၄၅။ သတေဖန်အိမ်းဖိလိပ္ပု

ကိုယ်တော်ယေရူကပထမဆုံးနောက်လိုက်ရက်ကအထဲယာက ခေါင်းဆောင်တာဆာပြိုင် ဟူးဝါက အမိန်းနာ သတေဖန်ငါကိုအော်ဟေကလူ့ဟူးဝါဖြစ်ဟေ။ လူတိုင်းစာ အမင်လေးစားကို ဘုရားဝိညာဉ်တော်စာ အမှာဇိဉ်ဘောင်းကိုက အစွမ်းအိမ်းဉာဏ်ပညာရက် အက်ပီဟေ။ သတေဖန်စာ အဖြစ်လူကဦးဇားရက်အင် ဖြစ်လူမှလုပ်အီဒက်ကဟေ။အမှာစာ လူရက်အင် ကိုယ်တော်ယေရူအပေါ်ယာ ယုံကြည်ယမ်မှ ဆနိန်အီတုန်းကရပ် လူရက်စာ အမင်ယုံကြည်မူးငါကဟေ။

ယက်တာကရပ် သတေဖန်စာ ကိုယ်တော်ယေရူကအကြောင်းယင် ဆနိန်အီတုံ့ကရပ် ကိုယ်တော်ယေရူယင် အယုံကြည်ကယုဒလူမျိူးအချိူးစာဗန်ကို အမှာအိမ်းငြင်းလင်ကဟေ။ အမှာရက်စာ တဗျင်းမန်ချေကို ယုဒဘာသာရေးခေါင်းဆောင်ရက်ထဲနဲ့လင်ကို သတေဖန်ကအကြောင်းယင် ဝပ်ကိုငါ့ဆနပ်လင်ကဟေ။ အမှာရက်နာ “သတေဖန်စာ မောရှေအိမ်းဘုရားရှင်က အမီးကအကြောင်းယင် ငါ့တုံ့က ညီရက်တတ်တက်ဟေ။”ငါကို ဝပ်ကိုငါ့ဆနပ်လင်ကဟေ။ မှအကြောင်းအိမ်း ဘာသာရေးခေါင်းဆောင်ရက်စာ သတေဖန်ယင်ရိမ်ကို သာသနာရေးဆိုင်ရာမဟာနာယကဗြောင်အိမ်း အယောက်ကဘာသာရေးခေါင်းဆောင်ရက်ကမှ အော်လားကလင်ကဟေ။ မျက်မြင်သက်သေ အတုအယောက်ရက်အ(လ်) သတေဖန်ကအကြောင်းယင် ဗန်ကိုဝပ်ဗား(ဖ်)ကဟေ။

သာသနာရေးဆိုင်ရာမဟာနာယကဗြောင်စာ သတေဖန်ယင် “နင်ကအကြောင်းယင် မှလူ့ရက်ငါ့တုံ့အဒင်းလဲ”ငါကို ကထာလင်ကဟေ။ သတေဖန်စာ သာသနာရေးဆိုင်ရာမဟာနာယကဗြောင်က ကထားကဖြေကဇိဉ် တူးဘောင်းကိုပိ(ရ်)လင်ကဟေ။ အမှာစာ အဗြံဟံငါကရပ်ပင်စကို ကိုယ်တော်ယေရူအချိန်ထိ ဘုရားရှင်စာ လူရက်ကအပေါ်ယာ တဗျင်းအံ့ဩကမီးဟေက ဦးဇားရက်အင် လုပ်အီဒက်ဟေ။ ညီးငါဒင်းယဲ့ လူရက်စာ ဘုရားရှင်ကတူးယင် ဟက်တာကယဲ့အတေးက အငါပါ(လ်)။သတေဖန်နာ “နနိန်ရက်စာ အဟူးကူကို ဘုရားရှင်ကတူးယင် ရက်ပိုက်အတေးပါ(လ်)။ညီရက်က ဘိုးဘွားဘီဘင်ရက်စာ ဘုရားရှင်ယင် ဆန့်ကျင်ကို ရှေ့ဖြစ်ဟောပညာရှိရက်အင် ကတိုက်တက်ကို နနိန်ရက်အ(လ်) ဘုရားဝိညာဉ်တော်ယင် ငြင်းပယ်ဒက်ဟေ။ ညီးငါဒင်းယဲ့ နနိန်ရက်ကလုပ်ဒက်က အမီကအလုက်တောင်မှဒင်း ဘုရားရှင်ကဖြောင်းနက်အန်က မေရှိယယင်ကတိုက်ကစာ ပိုကိုအမီးကဖြစ်ဟေ။ ငါကို ငါ့နက်ကဟေ။

