၃၂။ အမီးကဟမန်းပူတုံးက တာဆာပြိုင်ဟူးဝါအိမ်း ဟာပေါ်ဆာအငါကတာတာလှောင်ဆာဟူးဝါယင် ကိုယ်တော်ယေရူဆီကုအီက

ကိုယ်တော်ယေရူအိမ်းအမှာက အတာပည့်ရက်စာ အမှာရက်ကလှေဖုံယာ ချေကို ဂါဒရလူမျိူးရက်ကတုံးက နေရာဒေသထုတ်လင်ကဟေ။ အမှာရက်စာ ကမ်းစပ်ယာထုတ်ကရပ် လှေဖုံယာပင် ဆပ်လင်ကဟေ။

အိမ်းမှာနေရာ အမီးကဟမန်းအကိုးပီးက တာဆာပြိုင်ဟူးဝါး င့လင်ကဟေ။

အိမ်းမှားလူစာ တစ်ဗျင်းသန်မာကို ဟူးဝါယဲ့ထိန်းချုပ်ကို အလူပါ(လ်) ။လူရက်စာ ဟတ်တာငါနဲ့ အမှာက တဟူးအိမ်းအတာရက်အင် ဆီမ်ရဖူ(ဖ်)ရက်အိမ်း တိုင်ပီကယဲ့ အိမ်းမှာလူစာ ရဖူ(ဖ်)ရက်အင် အထုတ်ကို ကိုက်ကလင်ကဟေ။

အိမ်းမှာလူစာ အနားဆာက သင်္ချိူင်းဆူးယာက အုတ်ဂူရက်အာ ပတ်ကိုတုံးကို မိနှစ် နက်တိုက်ဟိုကိုတုံးဟေ။အိမ်မှာလူစာ ပါဇုကမုတူက အငှာပါ(လ်) အမှာကအမှာ တလုံရက်အိမ်း ဟက်တာဟက်တာ ဟန်ဟေ။

အိမ်မှာလူစာ ကိုယ်တော်ယေရူကမှာ ကိုက်လင်ကို ကိုယ်တော်ယေရူကအရှေ့ယာ ဒူထောက်တုံနက်ကဟေ။ကျီးကအိမ်း ကိုယ်တော်ယေရူစာ အိမ်မှာလူကအထဲယာက မကောင်းဆိုးဝါး ရက်အင် “မှလူကမှာပင်ပြုယန်”ငါကို င့နက်ကဟေ။

အိမ်မှာမကောင်းဝါးစာ ဟိုကို “အကြီးမြတ်ဆုံးက ဘုရားကအဆာ ကိုယ်တော်ယေရူ ငါကမှာပင် အဆာမည်ကဦဇားရက် စိုးကက်ကဟေယား။ ငင် ညှင်းပန်းအနှိပ်စက် အန်ယဲ့”ငါကို လျှေက်တင်လင်ကဟေ။မှကရပ် ကိုယ်တော်ယေရူစာ အိမ်မှာ ဟမန်းယင် “နင်ကအမိန်းအဆာမည်ယား”ငါကို ကထာလင်ကဟေ။ “ငါက အမိန်းစာ လေဂေါင်းဖြစ်ဟေ။ အဇာရီကအကြောင်းယားငါနဲ့ ငါစာ ဘောင်းကိုကအမီးကဟမန်းဖြစ်ဟေ။(လေဂေါင်အုတ်စုယာ ငါဟေက မကောင်းဆိုးဝါးအရေးအတွက်စာ ရောမစစ်တပ်အာက ထောင်ပေါင်းများစွာက စစ်ဆာအင်အားအိမ်း တူနက်ဟေ)”ငါကို ပြန်ကိုလျှောက်တင်လင်ကဟေ။

