Khariqfabw A Ham Tho Nawq Kawng

Zisuq vancung kawi a kai khau mawq a hnwzytw le cu Zisuq naq bi a cu so hu hai mawq Zerusalem khui law mawq aa hru. A zwmtw hai cu amu law khanawq aa pwm hai ei caiq lau mawq thu aa cam.

Zudaq miphun hai cu Lanhlwm Puai a dy khau mawq ni sawmngu a rai khanawq Pentikoq Puai khaw kwm siatei mawq aa tui tawn. Pentikoq Puai ni cu Zudaq miphun le sawq tuan a lwm nawq puai a si. Amu ca puai tui vau camawq Zudaq miphun le cu aa wmnawq hmun kengkwmq law mawq Zerusalem khui kawi aa va sei tawn hai. Amu ca kwm cu Zisuq vancung a kai khau mawq zawkhaiq hawng law aa tui.

Zwmtw viatei hmunkhaiqtei mawq aa wm thw lawq canawq thysi a han pau hu mawq aa wmnawq in cu a pau a va thang ei mai lai hawi a lo pu lai naq pakhaiq cio aa lw paw lawq a va tau ei cacangku mawq Thiang Tharau mawq aa khaiq hai ei ku dang cio mawq aa hau.

Zerusalem ei aa wm mi hai naq, "Zapu i a si?" lemawq a va cuan cio hai. Zwmtw a si mi hai naq Pathian naq khuiruiqhaw so lian hei a tui pu khaw aa hau. Amu khaw aa hau mi khaw aamu a pynawq ku a hau pu hu mawq aa thai tyq nawq aa khuiruiq aa haw.

Amu tyq khanawq misiokhaiq hai naq zw a ry lemawq sua aa pho hai. Cacu lawq Piter naq a dia ei, "Ka hau pu hi ngai ti uq! Amu milai hai hi zw a ry pu si veq. Pathian a bi a va hau piq tw Zoel naq a va hau pu khaw, 'Ni hnwtw cem nacu kamu ka tharau khaw ka tawi hai,' a le mi khaw atw nawq a ting caw."

"Isarel milai hai, naani naq naa hwmq hu mawq Zisuq cu Bawipu Pathian a thawnnawq hawi khuiruiqhaw so a phunphun langsawqnawq le khaw a tui hai. A si nu mawq naani naq vailam lawq thai mawq naa thu."

"Zisuq cu a thy nu mawq Pathian naq a tho sawq kia. Pathian a bi khaw a va hau tw le naq a va hau pu, 'Mithiang cu than sung lawq thuqhnam sawq aw veq,' a le mi khaw atw hi a ting caw. Bawipu Pathian naq Zisuq khaw thyqnawq law mawq a tho sawq nawq a kawng law hanawq kaamu hi taiqtei kaa si."

"Zisuq cu a Po a cang kawi mawq thwqnawq nua a hwmq caw. Zisuq naq bi a ma tiam so hu mawq Thiang Tharau lawqsawng khaw a ma peiq. Atw naani naa hwmq pu hi Thiang Tharau a thawng mawq a si."

"Naani naq vailam paw ei naa thu pu khaw Zisuq a si. A si nu mawq Zisuq cu Bawipu Pathian naq Bawipu le Khamtw lawq a can sawq lekhaw hniq kau uq," lemawq a le hai.

Pite bi a hau pu a ngai mi viatei hai cu aa lungthin khaw a hri ngaitei hai. Cacu lawq Pite le a dang a hnwzytw le kawi canawq, "Wnau hai, zapu i tui pasalaw a thu aw?" lemawq aa haw hai.

Pite naq, "Naa bintei mawq naa suanawq khaw aa ngaisy lawq a miahlwm ni uq. Naa suanawq ngaithiam naa si nawq hu cu lawq naa lung aa theng lawq Zisuq Khariq a ming mawq typianawq ing uq. Cakhau mawq Thiang Tharau lawqsawng khaw naa hwmq aw," lemawq a le hai.

Pite naq a hau pu bi a zwm mi hai cu a bintei mawq thawngthwm hawng a si hai. Zisuq a hnwzytw law a cang hai. Typia khaw aa in ei, Zerusalem khariqfabw law aa hawm hai.

Lamseitw le a cawnpiqnawq khaw aa ngai ei aamu hawi wm khemq hai awq hmunkhaiq mawq aa oq aa din khemq. Bawipu Pathian khaw a thang thaiq hai. A ngai pu so khaw aa hawm thw hai. Milai hai naq thangthu a hau hai. Ni siatei mawq zwmtw thaw a kawq hai.

Lamseitw cu-wq daw 2 law mawq a tia mi tuanbi