၄၄။ သူတောင်းစားဟူးဝါ ပေတရုအိမ်းယောဟန်ရက် ဆီ(လ်)ကုအီက
ယက်တာကရပ် ပေတရုအိမ်းယောဟန်ရက် ဗိမာန်တော်ယာလင်ကဟေ။ အသန်စွမ်းကလူ့ သူတောင်းစား ဟူးဝါနာ ဘုရားကျောင်းလင်းဟနှင်းယာ တုံ့ကိုတင်ဂါ စိန်တုံ့ကဟေ။
ပေတရုစာ အိမ်မှာလူ့ယင့်ယူကို “နင်ဇိဉ်အီကဇိဉ် ငါကတင်ဂါ အ့ငါပါ(လ်)။ညီးငါဒင်းယဲ့ ငါထနဲ့ ငါဟေက နင်ဇိဉ်အီယန်က။ ကိုယ်တော်ယေရူက အမိန်းအိမ်းရိပ်ကို လင်းဟာကိုလင်”ငါကို ငါနက်ကဟေ။
ဘုရားရှင်စာ အိမ်မှအသန်စွမ်းကလူယင် ချက်ချင်းဒင်းပျောက်ဇိဉ်လင်ကဟေ။ အမှာစာ ရိပ်ကိုလင်ဟာကို ပတ်ကိုဇတ်အဆားကို ဘုရားရှင်ကဂုဏ်ကျေးဇူးရက်အင်ချီးမွမ်းလင်ကဟေ။ မှအကြောင်းအိမ်း ဗိမာန်တော်ဝန်းကျင်အနားဆာက ငါဟေကလူရက်စာ အံ့ဩကလင်ကဟေ။
ဆီ(လ်)ကုကိုအီကဟင့်ပေါ်ကလူယင်ယူကဇိဉ် လူအုတ်ပြောင်စာ မလားယင်ဆာ စုယောယန်ကဟေ။ ပေတရုစာ အမှာရက်အင် “မှလူ့ကျန်းမာရေး မီးကိုင်နန်း ။ညီးငါဒင်းယဲ့ မှအကြောင်းအရာရက်အင် အအံ့ဩယဲ့။ညီရက်က ကိုယ်ပိုင်အစွမ်းအိမ်း ကုအီကအရီကဒလေး ဘုရားရှင်ကဂုဏ်ကျေးဇူးတော်ယင် ချီးမွမ်းကအကြောင်းအိမ်းယဲ့ အရီပါ(လ်)။ ကိုယ်တော်ယေရူနာ အမှာကအစွမ်းရက်အိမ်း ကုအီကဖြစ်ဟေ။ အဇာရီကအကြောင်းယားငါနဲ့ ညီရက်စာ ကိုယ်တော်ယေရူယင် ယုံကြည်ကအကြောင်းအိမ်းဖြစ်ဟေ”ငါကို ငါဆနပ်လင်ကဟေ။
“နနိန်ရက်စာ ရောမဘုရင်ခံယင် ကိုယ်တော်ယေရူယင် ကတိုက်ကဇိဉ်ဖန်းဟေက လူရက်ဖြစ်ဟေ။ နနိန်ရက်စာ လူတိုင်းကအတွက် အဆက်အီလူကလူ့ယင် ကတိုက်ကဖန်းကလူ့ရက်ဖြစ်ဟေ။ ညီးငါဒင်းယဲ့ ဘုရားရှင်နာ အမင်ဆီးကမှာပင်ပြန်ကို ရိမ်ဇိဉ်ဟေ။ နနိန်ရက်ကလုပ်တုံ့က နနိန်ရက်အချေကယဲ့ နနိန်ရက်လုပ်ဟေကရက်အင် ရှေ့ဖြစ်ဟောပညာရှိရက် ငါပီကအတိုင်း ဖြစ်ယောယန်ကဖြစ်ဟေ။ အမှာရက်စာ မေရှိယစာ ဒုက္ခဝေဒနာခံစားကို ဆီးပေါ်ကငါကို ဟောပီဒက်ဟေ။ ဘုရားရှင်နာ မှနည်းအတိုင်းဖြစ်မှ လုပ်အီဒက်ကဖြစ်ဟေ။ မှအကြောင်းအိမ်း နောင်တလူကို ဘုရားရှင်ယင် ဆည်းကပ်အင့်။မှကရပ် ဘုရားရှင်နာ နနိန်ရက်ကအပြစ်ရက်အင် ကဇမ်းအီကို ခွင့်လွတ်အီလင်က”ငါကို ငါလင်ကဟေ။
