Filip le Etiopia Bawi Kawng

A hmataw cem khariqfaw a va dia taw lawq ei hruaitw le sung law hanawq Sativen a le pu hruaitw a va wm rawq le a si. Amu cu Thiang Tharau hawi a khaiq ei swmnawq a ngai pu miting lemawq a ming a thang pu a si. Sativen cu khuiruiqhaw hnisawqnawq a tampy a tui ei milai le kawi khanawq Zisuq a zwm sanawq lemawq Zisuq a kawng thawngthu a hau ei mitampy naq aa zwm.

Nikhaiq cu Sativen naq milai tampy a zung lawq Zisuq kawng khaw a cawnpiq tyq hai nawq Zisuq aa zwm lau pu Zudaq milai hai hawi nawq a heipy mawq aa ei hai. Zudaq milai hai cu aa thin a haw tawiq ei biqnawq kawi hruaitw le a zung law khanawq a leiq a thaw mawq Sativen a kawng khaw aa swm hai. Cacu law nawq biqnawq kawi hruaitw le canaq Sativen cu aa tai ei tangbawi wpu hai le hruaitw le a zung kawi aa sei py ei, a leiq a thaw mawq a hman lau pu bi zawng a tampy aa hau.

Tangbawi a heicempu naq, "Amu ca kawng cu a hman mo?" lemawq Sativen cu a haw. Sativen naq Bawipu Pathian naq Abaraham law mawq Zisuq san ti a va tui piq pu liangluang hai le Pathian a milai hai naq a bi ngau lau mawq a va wm nawq ruantei khaw a swm hai. Cakhau mawq Sativen naq, "Lung heiq mawq rawsan a hmang pu hai naq tharau khaw aa raw san cuicui ei, naani naa pw naa pu le naq a va tui hu mawq Pathian khaw naa vaw thang. Pathian a bi a hau tw hai le khaw aa va thu hai. Cahu mawq naani naq aamu nawqmawq a thulau am pu so khaw naa tui. Naani naq Mi Khamtw Mesiaq cu naa thu caw," lemawq a le hai.

Amu khamawq bi a hau pu khaw biqnawq kawi hruaitw le naq aa thai tyq nawq aa thin aa haw tawiq ei aa hnu aa pin hai awq a heipy mawq aa au hai ei Sativen cu khuileng kawi doq thang hai awq a thyq hlan sung lung mawq aa vaw.

A thyq dwmtei nawq Sativen cu, "Zisuq, ka tharau cu namu naq cau hlang kau," lemawq a au. Cakhau mawq a khwmq a by ei, "Bawipu, aa suanawq cu ngaithiam kau hai," lemawq thu a cam ei pau a thy.

Sawl a le mi tangvawnau pakhaiq cu Sativen a thaiq pu hai a zung kawi mawq a dia rawq ei lung mawq a vaw pu hai a sovu khaw a kin piq hai. Ca ni thoq mawq Zerusalem khui ei a wm pu khariqfabw hai cu hemnawq in ham aa tho cu lawq hmun kengkwmq kawi aa theiq thw hai. Hemnawq aa tawng kau nu hai mawq aa phawqnawq kengkwmq lawq Zisuq a kawng khaw aa swm hai.

Zerusalem khui ei hemnawq aa in ruang lawq aa zam mi hai sung law mawq Filip lemawq a au pu Zisuq a hnwzytw pakhaiq a wm rawq. Ani cu Samaria peng kawi a sei ei Zisuq kawng khaw a swm hai. Milai tampy naq Zisuq cu aa zwm ei, khamqnawq aa hwmq. Nikhaiq cu vancung milai naq Filip kawi canawq, "Lei kawi va sei swq lawq Zerusalem law mawq Kaza kawi a sei pu lam kawi khanawq va sei tiq," lemawq a le. A sei liamaw lawq canawq Etiopia peng law mawq a va sei pu siangpahangnw a tangkaw taitw bawi pu cu rangleng a cyq awq a va sei khaw a hwmq. Amu camawq Thiang Tharau naq, "Amu ca pu a zung kawi va sei," lemawq a swm.

Filip cu rangleng a ham kawi a nai am ei Etiopia milaipu naq Pathian a bi a hautw pu Isaiaq naq a tia pu ca-wq a rei pu khaw a hwmq. Cu milaipu naq a rei pu cu, "Amu cu thu vau mawq a sei py pu tw hupu a si. A tang a au lau pu tw hupu a si. Bi kukhaiq hmaw hau lau tei mawq a wm kau. Amu capu cu ningzunawq khaw a in ei bawmsantw ahu hmaw ngai lau mawq thunawq a in," lemawq a rei pu khaw a thai.

Filip canaq Etiopia milaipu kawi canawq, "Na rei pu cu asylam khaw na hni maw?" lemawq a haw. Etiopia milaipu canaq, "Pakhaiqkhaiq naq swm fiang lau macu hniq khau va ni. Va sei lawq ka ham law va thw tiq. Isaiaq naq amu a kawng mo a hau, a si lau caw pakhaiqkhaiq a kawng a tia pu maw a si?" lemawq a haw.

Amu camawq Filip naq Isaiaq cu Zisuq a le mi pu a kawng a tia mi a si lemawq Etiopia milaipu cu a swm. A dang Cuthiang sung ei a tia pu le zawng khaw a kem sy thw ei Bawi Zisuq a kawng thawngthubi khaw a swm.

Filip le Etiopia milaipu cu aa sei lawngmang hai ei ty a wmnawq kawi aa phawq. Etiopia milaipu canaq, "Halei law napaw ty a wm hi, zapu naq i typianawq in hi a pa dawn aw," lemawq a le ei rangleng mawng pu kawi canawq rangleng dia sawq vau mawq a swm.

Cakhau mawq rangleng paw law mawq aa twm thang hai ei Filip naq typia khaw a peiq. Ty sung law mawq aa tho sau cangku mawq Thiang Tharau naq Filip cu hmun dang kawi Zisuq thawngthu hau vau mawq a sei py thang ei Etiopia milaipu naq hwmq ty veq.

Etiopia milaipu zawng Zisuq kawng khaw a thai ei a cauhlan caw cu lawq lunglawm thunuam mawq a in kawi a sei.

Lamseitw 6:8-8:5 le 8:26-40 law mawq a tia mi tuanbi