၂၅။ ကိုယ်တော်ယေရူယင် စာတန်မာရ်ဟမန်းစာ ဆွဲဆောင်ဟေက
ကိုယ်တော်ယေရူ အိ(လ်)မြုတ်ကို မင်္ဂလာ လာကျီးကို ဗြုန်းမနီး ဘုရားရှင်က ဉာဏ်အလင်းတော်ရက်စာ မလိမ်းကန္တာရထဲယာ အော်လားကလင်ကဟေ။ ကိုယ်တော်ယေရူစာ အိမ်းမှာနေရာ ရက်ပေါင်းလေးဆယ်ကြားမနီး တုံဒက်ကဟေ။မှအချိန်ကရပ် အမှာစာ ပုတ်အဆာထမ်း ရှောင်တုံကရပ် စာတန်မာရ်နတ် ကိုယ်တော်ယေရူစာ အပြစ်လုပ်တိမှ ဆွဲဆောင်ကဇိဉ် ထုတ်ဗာလင်ကဟေ။
မလားကင့်မှ စာတန်မာရ်နတ် ကိုယ်တော်ယေရူယင် “နင်စာ ဘုရားရှင်ကအဆာဖြစ်နဲ့ မှတာလုံးရက်အင် ပေါင်မုန့်အဖြစ် ပြောင်းကို ဆင်”ငါကို င့နက်ကဟေ။
ညီးငါဒင်ယဲ့ ကိုယ်တော်ယေရူစာ စာတန်မာရ်နတ် “လူရက်စာ အဆက်ဆိမ်းကဇိဉ် ပေါင်မုန့်ယင် စိုးကအရိထမ်း ဘုရားရှင်က နူတ်ကပါတ်တော်ရက်အင်မယ် စိုးကက်အကြောင်းယင် ဘုရားရှင်က နူတ်ကပါတ်တော်ရက်အင် ကျမ်းစာအတာဟုတ်ယာ ရေးကိုဆနပ်ပီးဟေ”ငါကို င့နက်ကဟေ။
ကျီးကအိမ်း စာတန်မာရ်နတ် ကိုယ်တော်ယေရူယင် ဗိမန်တော်က အစောက်ဆုံးနေရာနား အော်လားကလင်ကို “နင်စာ ဘုရားရှင်က အဆာဖြစ်နဲ့ ကဇက်ဖုံးယာ ခုန်နက်အင့်။အဇာရိကအကြောင်းယားငါနဲ့ ဘုရားရှင်က ဟမန်းရက်စာ နင်ကအတာထောက်အင် တာလုံအိမ်းအတော်မီး နင်ငင် ဗန်ကိုပင်ဗား(ဖ်)ငါကို ရေးပီးအကြောင်းဖြစ်ဟေ”ငါကို င့ဆနပ်လင်ကဟေ။
ညီးငါဒင်းယဲ့ ကိုယ်တော်ယေရူစာ စာတန်မာရ်နတ်က ဖန်းဟေကအတိုင်း အလုပ်ထမ်း “နနိန်ရက်ကက အရှင်ဖြစ်ဟေက ဘုရားရှင်ယင် အစမ်းသပ်ကဇိဉ် လူတိုင်းယင် င့ပီးဟေ။ငါကို င့ဆနပ်လင်ကဟေ။
ကျီးကအိမ်း စာတန်မာရ်နတ်စာ ကမ္ဘာပေါ်ယာ ငါဟေက တိုင်းနိူင်ငံစုတ်ရက်အင် ကိုယ်တော်ယေရူဇိဉ် ဆနပ်လင်ကဟေ။ စာတန်မာရ်နတ်စာ ကိုယ်တော်ယေရူယင် အိမ်းမှာနိူင်ငံရက် အဆာတိုက်ကအင်အားပြောင်ကို အဆာတိုက်ကချမ်းသာဟေကယဲ့ ဆနပ်လင်ကဟေ။ စာတန်မာရပ်နတ်စာ ကိုယ်တော်ယေရူယင် “နင်စာ ငင် ဆာဗားကို ကိုးကွယ်နဲ့ မှဦးဇားရက်အင် နင်ဇိဉ် ငါအီယန်က”ငါကို င့နက်ကဟေ။
ကိုယ်တော်ယေရူနာ “စာတန်မာရ်နတ်၊ငါအိမ်းလင်စံဟေ နေရာပြုကာလင်။ ဘုရားရှင်ကတူးထဲယာ ဘုရားရှင်စာ အမှာကလူရက်အင် နနိန်ရက်ကအရှင်သခင်ဖြစ်ဟေက ဘုရားရှင်ယင်မယ် ကိုးကွယ်ကို ဘုရားရှင်ယင်မယ် ချီးမွမ်းဂုဏ်ပြုယင်ငါကို င့ပီဟေ”ငါကို ပြန်ကို င့ဆနပ်လင်ကဟေ။
စာတန်မာရ်နတ်စာ အမှာကဆွဲဆောင်ဟေက အလိုယာအယောက ကိုယ်တော်ယေရူ ပီဒက်ကိုပြုကလင်ကဟေ။ကျီးကအိမ်း ဟမန်းရက်စာ ကိုယ်တော်ယေရူယင် ဗန်ကိုပြုစုစောင့်ရှောက် လင်ကဟေ။
မဿဲ ၄း၁-၁၁; မာကု ၁း၁၂-၁၃; လုကာ ၄း၁-၁၃