၂။ ကမ္ဘာကြီးယာအပြစ်တရားထုပ်ဖာက
အာဒမ်အိမ်း အမှာက အအိပ်ထာနာ ဘုရားရှင်အီဒက်က ကနင်းဟေကဥယျာဉ်ပြောင်ထဲယာ တစ်ဗျင်းပျော်ကိုတုံးလင်ဂါဟေ။မှာနိန်ဟူးစလုံးနာ အဝတ်စားအတူပေ။ ညီးငါဒင်ယဲ့ မှကမ္ဘာပေါ်နာ အပြစ်တရား အငါကကြောင်းအိမ်း အစမ်းကအထောင်းပေ။ အမှရက်နာ ပုံမှန်ငါနဲ ပန်းခြံထဲယာ လမ်းလျှောက်ကို ဘုရှင်အိမ်းတူပီ(ရ်)ဟေ။
ညီးငါဒင်ယဲ မှဥယျာဉ်ထဲယာ တစ်ဗျင်းစိတ်အမီးက ကဖူးတစ်ကောင်းငါလင်ဂါဟေ မှကဖူးနာ တာဆာလှောင်ဆာ ဘုရားရှင် နနိန်ရက်အင် မှဥယျာဉ်ယဲယာက တစ်ချိူးအဖင်းငါက အဆီယင် အဆာယဲငါကိုပညတ်ပီဟေ ငါနဲ့အဒင်လဲငါကို ကထာလင်ဂါဟေ။
မှတာဆာလှောင်ဆာနာ ဘုရားရှင်စာ မီးကအမီးကချေကအဖင်းငါလွဲကို ရီကက်ကား အဖင်းယာက အဆီးယာဆာလူဟေငါကို ညီရက်အင်ပညတ်ပီဒက်ဟေ။ မှအဆီယင် ဆာကဒင်း အာငါယဲ ထိနဲတင်းယဲ ဆီးလင်ဂါငါကို ဘုရားရှင်ညီရက်အင် ပညတ်ပီဒက် ဟေငါကိုဖြေလင် ဂါဟေ။
မှဂါရပ် ကဖူးနာအမှာရက်အမှန်အရီပေ နနိန်ရက်အဆီးယန်ပေက မှအဆီးယင် ဆာနေ က(လ်)ဘုရှင်အိမ်းမက်တာ မီးကအမီးက ချက်ချင်းနားလည်ယန်က စိုးရိမ်ကိုပညတ်ပီးက ဖြစ်ဟေ ငါကိုင့လင်ဂါဟေ။
တာဆာလှောင်ဆာနာ မှအဆီးယင် တစ်ဗျင်းကနင်းကပေါ်လင်ကို ဆာမက် ဆီးဆာပေါ် လင်ဂါဟေ။အမှာနာ ဉာဏ်ပညာပြောင်ကက်က အကြောင်အိမ်း မှအဆီးယင်ဆာလင်ဂါဟေ အမှာအိမ်း မက်တာယောယန်က အမှာကတာဆာပြိုင်းဆာစိတ် အီလင်ကို အာဒမ်ယဲဆာနက်ကဟေ။
ရုတ်တရက် အမှာရက်နာ အသိဉာဏ်ငါကမ်းကို အမှာရက် လောင်းတ တောင်းဖြစ်တုံ့ဂါသတိ ပီလင်တိမ်ဂါဟေ အမှာရက်နာ အတက်ရက်အိမ်းဖုံးဂါစိတ်ရီလင်ဂါဟေ။
မှအချိန်ငါ ဘုရားရှင်နာ ဥယျာဉ်ထဲယာလမ်းလျှောက်တုံ့ဂါနာ အာဒမ်းအိမ်း အမှာဂါ အအိပ်ထာ ရက်နာ တက်လင်ဂါဟေ။ မှဂါရပ် မှာနိန်ဟူးနာ ဘုရားရှင် အပေါ်မှ အဆေးတုံ့ လင်ဂါ ဟေ။ မှဂါရပ် ဘုရားရှင်နာ နနိန်ရက် မှာယားငါကို ကထာလင်ဂါဟေ။ အာဒမ်းနာ ငါဘုရားရှင် လမ်း လျှောက်တုံ့ ကတိုက်ကို ညီရက်နာလောင်းတတောင်းဖြစ်တုံ့ကို အစမ်းကိုအဆေးတုံ့က ဖြစ်နက် ဟေငါကိုဖြေ လင်ဂါဟေ။
