Bawipu Pathian Le David Hnutawqnawq Aa Tui

Sawl cu Isarel miphun le a siangpahang a tuan taw cem pu a si. Amu hi a tung a sang, a hmy a do cu lawq Isarel miphun naq aa dw pu phun khaw a si. Isarel miphun khaw a wq tho lawq hai cu mithu siangpahang a si. A si nu mawq a hnwtw kawi cu Pathian a bi ngai lau mawq a wm ei ziatiannawq le thaiqlaunawq khaw a ngai cu lawq mithulau siangpahang law a cang. Cacu lawq Bawipu Pathian naq Isarel miphun a cu lawq siangpahang a tuan vau midang minautei pakhaiq khaw a thwm.

Sawl siangpahang a hnw mawq Pathian naq Isarel miphun le a siangpahang vau mawq Isarel minau pakhaiq David a le mi khaw a thwm. David cu Bethlehem khui lawq tw cawng mawq a wm pu a si. Ani cu a po a tw khaw a cawng liamaw lawq nawq a cancan lawq tw le a ko tawn pu chinteiq le cavawm le khaw a deiq thaiq tawn hai. David cu thuiduatei mawq a wm. Miding a si. Pathian khaw a zwm ei Pathian a bi khaw a ngai pu a si.

David cu rawtwq a thiam pu a si ei hruaitw pakhaiq zawng a si. Amu cu minautei a si nu mawq a thuzang a thawng pu le a pwmrui a hei ngaitei pu Kawliaq khaw a dia awn. Kawliaq cu raw a tw cuicui pu a si. A thuzang a thawng, a tung dawngrwq le khamqkhaiq a sang pu mithawng pakhaiq a si. A si nu mawq Bawipu Pathian naq Isarel miphun le khaw a khamq vau mawq David khaw a bawm ei, Kawliaq khaw a thu khau. Cakhau mawq David cu Isarel miphun le a raw a si mi hai khaw a tai thw hai. Cacu lawq milai le naq amu khaw aa lawm ei thangthu aa hau.

Isarel miphun le naq David khaw aa dw tawiq cu lawq Sawl siangpahang pu naq zia a ngai. Sawl siangpahang pu naq David cu vawi tampy thu vau mawq a twm. Cacu lawq David cu Sawl siangpahang pu khaw a rei piq. Nikhaiq cu Sawl naq David cu thu vau mawq a kawiq. David cu Sawl a zung law mawq a zam ei lungkui sung lawq a rei. Sawl siangpahang pu cu David a rei nawq lungpy a ham law nawq a wm nu mawq David khaw hwm veq. David cu Sawl khaw a ham law a wm ei amu siangpahang si vau mawq Sawl khaw thu khau vau a si nu mawq thu lau mawq a puandawng khaw a tan piq ei amu siangpahang a cannawq vau ruiq lau mawq Sawl khaw thu lau mawq a nunnawq a zui mi khaw taiqtei vau mawq a lawq.

A hnwtw lawq Sawl siangpahang cu rawtwqnawq law a thy ei David cu Isarel siangpahang law a cang. Amu cu mithu siangpahang a si ei a ram sung milai hai naq aa dawiq. Bawipu Pathian naq David cu thasuinawq a peiq ei tainawq a hwmq. Isarel miphun a cu mawq raw a twq ei raw khaw a hawiq thang khau hai. Amu camawq Zerusalem khuipy khaw a lawq khau ei Isarel miphun khuilypy law a can sawq. David naq a wq lawq sung hai nacu Isarel miphun hai cu miphun hei a si hai ei mingai mirwm aa si hai.

David siangpahang cu Isarel miphun bintei a cu mawq Bawipu Pathian biqnawq vau biqin sawq khaw a dw. Zakaw ka le cawmacu kwm zaly twq Moses naq a sawq pu tham law lawng aa biq liamaw cu law a si.