ဘာသာရေးခေါင်းဆောင်ရက်စာ အိမ်မှတူးယင်တတ်ကရပ် တဗျင်းမန်ချေကို အကာနားယင်ပိတ်ကို ဟော်ကိုငါ့လင်ကဟေ။အမှာရက်စာ သတေဖန်ယင် ကတိုက်ကဇိဉ် မြို့ပြင်ယာ အော်လားကလင်ကို တလုံးရက်အိမ်း ကဒူ(ဖ်)ကဟေ။

သတေဖန်စာ ဆီးကရိ(ရ်)တုံ့ကအချိန်ယာ ဟော်ကို”ကိုယ်တော်ယေရူ ငါကဝိညာဉ်ယင် လက်ခံယန်”ငါကို ဟော်ကိုငါလင်ကဟေ။ အမှာစာ ဒူးထောက်ကလင်ကို “အရှင် မှလူရက်ကအပြစ်အင် ခွင့်လွတ်ကိုအီယန်”ငါကို ထပ်မံ ဟော်ကိုငိုကြွေးကို ဆီးလင်ကဟေ။

အိမ်မှရက်ယာအာ ယေရုရှလင်ယာကလူရက်စာ ကိုယ်တော်ယေရူကနောက်လိုက်ရက်အင် စတင်ကိုကတိုက်ကို ယုံကြည်ကလူရက်အ(လ်) အယောက်ကနေရာရက်အာ ပြုကလင်ကဟေ။ အိမ်မှကိစ္စရက်ဖြစ်တုံ့ကယဲ့ အမှာရက်စာ အယောက်ကနေရာယာ ကိုယ်တော်ယေရူကအကြောင်းယင် ထပ်မံကို ဆနိန်ကို ငါ့ဆနပ်လင်ကဟေ။

ကိုယ်တော်ယေရူယင် ယုံကြည်ကလူ့ဖိလိပ္ပုငါဟေက လူ့ဟူးဝါငါလင်ကဟေ။ အမှာယဲ့ အယောက်ကယုံကြည်က လူရက်တေ ယေရုရှလင်မြို့ယာပင် ပြုယော့ယန်ကဟေ။ အမှာစာ ရှမာရိဒေသယာလင်ကို ကိုယ်တော်ယေရူက အကြောင်းယင် အိမ်မှာနေရာကလူရက်အင် ဆက်လက်ကိုငါ့ဆနပ်ကို ဘောင်းကိုကလူရက်စာ ယုံကြည်ကလင်ကို ကယ်တင်ကဟင်းပေါ်ကဟေ။ ယက်တာကရပ် ဘုရားရှင်က ဟမန်းဗြောင်တစ်ပါးစာ ဖိလိပ္ပုကမှဗန်ကို မလိမ်းကန္တရယာကလမ်း တစ်လမ်းယာလင်ကဇိဉ် ဗန်ကိုငါဗား(ဖ်)ကို အိမ်မှနေရာလင်ကဟေ။ အမှာစာ လင်းကမ်းနားအတိုင်း ဗန်ကရပ် မြင်းလှည်းတိ(လ်)ယောယန်က လူဟူးဝါယင် ပေါ်လင်ကဟေ။ အိမ်မှာလူစာ အဲသယောပိက တဗျင်းအရေးပါက လူဟူးဝါဖြစ်ဟေ။ ဘုရားဝိညာဉ်တော်စာ အိမ်မှာလူ့အိမ် လင်ကိုတူးပိ(ရ်)ကဇိဉ် ဖိလိပ္ပုယင် ဖြောင်နက်ကဟေ။