မှဂါရပ်ဘုရားရှင်နာ နနိန်ရက်လောင်းတတောင်းဖြစ်တုံ့ဟယ်ငါကို အယူငန်းဟေယား ငါအဆာယဲ ငါပီကအဆီးယင် ဆာနက်နန်လေး ငါကိုကထာလင်ဂါဟေ။ မှာဂါရပ် အာဒမ်းနာ ဘုရား ရှင် ငါစိတ် မှတာဆာလှောင်အီယန်ကို မှတာဆာလှောင်ငါစိတ် မှအဆီးယင် အီယန်ဟေ ငါကို ဖြေလင် ဂါဟေ။ မှဂါရပ် ဘုရားရှင်နာ မှ တာဆာလှောင်ဆာ နင် အဇားရီကျီးယင်နန်းယား ငါကို ကထာလင်ဂါဟေ။ တာဆာလှောင်ဆာနာ ကဖူးစာငါလှည့်စားနက်အန်ဟေ ငါကိုဖြေလင်ဂါဟေ။
ဘုရားရှင်နာ ကဖူးယင် ငါ နင်ငင် ကျိန်စာတိုက်ဟေ။ နင် နာအပိတ်အိမ်း လင်ကို ကဇက်အင် ဆာပေါ်က နင်အိမ်း မှတာဆာလှောင် ဟူးအိမ်းဟူးဝါ်အပေါ်လင်ကက်ပယ်က နင်ကအဆာ၊ ဆာအိပ့် အမှာကအဆာ၊ ဆာအိပ့်ရက် ဟူဝါအိမ်း ဟူဝါမုန်းလင်ဂါ မှတာဆာလှောင်ဆာက မျိူးရိုးစဉ် ဆက်ရက်အ(လ်) နင်ကအဟူးယင်ပျက်လင်ဂါ နင်ယဲ အမှာရက်က အတာမိတ်ဆာ ဒမ်းရာ လူဇိဉ်လင်ဂါ ငါကိုငါနာကဟေ။
ကျီးကအိမ်း ဘုရားရှင်နာ တာဆာလှောင်ဆာ နင်ယဲအဆာကယ်နဲ ကာနာလင်ဂါ နင်စာနင်ဂါ တာဆာပြိုင်းငင်စိုးကက်ကို နင်က တာဆာပြိုင်းယဲ နင်ကအပေါ်ယာကြီးစိုးယန်က။ငါကိုင့လင်ဂါဟေ။
ဘုရားရှင်နာ တာဆာပြိုင်းယင် နင်ယဲ နင်ကအအိပ်ထာက တူးယင်အတေးကို ငါကတူးယင် အကိုပေ။အတက်က အချိန်ယာ ကဇက်နာ ကျိန်စာတိုက်က ဟင်းပေါ်ကိုဆာဂါဇတ် စုတ်က ဇီးခက် ခက်ခဲခဲအိမ်း စုတ်လင် ပေါ်ဂါး။ ကျီးကအိမ်း နင်ဆီးနဲ့ယဲ နင်က ခန္ဓာကိုယ်ယဲ ကဇက်ထဲ ယာပြန်ကိုထုတ်ကလင်ဂါ။ တာဆာပြိုင်းနာ အမှာက အအိပ်ထာ အဆက်အီကလူ အဓိပ္ပာယ်အိမ်း ဧဝငါကိုအမည်အီလင်ဂါဟေ။ အဇာရီးကအကြောင်ယာငါနဲ မှတာဆာလှောင်ဆာနာ လူတိုင်းက အနို(လ်)ဖြစ်ကိုကအကြောင်းအိမ်းဖြစ်ဟေ။ ဘုရားရှင်နာ အာဒမ်းအိမ်း ဧဝရက်အင် တိရိစ္ဆာန်က အလက်အင် တူအီးနက်ကဟေ။
ကျီးကအိမ်း ဘုရားရှင်နာ အတက်ကအချိန်ယာလူ့ဆာရက်နာ ငါအိမ်းမက်တာ မီးကအမီးက ချေယန်နန်း အမှာရက်အင် အဆက်ငါဟေက အဖင်းငါကအဆီးယင်ဆာကို အဆက်အဆီမ်းဇိဉ်လူပေက။ မှအကြောင်းအိမ်း ဘုရားရှင်နာ အမှာရက်အင် ဥယျာဉ် အိမ်းလင်စံဟေကနေရာ ဖြောက်နက်ကဟေ။ ဘုရားရှင်နာဟူးဝါ်ယဲအဆက်ငါဟေကအဖင်းငါကအဆီးယင်အဆာလူမှား အစွမ်း ပြောင်က လူရက် အင် မှဥယျာဉ်ရှေ့ယာ စောင်ဇိဉ်လင်ဂါဟေ။
ကမ္ဘာဦးကျမ်း ၃