Pathian Naq Moses A Au Nawq

Zosef a thyq khau mawq a hrinsua hai cu Izimq ram lawq khui aa sawq. Aamu le a teisu le viatei hai cu Izimq ram law kwm saupy a wm hai ei aa ngai a siq zawng sasawq a malw zawng aa kawq ngaitei hai. Amu ca miphun hai cu Isarel miphun lemawq aa au hai.

A kwm a zaly mawq a rai khau mawq Isarel milai hai cu a tam tymaw hai. Izimq milai hai cu Zosef naq a va tuituan piq mi hai khaw a heithu caw. Izimq milai hai naq Isarel milai a malw a tam tymaw pu khaw a ty am tymaw hai. Amu camawq amu can lawq ei Izimq ram a wqtw Faro siangpahang nacu Isarel milai hai khaw saw lemawq a le cuicui hai.

Izimq milai hai naq a khui sung ei taiqin a su vau hai cu lawq Isarel milai hai cu a hman hai, a sawq sawq hai. Cutwq a rw pu rian a tuan kau nu mawq Pathian naq a malw cu a kawq sawq sasin hai.

Faro siangpahang cu Isarel milai a tam tymaw khaw a hwmq tyq nawq Isarel milai naq a hrin pu capu hawqtei poqpoq Nai tyvu sung law na vaw tham hai lemawq nua a sui.

Isarel milainw naq sutei capu a hrin ei amu le a hawinaupu mawq aa sutei cu aa seiphy tawn.

Hawqtei khaw a seiphy khau tai ty lau cu lawq thyqnawq law mawq a luiq khau phwm sanawq lemawq ty paw ei a vuan pu ruiphy bawm sung lawq a san ei ty paw lawq a vuan sawq hai. Hawqtei khaw zapu tui ma i a tui le a hni dw cu lawq a wteinw khanaq a cuan phy.

Faro a sanw naq hawqteipu a y nawq bawm khaw a hwmq ei amu ei hawqteipu khaw amu naq a lawq. A cuanmin vau mawq Isarel milainw pakhaiq hawqteipu a no khaw a hlan ei a cuan a min sawq. Hnwq a din ty lau khau mawq Faro siangpahang a sanw a zung kawi aa peiq kia. Amu ca hawqteipu cu Moses lemawq ming a sawq.

Moses cu a thang ei a tangvaw caw. Nikhaiq cu a lennawq lawq Izimq milaipu naq Isarel milaipu a den khaw a hwmq tyq nawq khamq vau mawq a zuam. Amu camawq Izimq milaipu khaw a thu ei a ahu nahmaw pa hwm va hai lemawq a ruiq cu lawq a phytei mawq a phwm.

A thaithw nawq Isarel milai pahni khaw a va deng liamaw lawq a va sui hno hai ei misua am pu kawi khanawq, "Zakaw i na phun hawi cu na den?" lemawq a le. Misua am pu canaq, "Ahu na i namu cu a ma wqtw vau lawq a ca can sawq? Izimq milaipu na thu hu ma mo thu rawq na pa dwm?" lemawq a le.

Amu khakawng khaw Faro siangpahang naq a thai tyq nawq thu vau mawq a hoq sawq hai. Cacu lawq Faro a kyq sung law mawq luiq a dw cu lawq Izimq hawi a hlaiqnawq Midian ram kawi a zam.

Moses cu Izimq hawi a hlaiqnawq ram sung lawq tw khaw a cawng hai. Amu ca le ei a wm pu milainw hawi a hawi hai ei sapu pahni aa hrin.

Nikhaiq cu tw a cawng liamaw lawq khanawq mai a aw hluamaw pu zuncabwq mawkhaiq a hwmq. A si nu mawq zuncabwq khaw mai naq kang veq. Moses cu mai naq a kang pu zuncabwq kawi canawq cuan vau mawq a nai am. Amu lawq canawq Pathian a o naq, "Moses, na phaneq khawq thang. Na tawn pu laiphy khaw a thiang pu laiphy a si," lemawq a le.

Pathian naq, "Ka milai hai a teminnawq khaw ka hwmq caw. Cacu lawq namu cu Faro siangpahang a zung kawi na va sei aw. Cakhau mawq Isarel milai hai khaw saw dia hmun law mawq na khamq hai ei Izimq law mawq na sei py thang khau hai. Abaraham, Isak le Zakomq le a zung ei bi ka kam pu hai Kanan ram cu aamu khaw ka peiq hai," lemawq a le.

Amu camawq Moses naq, "Milai hai naq, 'Ahu naq i a ca va sei sawq?' lemawq pa haw hai salawq zapu ka va lu hai i?" lemawq a haw. "Kamu cu kamu ka si kau. 'Kamu a le pu naq a pa va sei sawq,' na lu aw. Kamu cu zungzu a nung mi Pathian ka si. Naa pwpu le a si mi hai Abaraham, Isak, Zakomq le a Pathian a si, lemawq va swm hai," lemawq Moses khaw a le.

Moses cu bi a thutei mawq hau thiam va ni lekhaw a phan cu lawq Faro siangpahang a zung kawi sei raw khaw a ty. Cacu lawq Pathian naq amu a bawm vau mawq a wtei Aron khaw a sei sawq py. Moses le Aron kawi canawq Faro cu a lung a khawng aw lemawq bi a can hai.

Sui Thang Nawq (Exodus) cu-wq daw 1 - 4 lawq a tia mi tuanbi