A si nu mawq Bawipu Pathian naq David a zung lawq parofet Nethan khaw a sei sawq ei rawrinnawq a peiq sawq. "Namu cu raw khaw vawi tampy na twq cu lawq ka cu law Biqin khaw su va ci. Namu na sutei naq Biqin cu a sawq aw lai. A si nu mawq namu cu thasuinawq heipy ka ca peiq aw. Namu na hrinpu sung law mawq pakhaiq cu siangpahang a su hu ei ka milai hai khaw zungzu mawq a wq aw hai." David hrinsua sung law mawq zungzu mawq a wq vau pakhaiq hi Mi Khamtw a su aw. Laiphy milai hai khaw aa suanawq law mawq aa khamq vau hai mawq Bawipu Pathian naq a thwm pu a si.

Amu kha bi khaw David naq a thai tyqnawq Bawipu Pathian khaw a thangthaiq. Zakaw ka le cawmacu Bawipu Pathian naq amu khaw a thu cem mi thasuinawq a tampy peiq vau mawq bi a kam cu lawq a si. Ca bikam cu zutyq i a tui aw lekhaw David naq hniq veq. A si nu mawq bi a kam pu hai Mi Khamtw a va suiq aw lemi cu Isarel miphun hai naq kwm thawngkhaiq hawng a hru.

Siangpahang David naq kwm tampy zwm oq tawq le a hman ningtei mawq a wq hai. A si nu mawq a san a twm kawi sang lawq Bawipu Pathian naq a dw lau tatawq pu suanawq khaw a tui.

Nikhaiq cu David Siangpahang a rawkamq le cu raw twq mawq raw ram ei a wm lawq nawq Siangpahang David cu siangpahang in law nawq a wm ei khuiram a cuan. Amu lawq canawq a do ngaitei mi milainw a ngan a khei lawq a hwmq. Amu ca milainw a ming cu Beqsiba a si.

Amu ca milainw a cungpaw law mawq hawi thang dw hehen lau mawq Siangpahang David naq milaipu pakhaiq khaw a va au sawq ei Beqsiba cu a ypy. Amu camawq Beqsiba naq nau ka pawi lemawq Siangpahang David cu thawng a thai sawq.

Beqsiba a hawinaupu a ming cu Uriaq a si ei amu cu David Siangpahang a rawkamq sung ei rawtwq a thiam pu a si. Siangpahang David naq Uriaq cu a va leiq kia lawq na in law a thuteimawq a dwm sung lemawq a au. A si nu mawq Uriaq naq a ei thang. Cacu lawq Siangpahang David naq Uriaq cu rawram kawi a kui kia. Uriaq cu a thyq sanawq lemawq raw a hran cem nawq a thuzang a thawng a lemi hmun kawi sei sawq vau mawq raw bawipu khaw a cu. Amu camawq Uriaq cu rawtwqnawq hmai kawi cem lawq a sei ei raw naq a thu.

Uriaq a thyq khau mawq Siangpahang David naq Beqsiba cu a hnapy vau mawq a lawq. A rau hlan nawq David hawi a ngai pu nautei cu a hrin. Pathian naq parofet Nethan cu Siangpahang David a zung kawi bi swm vau mawq a sei sawq. A swm pu bi cu: "Khui khuikhaiq lawq mingaipu le misynu pu aa wm hai. Mingaipu a in lawq mikhi pakhaiq naq a tun ei su thu a dw. A si nu mawq amu a ngai pu thu siang lau mawq misynupu naq a ngai sun pu tw a lutei khaw a thu piq," lemawq a swm. Amu camawq Siangpahang David naq, "Amu pu cu thu oq a tawq," lemawq a le. Parofet Nethan naq, "Amu pu cu namu na si," lemawq a le tyq nawq David cu a suanawq khaw a hni ei Pathian a zung lawq a suanawq khaw a ngaisy. A ngaisy cu lawq Pathian naq a suanawq cu a ngaithiam.

A si nu mawq Siangpahang David naq a tui pu suanawq a ruang lawq a sutei a nunnawq khaw lawq kia a si. A tang lai mi Siangpahang David a san sung lawq a insungkhua lawq buainawq le twnawq a tampy a wm leng awq a nuangainawq zawng a tu swq. Siangpahang David cu Bawipu Pathian a cung paw lawq a bi ngai lau le sua paiqnawq a tui kau nu mawq Bawipu Pathian nacu a bi zwm oq tawq a si nawq khaw a hmun sawq ei David le Beqsiba cu sapu pakhaiq a peiq kia hai. Aa sapu cu Solomon lemawq ming aa sawq.

__