hmai lawq a lang. Meri cu hawqnw thiang a si ei Zosef hawi nawq wm khemq vau mawq a ham ci mi a si. Vancung milai naq Meri kawi canawq, "Na thinphang khawq! Pathian naq via a ca ngai. Nau na pawi hu ei sapu na hrin aw. Hawqteipu cu Zisuq lemawq a ming na sawq aw. Amu cu a lian a hei cem pu Bawipu Pathian a sutei a su aw. Amu cu zungzu mawq a wq vau siangpahang a su aw," lemawq a swm so.

Meri naq, "Kamu cu hawqnw ka si. Zapu tui ma i a si khau aw?" lemawq a haw tyq nawq, vancung milai naq, "A thiang pu tharau cu a va suiq hu ei Pathian a thawnnawq khaw na cung paw lawq a lang aw. Cacu lawq na hrin vau sapu cu a thiang hlwm pu milai a su hu ei Pathian a sapu a su aw," lemawq a lei. Meri naq vancung milai a hau pu cu a zwm ei a hnu a tu.

Vancung milai naq Meri hawi birau a thawiq khau hai mawq cawmpai a rai khanawq Elizabeq a zung kawi vai vau mawq Meri cu a sei. Meri naq Elizabeq a biq lawq khanawq Elizabeq a ry sung ei nautei a hloq mi khaw a hni. Pathian naq aamu a zung ei rian a tuan pu viatei paw lawq aa lung aa lawm. Elizabeq a zung lawq Meri cu thathwm a cam ei a in kawi a leiq kia.

Zekhariaq le Elizabeq cu nautei sapu khaw a hrin khau mawq a ming lawq Zohan lemawq aa sawq. Sutei a hrin khau mawq Pathian naq Zekhariaq cu bi a hau sawq khau kia. Zekhariaq naq, "Bawipu Pathian cu a milai khaw a heithu lau hai cu lawq a dawiqnawq khaw a thang thaiq. Hi sutei naq a lian hei cem pu Pathian a bi khaw a hau piq hu ei milai le naq sua ngaithaimnawq khaw a hwmq nawq vau a hau aw lai," lemawq lunglawm thunuam mawq a dawiqnawq khaw a thang thaiq.

__