Ty A Siamnawq Kawng

Kwm le thu a rai am tyq law khanawq laiphy paw lawq milw a tampy a kawq hai. Milai hai canaq suapaiqnawq aa tui ei aamu le aamu khaw aa raw hai ei aa tw hai. Laiphy paw lawq thaiqlaunawq a kawq tawiq caw cu lawq Pathian naq laiphy cu ty ma bicai vau mawq bi a khi.

A si nu mawq Noaq a le mi pu pakhaiq cu Pathian a hmai lawq miqhmai thu a hwmq. Amu cu thaiqlaunawq a tui pu hai a zung law a wm kau rawq nu mawq a ding le a hmantei mawq a wm a thw pu milai a si. Bawipu Pathian naq laiphy hi ty mawq ka khei aw lemawq Noaq cu a swm. Cakhau mawq Noaq cu tylawng a heipy mawq a sawq sawq.

Pathian naq tylawng cu a tung dawng zathwm, a vang dawng sawmngu, a san dawng sawmthwm, a dawiq dawiqthwm mawq a khan tampy a wm vau mawq tylawng khaw thing mawq na sawq aw lemawq a swm. Tylawng cu a cungbwmq le thalangku mawkhaiq zawng a tui sawq. Ty naq a va siam tyq nawq Noaq a insungkhua le saram hai cu hwmtei mawq a wm nawq vau khaw a si.

Noaq cu Pathian bi khaw a ngai ei, a sutei le pathwm hawi nawq Pathian naq a swm hu hai mawq tylawng khaw kwm le thu a saupy rai mawq aa sawq. Cakhau mawq milai hai kawi zawng khanawq laiphy hi ty naq a siam thw hu nawq kawng khaw a swm hai ei, Pathian a zung kawi a va leiq kia uq lemawq aa hau piq hai. A si nu mawq milai hai naq ngai dw va hai.

Pathian naq Noaq cu a insungkhua le saram hai aa oq aa din vau khaw a daiq vau mawq a khawn sawq. Tui vau viatei a bintei mawq a tui thw tyq khanawq Bawipu Pathian naq Noaq le a hawinaunw, a sapu pathwm le aa hawinaunw le, a bintei mawq pariq khaw tylawng sung kawi a kun sawq hai.

Pathian naq saram phun a bintei a capu a canw mawq bokhaiq cio, pavu phun a bintei a canw a capu bokhaiq cio khaw tylawng sung kawi a khwm sawq hai. Saram a bintei sung lawmawq saram thiang phun, phunkhaiq lawq a canw a capu bosary cio khaw oq vau le raithawi tyq nawq hman khau vau mawq a siq sawq. A bintei mawq a tui thw khau le tylawng sung kawi a kun thw khau kha macu Pathian naq tylawng suiqkhaw khaw a kham.

A kham khau mawq laiphy lawq ni sawmly sung sun zan caiq lau mawq khui a sua. Ty cu laiphy sung law zawng mawq a va tawi. Khui naq a caw, laiphy pwmpalwq tang a sannawq cem ti zawng ty naq a vua thw.

Tylawng sung ei a wm mi hai, milai hai le saram khaw hau lau hai mawq, a dang viatei hai cu a thy thw hai. A si nu mawq ty paw ei a vuan pu tylawng sung ei a wm mi hai, milai hai le saram hai lawnglawng hi, rwhawnawq in lau mawq aa luiq hai.

Khui a han khau mawq tylawng cu ty paw lawq thangu sung a vuan. Ty a ky am khau mawq tylawng cu tang dawng paw lawq a tang nu mawq laiphy law cu ty a wm lai. Thathwm a rai khau mawq tang dawng tetei hai cu a va lang hai.

Amu cakhau ni sawmly a rai khanawq rawqrawq mawkhaiq khaw a thuthang. Laiphy a lang maw lemawq a zuang ei a hoq nu mawq a taunawq vau khaw hwm veq.

Cakhau mawq vainw mawkhaiq khaw a thuthang kia. Vainw zawng a taunawq vau a wm lai lau cu lawq a va leiq kia. Zawkhaiq a rai khanawq vainw mawkhaiq khaw a thuthang kia ei Olif a hnunau khaw a hmuadawng mawq a va pwq. Cakhau mawq ty cu a kyq am lawngmang. Thingkung ramkung le zawng a va cua am hai.

Amu cakhau zawkhaiq a rai nawq vainw mawkhaiq cu a thuthang kia ei a va leiq kia ty va caw. Ty zawng a kyq am ngaitei caw.

Ty a kyq thw khau mawq thahni a rai khanawq Pathian naq Noaq kawi canawq, “Atw cu tylawng sung law mawq naa twm thang khau caw. Atw khau hamawq teisu a tampy ngai law laiphy paw lawq kawq hai sawq,” lemawq a le ei, Noaq le a insungkhua hai cu lawng paw law mawq aa twm thang hai.

Noaq cu Pathian biqnawq vau biqtheng khaw a sawq ei raithawinawq saram cu biqtheng law canawq a ro ei Pathian cu a biq. Pathian a lung a ting cu lawq Noaq le a insungkhua hai cu thasui a peiq hai.

Pathian naq, “Atwni thoq mawq milai hrinsua hai hi thaiqlaunawq khatwq mawq a tui zawng nawq a tui pu suanawq ruang lawq ty lian macu dantaiq ty va hai ni,” lemawq a le.

Ty lian mawq dantaiq ty va hai ni lenawq bikam hninawq vau lawq, makhawiqpu khaw a tui. Amu khaw a hwmq siatei Pathian naq a bikam khaw a hni thaw hu ei amu a sutei le laiphy milai zawng naq a ruiq phwm aw caw.

Zenesiq daw 6 law mawq daw 9 ti lawq a tia mi tuanbi