မကောင်းဆိုးဝါရက်စာ ကိုယ်တော်ယေရူယင် “ညီရက်အင် မှအရပ်ဒေသပင် အကတောက်အန်ယဲ့” ငါကို တောင်းပန်ကိုလျှောက်ပီလင်ကဟေ။ မှ အနားဆာက တာဂေါ်ယာ အကြိုဆာတုံးက ဗက်(ဖ်)အုတ်တစ်အုတ် ငါလင်ကဟေ။ မှကရပ် မကောင်းဆိုးဝါးရက်စာ ကိုယ်တော်ယေရူယင် “ညီရက်အင် သနားကအဖြင့် ဗက်(ဖ်)ရက်ကမှာ ဖြောင့်အီယန်”ငါကို တောင်းပန်လျှောက်တင်ပီကို ကိုယ်တော်ယေရူစာ “မီးယင်နန်း အမှာရက်က အထဲယာ လင်”ငါကို င့နက်ကဟေ။

မှကရပ် မကောင်းဆိုးဝါရက်စာ မှလူကမပင်ပြုကို ဗက်(ဖ်)ရက်ကမှာ ဆင်ကလင်ကို ဗက်(ဖ်)ရက်စာ မတ်စောက်ဟေက ကမ်းပါးအတိုင်း အိ(လ်)ထဲယာ ကိုက်ကိုဆပ်လင်ကို အိ(လ်)မြုပ်ကို ဆီလင်ကဟေ။ အိမ်မှာ ဗက်(ဖ်)အုတ်ထဲယာ ဗက်(ဖ်)အကောင်ပေါင်း နှစ်ထောင်ခန့်ယောဟေ။

အိမ်မှာဗက်(ဖ်)ရက်အင် ကျောင်းတုံးကလူရက်စာ မှအဖြစ်ပျက်ရက်အင် ပေါ်ကရပ် ထိန်ယာကိုက်ကိုဆင်လင်ကို လူတိုင်းယင် ကိုယ်တော်ယေရူက လုပ်ဟေကဦဇားရက်အင် ငါ့ဆနပ်လင်ကဟေ။ထိန်တဟုန့်ယာက လူရက်ဗန်ကို ထုတ်ဗာကရပ် မကောင်းဆိုးဝါးရက် ပူဇာဟင်းတုံးက လူစာ ငြိမ်ကိုဆာတုံ့ကို အဝတ်စာရက်တူပီကို သာမန်လူဟူးဝါတယ် လုပ်ကို တုံ့တုန်းက ပေါ်လင်ကဟေ။

လူရက်စာ တစ်ဗျင်းအစက်ကလင်ကို ကိုယ်တော်ယေရူယင် မှနေရာပင် ပြုကလင်ကဇိဉ် တောင်းဆိုလင်ကဟေ။မှအကြောင်းအိမ်း ကိုယ်တော်ယေရူစာ လှေဖုံယာချေလင်ကို မကောင်းဆိုးဝါးပူဇာဟင်းကမှပင် လွှတ်မြောက်ကလူစာ ကိုယ်တော်ယေရူက အလိုယာယောကဇိဉ် ခွင့်အီကဇိဉ် လျှောက်တင်လင်ကဟေ။

ညီငါဒင်းယဲ့ ကိုယ်တော်ယေရူစာ အိမ်မှာလူယင် “ယောကအဖန်းပါ(လ်)၊ဘုရားရှင်နာ နင်ငင် လုပ်အီးကအကြောင်းတရားရက်အင် လူတိုင်းဇိဉ်လင်ကို ငါ့ဆနပ်အာ။ဘုရားရှင်စာ နင်ကအပေါ်ယာကျေးဇူးလုပ်အီးကယဲ့ ငါ့ဆနပ်လင်”ငါကို အိမ်မှာလူယင် င့နက်ကဟေ။

မှအကြောင်းအိမ်း အိမ်မှာလူစာ လင်စံဗြောင်ယာလင်ကျီးကရပ် ကိုယ်တော်ယေရူ အမင်လုပ်အီးက အကြောင်းရက်အင် လူရက်ဇိဉ်ရနက်ကို ငါ့ဆနပ်လင်ကဟေ။ အမှာကအကြောင်းယင် တိုက်ကလူတိုင်းစာ တစ်ဗျင်းအံ့ဩလင်ကဟေ။