မှအကြောင်းအိမ်း ဖိလိပ္ပုစာ မြင်းလှည်းကမှလင်ကိုထုပ်လင်ကဟေ။ အမှာစာ အဲသယောပိလူမျိူးယာပင် ဘုရားရှင်ကတူးရက်အင် ဖတ်တုံးကတတ်လင်ကဟေ။အမှာစာ ရှေ့ဖြစ်ဟောပညာရှိ ဟေရှာယရေးပီက စားရက်အင် ဖတ်တုံးကဖြစ်ဟေ။ အိမ်မှာလူနာ “အမှာရက်စာ အိမ်မှာလူယင် ကတိုက်ကဇိဉ် သိုးတာရာယင် အော်လားကလင်ကဒေ အော်လားကလင်ကို သိုးဆာ တိမ်းကိုတုံးကဒေ အမှာယေ တိမ်းကိုတုံဒက်ကဟေ။ အမှာရက်စာ အမင်တရားမျှတမှ အဆက်ဆံထမ်း ရိုသေကယဲ့ အာငါပါ(လ်) ။အမှာရက်စာ ကိုယ်တော်က အဆက်အင်ယဲ့ လာကလင်ဟေ”ငါကိုယေ အကြားဆပြုကို ဖတ်လင်ကဟေ။

ဖိလိပ္ပုစာ အဲသယောပိလူမျိူးယင် “နင်ကဖတ်ကနင်ချေးဟေလဲ”ငါကို ကထားကို အဲသယောပိလူမျိူးနာ “ငင် ဟူးဝါယဲ့ ရှင်းပြကအာငါထမ်း ငါနားလည်ကအာငါပါ(လ်)။ကျေးဇူးပြုကို ငါကအနားဗန်ကို တုံးကို ဟေရှာယစာ အယောက်ကလူ့ဟူးဝါက အကြောင်းယင် ရေးပီးကလဲ့”ငါကို ပြန်ကိုဖြေကို ကထာလင်ကဟေ။

ဖိလိပ္ပုစာ မြင်းလှည်းဖုံးယာချေကို တုံးနက်ကို ဟေရှာယစာ ကိုယ်တော်ယေရူက အကြောင်းယင် ရေးပီးက အဲသယောပိလူမျိူးယင် ရှင်းပြဆနပ်လင်ကဟေ။ ဖိလိပ္ပုစာ ဘုရားရှင်က အယောက်ကအကြောင်းရက်အင်ယဲ့ ရှင်းပြလင်ကဟေ။ မှနည်းအိမ်း အမှာစာ ကိုယ်တော်ယေရူက သတင်းမီးရက်အင် ငါ့ဆနပ်လင်ကဟေ။

ဖိလိပ္ပုအိမ် အဲသယောပိလူမျိူးရက်ခရီးမက်တာလင်ကို အိ(လ်)ငါဟေကနေရာ ထုပ်ကရပ် အဲသယောပိလူမျိူးနာ “ဟုန်းမနား အိ(လ်)စိတ်ဆာ ငါဟေ၊ ငင် အိ(လ်)မြုပ်(လ်) မင်္ဂလာလုပ်လူကလဲ့”ငါကို ငါနက်ကို မြင်းလှည်းမောင်းကလူယင် မြင်းလှည်းယင် တန့်ဇိဉ်လင်ကဟေ။

မှအကြောင်းအိမ် ဖိလိပ္ပုစာ အဲသယောပိလူမျိူးယင် အိ(လ်)တဟုန်းယာ လင်ကိုအိ(လ်)မြုပ်ကို မင်္ဂလာလုပ်အီးနက်ကဟေ။ အမှာရက် အိ(လ်)တဟုန်းယာပင် ချေယောယန်ကရပ် ဘုရားရှင်ကဝိညာဉ်တော်စာ ဖိလိပ္ပုယင် အယောက်ကတစ်နေရာ အော်လားကလင်ကို အိမ်မှာနေရာယာ ဖိလိပ္ပုစာ လူရက်အင် ဘုရားရှင်က အကြောင်းယင် ဆက်လက်ကိုဆနိန်ကို ငါ့ဆနပ်လင်ကဟေ။

အဲသယောပိလူမျိူးစာ အမှာက ကိန်းယာဆက်လက်ကိုပြန့်ကလင်ကို ကိုယ်တော်ယေရူယင် ချေးပေါ်ကို တဗျင်းပျော်ကို တုံးလင်ကဟေ။

တမန်တော် ၆း၈-၈း၅; ၈း၂၆-၄၀