ဗိမာန်တော်ယာကခေါင်းဆောင်ရက်စာ ပေတရုအိမ်းယောဟန်ရက်က တူးယင်တက်ကရပ် တဗျင်းမန်ချေကဟေ။ မှအကြောင်းအိမ်း အမှာရက်စာ ပေတရုအိမ်းယောဟန်ရက်အင် ရီမ်ကိုထောင်ထဲယာထည်နက်ကဟေ။ညီးငါဒင်းယဲ့ ပေတရု ငါဒက်ကရက်အင် လူရက်စာ ယုံကြည်ကို ကိုယ်တော်ယေရူယင်ယုံကြည်က လူ့ငါးထောင်ခန့် ပိုကိုပိ(ရ်)ယောယန်ကဟေ။
အယောက်ယက်တာကရပ် ယုဒလူမျိူးခေါင်းဆောင်ရက်စာ ပေတရုအိမ်းယောဟန်ယင် သာသနာရေးဆိုင်ရာမဟာနာယကဗြောင်အိမ်း အယောက်ကခေါင်းဆောင်ရက်ကမ အော်လား ကလင်ကဟေ။ အမှာရက်စာ မလားကအသန်စွမ်းကလူယင်ယဲ့ အော်ကိုလာကလင်ကဟေ။ အမှာရက်စာ ပေတရုအိမ်းယောဟန်ယင် “နနိန်ရက် မှအသန်စွမ်းကလူယင် အဆာမည်က အစွမ်းအိမ်း ဆီကုအီနက်ကယား”ငါကို ကထာလင်ကဟေ။
ပေတရုနာ “နနိန်ရက်က ရှေ့ယာစက်ကလူနာ မေရှိယာဖြစ်ဟေက ကိုယ်တော်ယေရူကအစွမ်း အိမ်း ကုအီနက်ကဖြစ်ဟေ။ နနိန်ရက်စာ ကိုယ်တော်ယေရူယင် လက်ဝါကပ်တိုင်ဖုံးယာတင်ကို ကတိုက်နက်ကယဲ့ ဘုရားရှင်နာ အမင်ပြန်ကိုဆီမ်းကိုရိပ်ဇိဉ်ကဟေ။ နနိန်ရက်စာ အမင်ငြင်းဒက်ကယဲ့ ကိုယ်တော်ယေရူကမှတစ်ဆင့် ကယ်တင်လူဒက်ကလွဲကို အယောက်ကနည်းလမ်းအငါပါ(လ်)”ငါကို ပြန်ကိုဖြေနက်ကဟေ။
ခေါင်းဆောင်ရက်စာ ပေတရုအိမ်းယောဟန်ရက်က ရဲဝံ့မှငါနက်က အံ့ဩကလင်ကဟေ။ အမှာရက်စာ ပေတရုအိမ်းယောဟန်ရက်စာ စားအထောင့်ကသာမန်လူတန်းစားဖြစ်ဟေက ချေကို လူရက်စာ ကိုယ်တော်ယေရူအိမ်တုံ့ဟေကယဲ့ ချေးတုံ့လင်ကဟေ။ မှအကြောင်းအိမ်း အမှာရက်စာ ပေတရူအိမ်းယောဟန်ယင် “နနိန်ရက်စာ မှလူ့ကအကြောင်းယင် ထပ်ကိုငါ့ဆနပ်တုံနဲ့ နနိန်ရက်အင် အပြစ်ပြောင်အီယန်ပေါ်က”ငါကို ပေတရုအိမ်းယောဟန်ယင် လင်ကခွင့်အီနက်ကဟေ။
တမန်တော် ၃း၁-၄း၂၂