Bawipu Zisuq Riantuan Ham A Tho Nawq Kawng

Zisuq cu Saitan naq twqsonawq a in khau mawq Kaleli peng khaw a tawn hai ei thawngthubi khaw a swm hai. A cawnpiqnawq a thai mi poq naq a thaiqnawq kawng lawngtei aa hau thw.

Amu camawq amu a thanlen nawq Nazareq khui kawi Sabat ni law a phawq ei pwm nawq in kawi kun awq a cawnpiq hai. Bawi Zisuq cu aa peiq pu cuzi khaw a kau ei Pathian a bi a au py tw Isaiaq khaw a rei piq hai.

Zisuq naq a rei pu a kawng lam cu, "Bawipu Pathian Tharau cu ka zung law a wm cu lawq synu hai le khaw thawngthubi swm vau hai le thawng tu mi hai luiq sawq vau le miqco pu hai khui a hwmq khau kia nawq vau le hem mi milai hai khaw lunglawmnawq thawngthu a thai nawq vau cu lawq Pathian a bi va hau vau mawq ka va sei nawq san cu a si," lemi Cuthiang khaw a rei.

Amu ca cu a rei khau mawq a thwq tyq nawq milai hai naq awng karawq mawq aa cuan. A rei pu Cuthiang naq Mi Khamtw a kawng a hau lekhaw aa hni. Bawi Zisuq naq, "Ka ca rei piq mi hai a kawng lam cu atw hi a si caw," lemawq a swm tyq hai nawq milai hai canaq, "Amu cu Zosef a sapu a si ve?" lemawq aamu le aamu khaw aa' haw hai ei a khuiruiq aa haw.

Khatyq nawq Zisuq naq, "Aamu aa khui ram ei Pathian a bi aa hau pu hai cu miqhmai thu hwmq a tawng va hai. Pathian a bi a haupiqtw Elaiaq a san lawq nawq Isarel ram law hanawq lamai a tampy a wm hai. A si nu mawq kwmthwm a sio sung khui a kang lawq khanawq Pathian a bi a hau tw Elaiaq cu Pathian naq tui vau a swm hu mawq Isarel ei a wm pu lamai khaw bawm lau mawq ramdang ei a wm pu lamainw khaw a bawm ei a cawm."

Amu camawq Zisuq naq a hau kia mi cu, "Calawng si veq. Pathian a bi a hau tw Elisa a san sung law zawng nawq Isarel ram lawq thinghmui naiqnawq mawq a nu pu mitampy a wm mi hai khaw dam sawq lau hai mawq Isarel milai a raw a si pu hai ram le ei raw bawipu Naman khaw a dam sawq," lemawq a le. Amu ca bi a thai pu hai Isarel milai hai cu aa thin aa haw ngaitei.

Cacu law nawq Nazareq khuimi hai cu Zisuq khaw pwmnawq in law mawq a hawiq thang ei thapang law mawq hlwm thang vau mawq aa sei py nu mawq milai le a kaw lai law mawq a ten tham ei Nazareq khui law mawq a sei thang.

Zisuq cu Kaleli peng kawi khanawq a sei ei, milai a tampy naq a hnw law mawq aa zy. A dam lau pu hai le pwm tam a ting lau pu hai khaw a zung kawi aa va sei py hai. Amu ca milai hai cu aa ku aa u pu hai le aa hnu aa ro pu hai aa miq aa co pu hai le lam aa sei khau lau pu hai khaw a si hai. Amu ca le hai cu Zisuq naq a dam sawq thw hai.

Khasi naq a tui pu hai zawng khaw a va sei py hai ei Zisuq naq khasi khaw a hawiq piq thang hai. Milaipu a sung law mawq a suiq thang pu khasi cu a heipy mawq a au ei, "Namu cu Pathian a sapu na si," lemawq au awq a sei thang. A wm rawq pu milai tampy hai cu aa khuiruiq aa haw ei Pathian khaw bi hai awq aa thang thaiq hai.

Cakhau camawq Zisuq cu amu hawi aa wm khemq vau hai a hnwzytw hlaihni khaw a thwm hai ei lamseitw lemawq ming a sawq hai. Aani cu Zisuq hawi nawq khi aa tawn khemq ei Zisuq a zung law mawq aa hlaiqhlai ei aa cawn.

__