ကိုယ်တော်ယေရူစာ အိ(လ်)ကန်း ဟိုက်တာနိန်ယား ပြန်ကိုကြွလင်ဟေ။ ကိုယ်တော်ယေရူ ဟိုက်တာနိန်ယား ထုတ်ကရပ် ပြောင်ဟေကလူတစ်စုစာ အမှာကအနားယာ ဝိုင်းကိုဆင်လင်ကဟေ။ အိမ်မှာလူအုတ်ထဲယာ သွေးလွန်ရောဂါယင် တစ်ဆယ့်နှစ်နှစ်ခန့် ခံစားတုံးပေါ်က ရောဂါဆယ်တာဆာလှောင်ဟူးဝါ ယောလင်ကဟေ။ မှတာဆာလှောင်ဆာဆီကုအီးကဇိဉ် အမှာကတင်ဂါ စုတ်ရက်အင် ဆေးဆရာရက်အင် ပုံကိုအီကယဲ့ အမှာကရောဂါဝေဒနာစာ ပိုကိုမယ်ဆိုးယောယန်ကဟေ။

အမှာစာ ကိုယ်တော်ယေရူနာ ဘောင်းကိုကဟာပိုဆာ အငှာကလူရက်အင် ဆီကုအီလူဟေငါကို တိုက်ကရပ် “ကိုယ်တော်ယေရူကအဝတ်စားယင် ညီရက်တော့နက်နဲ့ ငါကရောဂါပျောက်ကလင်က” ငါကို တွေးလင်ကဟေ။ မှအကြောင်းအိမ် အမှာစာ ကိုယ်တော်ယေရူက အလိုယာယောကို ကိုယ်တော်ယေရူက အဝတ်စာ တော့ကိုအကိုးနက်ကဟေ။ဗြုန်းမနီး အမှာက သွေးလွန်ရောဂါစာ ချက်ချင်းတန့်ကလင်ကဟေ။

ဗြုန်းမနီး ကိုယ်တော်ယေရူစာ အမှာကမပင် တန်ခိုးရက်ပြန့်လွင့်လင်က သတိပီတိလင်ကို နောက်အာ လှည့်ကိုယူကို “ငင်အယူတော့ဟေကယား”ငါကို င့နက်ကဟေ။အတာပည့်ရက်စာ “ကိုယ်တော်ကအနားယာ လူရက်ဘောင်းကိုငါတုံးကို “ငင်အယူဗန်ကိုတော့ဗားကယားငါကို အဇာရီကအကြောင်းအိမ်းကထာကယား”ငါကို ပြန်ကိုကထာလင်ကဟေ။

မှတာဆာလှောင်နာ ကိုယ်တော်ယေရူက ရှေ့ယာ ဒူးထောက်ကို ရမိ(လ်)ကိုအစက်တုံးလင်ကဟေ။ကျီးကအိမ်းကိုယ်တော်ယေရူယင် အမှာကလုပ်တက်က အကြောင်းရာ ရက်အင် ငါ့ဆနပ်ကိုလျှောက်တင်လင်ကို အမှာကရောဂါပျောက်ကလင်ဂါယဲ့ ငါ့ဆနပ်လင်ကဟေ။ကိုယ်တော်ယေရူစာ မှတာဆာလှောင်ဆာ “နင်ကယုံကြည်မူ့စာ နင်ငင်ကုအီနက်ကဖြစ်ဟေ ငြိမ်းအေးစွာပြုလင်ဒတ်”ငါကို င့နက်ကဟေ။

မဿဲ ၈း၂၈-၃၄; ၉း၂၀-၂၂; မာကု ၅း၁-၂၀; ၅း၂၄b-၃၄; လုကာ ၈း၂၆-၃၉; ၈း၄၂b-၄၈